သိုၵ်းၵဝ်ႈၵၢင်ႉ MNDAA ဢွၵ်ႇပၼ်ဝႂ် ႁေႃႈရူတ်ႉၵႃး တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ – ရူတ်ႉၵႃး ဢၼ်မီးလၢႆႊသဵၼ်ႊ (License) လႄႈသင် ဢမ်ႇမီးဝႂ် လၢႆႊသဵၼ်ႊ(License) လႄႈသင် တေလႆႈတၢင်ႇယွၼ်းၶိုၼ်းမႂ်ႇမႂ်ႇ တင်းမူတ်း ဝႃႈၼႆ။
တႄႇႁူဝ်လိူၼ်ၵျႅၼ်ႊၼိဝ်ႊရီႊ ၼႆႉမႃး သိုၵ်းၵဝ်ႈၵၢင်ႉႁဵတ်းပၼ်ဝႂ်ၾၢင်လၢႆႊသဵၼ်ႊ(License) ရူတ်ႉၶိူင်ႈ/ ရူတ်ႉၵႃး၊ ၵူၼ်းပိုၼ်ႉတီႈဢွၼ်ၵၼ် ၵႂႃႇပၼ်သဵၼ်ႈမၢႆ ၼိုင်ႈဝၼ်း မီးၸမ်ပၢၵ်ႇၵေႃႉ ဝႃႈၼႆ။
ၵူၼ်းၸၢႆး ယူႇပိုၼ်ႉတီႈ ဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၼႂ်းဝဵင်းၼႆႉ ပိူၼ်ႈလၵ်ႉရူတ်ႉၵႃးၵၼ် တိၵ်းတိၵ်းလႄႈ ၸင်ႇႁဵတ်းပၼ်ၼႆဝႃႇ။ မိူဝ်ႈဢွၼ်တၢင်းတႄႉ ရူတ်ႉၵႃးဢၼ်ဢမ်ႇမီးဝႂ် လၢႆႊသဵၼ်ႊ(License)၊ ဢၼ်ဝႃႈ ၵႃးဝိတ်ႉတွၵ်ႉ(without) ၸိူဝ်းၼၼ်ႉ ၶဝ်ယွၼ်းမၢႆၸၢၵ်ႈ (Engine နံပါတ်)လႄႈ မၢႆတူဝ်ၸိုၼ်း (ခဲခြစ်နံပါတ်)။ ပေႃးရူတ်ႉၵႃးဢၼ်မီးဝႂ်(License) တႄႉ လႆႈၼႄပပ်ႉဝႂ် License ၸဝ်ႈၶွင် (အုံနာဘုတ်) – သိုၵ်းၵဝ်ႈၵၢင်ႉ ယွၼ်း 15,000 ပျႃး။ ပၢႆႉရူတ်ႉၵႃး (ကဒ်ပြား) ၵေႃႈ ႁဵတ်းဢွၵ်ႇပၼ်တင်း ပလၢတ်ႊသတိတ်ႊ”- ဝႃႈၼႆ။
ဝၼ်းတီႈ 4/1/2024 သိုၵ်းၵဝ်ႈၵၢင်ႉ ပိုၼ်ၽၢဝ်ႇဝႃႈ ႁဵတ်းပၼ်ဝႂ်ၾၢင်ရူတ်ႉၵႃး တီႈပွၵ်ႉ 3 ၊ ပွၵ်ႉ 8 ၊ ပွၵ်ႉ 12 လႄႈ တီႈဝၢၼ်ႈႁူဝ်ပိုၵ်ႉ (ဟိုပိတ်) ၼႂ်းဝဵင်းလႃႈသဵဝ်ႈ ရူတ်ႉၵႃးၼိုင်ႈလမ်း 15,000 ပျႃး ဝႃႈၼႆ။
တႄႇလိူၼ်ၼူဝ်ႊဝႅမ်ႊပိူဝ်ႊ ပီ 2024 ၵၢင်ႉၵႄႇၼႂ်းပွၵ်ႉယွမ်ႇ ႁႃလမ်းၵဵပ်းသဵၼ်ႈမၢႆ ရူတ်ႉၵႃး ၼႂ်းပွၵ်ႉ။ ယၢမ်းလဵဝ် ၵူတ်ႇထတ်းႁဵတ်းပၼ်ဝႂ်ၾၢင်ႁေႃႈရူတ်ႉၵႃးၼႆ ၵူၼ်းပိုၼ်ႉတီႈလၢတ်ႈ။
ၵူၼ်းႁေႃႈၵႃး တူၼ်ႈတီး – လႃႈသဵဝ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ဝႂ်ဢၼ်သိုၵ်းၵဝ်ႈၵၢင်ႉ ႁဵတ်းပၼ်ၼႆႉ တေ ၸႂ်ႉလႆႈတီႈတၢင်းမိူင်းတႆးပွတ်းႁွင်ႇၵူၺ်း။ ပေႃးရူတ်ႉၵႃးႁၢႆ ဢမ်ႇၼၼ် ပဵၼ်ၽေးၵိုင်ႉၵၢင်ႉ ၸိူဝ်းၼႆႉၵေႃႈ ႁႂ်ႈၵူတ်ႇထတ်းငၢႆႈၼၼ်ႉၼႃႇ။ ဢၼ်လီမႆႈၸႂ်တႄႉ – ပေႃးဢဝ်ရူတ်ႉဢၼ်မီးဝႂ် ဢၼ်သိုၵ်းၵဝ်ႈၵၢင်ႉ ႁဵတ်းပၼ်ၼၼ်ႉမႃးတၢင်းတၢၼ်ႉယၢၼ်း၊ မိူင်းယႆ ၸိူဝ်းၼႆႉ ပေႃးၺႃးသိုၵ်းမၢၼ်ႈ ၵူတ်ႇထတ်းၼႆ ၵူဝ်ၺႃးတီႉၼၼ်ႉၼႃႇ”- ဝႃႈၼႆ။
ယၢမ်းလဵဝ် တီႈဝဵင်းလႃႈသဵဝ်ႈ ပေႃးပဵၼ်ၵႃး လႆႈပၼ်ၶွၼ်ႇ တႃႇၼိုင်ႈပီ။ ပေႃးပဵၼ်ၶူဝ်းၵုၼ်ႇ ၶဝ်တေတူၺ်းတင်းၼမ်တင်းဢေႇမၼ်းသေ လႆႈပၼ် 10 ပုၼ်ႈ 1 ပုၼ်ႈ။ တီႈတၢင်းၶဝ်ႈဝဵင်းလႃႈသဵဝ်ႈၵေႃႈ ၶဝ်ပႂ်ႉၵဵပ်းၶွၼ်ႇၵႃး 1,000 ထိုင် 5,000 ပျႃး။
ၼႂ်းႁူဝ်ပီ 2025 လိူၼ်ၵျႅၼ်ႊၼိဝ်ႊရီႊၼႆႉ သိုၵ်းၵဝ်ႈၵၢင်ႉ MNDAA တေတႄႇၵဵပ်းၵႃႈၾႆးၾႃႉလႄႈ ၶွၼ်ႇယုၵ်းယၢၵ်း။ ၵႃႈၾႆးၾႃႉ ၼိုင်ႈမီႊတိူဝ်ႊၾႆး (Meter) 1,500 ၼႆသေ ၊ ၵႃႈၶွၼ်ႇယုၵ်းယၢၵ်း ၼိုင်ႈလိူၼ်တေ လႆႈပၼ် 3,500 ပျႃး ဝႃႈ ၼႆ။
ၽႅၼ်ယၼ်ႇသိုၵ်း 1027 ပွၵ်ႈၵမ်း 2 သိုၵ်းၵဝ်ႈၵၢင်ႉ တႄႇၶဝ်ႈတိုၵ်းဝဵင်းလႃႈသဵဝ်ႈ မိူဝ်ႈဝၼ်းတီႈ 2/7/2024 ယၢမ်းၵၢင် ၶိုၼ်း 11:45 မူင်းသေ ထိုင်မႃးဝၼ်းတီႈ 3/10/2024 ပိုၼ်ၽၢဝ်ႇဝႃႈ ယိုတ်းလႆႈ ဝဵင်းလႃႈသဵဝ်ႈလီငၢမ်း။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ