ၵဵဝ်ႇလူၺ်ႈ လွင်ႈပၼ်ႁႃ ပတိၵ်ႈၶၢတ်ႈသေ ၵူၼ်းမိူင်းမၢၼ်ႈ 3 လၢၼ်ႉပၢႆ လႆႈပၢႆႈၽၢတ်ႇယၢၼ် တီႈယူႇႁိူၼ်းယေးလႄႈ ငဝ်းလၢႆး ၵၢၼ်ၸွႆႈထႅမ်ၵူၼ်းၼင်ႇၵၼ် ၸၢင်ႈႁၢႆႉႁႅင်းၶိုၼ်ႈမႃးထႅင်ႈ – ၸၢတ်ႈၸိုင်ႈလုမ်ႈၾႃႉ လၢတ်ႈပၼ်ၾၢင်ႉ မိူဝ်ႈဝၼ်းတီႈ 3/1/2025 ၼႆႉၼင်ႇၼႆ။
ႁူဝ်ၼပ်ႉၼႆႉ ၼမ်လိူဝ်သေ မိူဝ်ႈပီပူၼ်ႉမႃး 1 လၢၼ်ႉပၢႆ။ တႄႇဢဝ် သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း ၼႂ်းပီ 2021 မႃး သိုၵ်းမၢၼ်ႈတင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပဵၼ်ပၢင်တိုၵ်းၵၼ် ၼမ်ၶိုၼ်ႈမႃး။ တႃႇတေၵႅတ်ႇၶႄၵုမ်းထိင်း ၶူဝ်းၶွင်သၽႃႇဝလႄႈ တႃႇသုၼ်ႇလႆႈဢုပ်ႉပိူင်ႇၽွင်းငမ်းတူဝ်ၵဝ်ႇၼၼ်ႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တိုၵ်းတေႃးသိုၵ်းမၢၼ်ႈမႃး တႄႇၸဵမ်မိူဝ်ႈ လႆႈလွတ်ႈလႅဝ်းၵွၼ်းၶေႃမႃး – ဝႃႈၼႆ။
UNOCHA ၶၢတ်ႈလၢမ်းဝႃႈ တေႃႇထိုင်ဝၼ်းတီႈ 16 လိူၼ်တီႊသိမ်ႊပိူဝ်ႊ ပီ 2024 ၼႆႉ တူဝ်ႈမိူင်းႁူမ်ႈတုမ် ပတ်းပိုၼ်ႉ ၵူၼ်းမိူင်းလႆႈပၢႆႈၽၢတ်ႇယၢၼ်ႁိူၼ်းယေးမီး 3 လၢၼ်ႉပၢႆ။ လွင်ႈၼႆႉ မီး 6% ၼႂ်းႁူဝ်ၼပ်ႉၵူၼ်း မိူင်းမၢၼ်ႈ 57 လၢၼ်ႉ။ ၼႂ်းၼၼ်ႉတႃႇ 3 ပုၼ်ႈ 1 ပုၼ်ႈ ပဵၼ်လုၵ်ႈဢွၼ်ႇ ဝႃႈၼႆ။
တေႃႇထိုင် လိူၼ်တီႊသိမ်ႊပိူဝ်ႊ ပီ 2024 ၸမ်သဵင်ႈၼႆႉ သိုၵ်းမၢၼ်ႈ တိုၵ်ႉၸႂ်ႉတိုဝ်း ၶိူင်ႈမိၼ် ၊ တရူၼ်ႊ၊ ၶိူင်ႈၵွင်ႈၵၢင်ႇလူင် ၸိူဝ်းၼႆႉ ပိုၼ်းယိုဝ်းသေ ပၢင်တိုၵ်းပဵၼ်ႁၢဝ်ႈႁႅင်း၊ မီးလွင်ႈတိုၵ်းတေႃးတီႉၺွပ်းလူၺ်ႈ ပူၼ်ႉပႅၼ်မၢႆမီႈဝႆႉယူႇ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ