သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇထႅင်ႈ တီႈႁိမ်းပၢင်သဝ်းၵူၼ်းပၢႆႈၽေးသိုၵ်း ဝဵင်းၾၢႆၶုၼ် ၸၢၵ်ႇမၢၵ်ႇတိူဝ်ႉၺႃး ႁိူၼ်းယေးၵူၼ်းမိူင်းလူႉၵွႆလင်ၼိုင်ႈ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆ ဢမ်ႇမီး။

မိူဝ်ႈဝႃး ဝၼ်းတီႈ 3/1/2025 ယၢမ်းႁူဝ်ၶမ်ႈ 5 မူင်းပၢႆ သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇ တီႈဝၢၼ်ႈပီႇၵိၼ်း ဢၼ်မီးဝႆႉၾၢႆႇတူၵ်းဝဵင်းၾၢႆၶုၼ် ၼႂ်းၸိုင်ႈတႆးပွတ်းၸၢၼ်းၼႆႉ သွင်လုၵ်ႈ ၼႆယဝ်ႉ။

ၵူၼ်းမိူင်းပိုၼ်ႉတီႈ ဝဵင်းၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ – “တၢင်းပွတ်းဝၢၼ်ႈပီႇၵိၼ်းၼႆႉ တေမီးၾၢႆႇတူၵ်းဝဵင်း သိုၵ်းမၢၼ်ႈ ဢဝ်ၶိူင်ႈမိၼ်ၵႂႃႇပွႆႇမၢၵ်ႇ မိူဝ်ႈဝႃးႁူဝ်ၶမ်ႈ မွၵ်ႈ 5 မူင်းၶိုင်ႈၼႆႉ။ လွင်ႈၵူၼ်းမိူင်းလူႉတၢႆ မၢတ်ႇၸဵပ်းတႄႉ ဢမ်ႇလႆႈငိၼ်းဝႃႈႁိုဝ်။ ၸွမ်းပိုၼ်ႉတီႈဝၢၼ်ႈလဢီႉ၊ ဝၢၼ်ႈပီႇၵိၼ်း ၸိူဝ်းၼႆႉသမ်ႉ မၼ်းပဵၼ်တီႈၵူၼ်းပၢႆႈၽေးၶဝ် ၵႂႃႇယူႇသဝ်းဝႆႉ။ ယၢမ်းလဵဝ်ၵေႃႈ ၵူၼ်းပၢႆႈၽေးၶဝ် တိုၵ်ႉမီးဝႆႉယူႇ”- ဝႃႈၼႆ။

သိုပ်ႇလၢတ်ႈဝႃႈ – “ၵူၼ်းမိူင်းၼႆႉ လႆႈယၢပ်ႇၸႂ်ဢိူဝ်ႈ ၶွင်ပိူဝ်ႈသိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ ၶႃႈလူး။ ၵၢၼ်မိူင်း သုၵ်ႉၸိူင်ႉၼႆ ႁဝ်းၵူၼ်းမိူင်းၼႆႉ ဢမ်ႇၸၢင်ႈလၢတ်ႈၸွမ်းသင်ယဝ်ႉ ၵုမ်ႇလႆႈမႆႈၸႂ်ၵူၺ်း မဵဝ်း ၵူၼ်းယိပ်းၵွင်ႈၵၢင်ႇၼႆႉ ယူႇၸွမ်းၽႂ်ၵေႃႈ မၼ်းတိုၼ်းဢမ်ႇလီၼၼ်ႉယဝ်ႉ”– ဝႃႈၼႆ။

တီႈဝၢၼ်ႈပီႇၵိၼ်းၼႆႉၵူၺ်းၼင်ႇၵဝ်ႇ ပူၼ်ႉမႃးမိူဝ်ႈဝၼ်းတီႈ 27/12/2024 ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ မၢတ်ႇၸဵပ်းႁၢဝ်ႈႁႅင်းသွင်ၵေႃႉ။ လိူဝ်ၼၼ်ႉ ႁိူၼ်းယေးၵူၼ်းမိူင်း မီးလွင်ႈလူႉ ၵွႆၸွမ်းထႅင်ႈၼမ်။

ယၢမ်းလဵဝ် ၸွမ်းပိုၼ်ႉတီႈ ဝဵင်းၾၢႆၶုၼ်ၼႆႉ ဢမ်ႇမီးပၢင်တိုၵ်းသင်သေတႃႉ ၾၢႆႇသိုၵ်းမၢၼ်ႈတႄႉ တိုၵ်ႉထႅမ်ႁႅင်းသိုၵ်းမႃးထႅင်ႈတင်းၼမ်လႄႈ ၵႆႉမီးလွင်ႈပွႆႇမၢၵ်ႇလူင် သႂ်ႇၸွမ်းဝၢၼ်ႈသေ ႁဵတ်းႁႂ်ႈၵူၼ်းဝၢၼ်ႈ ပႃးၸဵမ်ၵူၼ်းပၢႆႈၽေး ဢွၼ် ၵၼ်မႆႈၸႂ် ၵူဝ်ဢမ်ႇမီးလွင်ႈႁူမ်ႇလူမ်ႈ။ ယဝ်ႉၵေႃႈ ၸိူဝ်းပၢႆႈမႃးၼၼ်ႉ ပႆႇၸၢင်ႈပွၵ်ႈၶိုၼ်းႁိူၼ်းယေး ဢွၼ်ၵၼ်ထူပ်းတၢင်းယၢပ်ႇၽိုတ်ႇဢမ်ႇၸၢင်ႈၵႂႃႇမႃးႁႃၵိၼ်လဵင်ႉတွင်ႉ။