ၶၼ်ၶူဝ်းၵုၼ်ႇၶွင်ၵိၼ်ယႅမ်ႉ ၽၵ်းၶဵဝ် ၸိူဝ်းၼႆႉ ၵႃႈၶိုၼ်ႈႁႅင်း တီႈဝဵင်းလၢႆးၶႃႈ ယွၼ်ႉၸုမ်းၵျႃးၽႅၼ်ႉႁပ်ႉသိုဝ်ႉ (မဝ်သိုဝ်ႉ) ၼမ်လႄႈ ႁဵတ်းႁႂ်ႈၵူၼ်းပိုၼ်ႉတီႈ ဢွၼ်ၵၼ်ထူပ်းတၢင်းယၢပ်ႇ။

ယၢမ်းလဵဝ် ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼႆႉ ၶၼ်ၶူဝ်းၵုၼ်ႇၶွင်ၵိၼ်ယႅမ်ႉ၊ ၽၵ်းၶဵဝ်၊ ၼမ်ႉမၼ်းၸိူဝ်းၾႆး ၸိူဝ်းၼႆႉ ၵႃႈၶိုၼ်ႈႁႅင်း ယွၼ်ႉၵူၼ်းႁဵတ်းၵၢၼ်ၵျႃးၽႅၼ်ႉၶဝ်ႈမႃးယူႇၼမ် ၼႆယဝ်ႉ။

ၵူၼ်းလၢႆးၶႃႈ ၽူႈယိင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸုမ်းၵျႃးၽႅၼ်ႉၼႆႉ ၶဝ်မႃးယူႇၸွမ်းဝၢၼ်ႈၼွၵ်ႈ တႄႇၵၢင်လိူၼ်တီႊသႅမ်ႊပိူဝ်ႊ ပီ 2024 ၼၼ်ႉမႃး ၶဝ်မႃးထႅင်ႈတင်းၼမ်။ မိူဝ်ႈလဵဝ်ၵေႃႈ တိုၵ်ႉမႃးယူႇတိၵ်းတိၵ်း ၵွပ်ႈၼႆလႄႈ ၶူဝ်းၵုၼ်ႇၼႆႉ ၶိုၼ်ႈတႄႉၶိုၼ်ႈဝႃႈၼၼ်ႉယဝ်ႉ ၽၵ်းၶဵဝ်ၸိူဝ်းၼႆႉၵေႃႈ ၶိုၼ်ႈပႅတ်ႈ မူတ်းဢေႃႈ”- ဝႃႈၼႆ။

ဢိင်ၼိူဝ် လွင်ႈၸုမ်းၵျႃးၽႅၼ်ႉၼႆႉသေ သင်ဝႃႈ မႃးသိုဝ်ႉၽၵ်းၶဵဝ်ၸိုင် ဢမ်ႇၸႂ်ႈဝႃႈသိုဝ်ႉဢေႇ မၢင်ပွၵ်ႈၼႆႉ မဝ်သိုဝ်ႉပႅတ်ႈတင်းမူတ်း ၸိူင်ႉၼႆၵေႃႈမီး ဝႃႈၼႆ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈၽူႈတွႆႇႁွၵ်ႈဝႃႈ – “ၶဝ်မႃးႁပ်ႉသိုဝ်ႉ (မဝ်သိုဝ်ႉ) မူတ်း ၶဝ်မႃးသိုဝ်ႉၼႆႉ ဢမ်ႇၸႂ်ႈဝႃႈ သိုဝ်ႉဢေႇဢေႇ သိုဝ်ႉၼမ်ၼမ်ၼၼ်ႉယဝ်ႉ။ ၶဝ်ဢဝ်ၵႃးပဵၼ်လမ်းမႃးသိုဝ်ႉတၢင်ႇၵႂႃႇ။ သင်ႁဝ်း ဢမ်ႇသိုဝ်ႉၸွမ်းၶဝ် ၵေႃႈ ဢမ်ႇၸၢင်ႈႁဵတ်းႁိုဝ်”- ဝႃႈၼႆ။

လိူဝ်သေ ၶူဝ်းၵုၼ်ႇၶွင်ၵိၼ်ယႅမ်ႉ ၽၵ်းၶဵဝ် ၸိူဝ်းၼႆႉ ၵႃႈၶိုၼ်ႈယဝ်ႉ မိူၼ်ၼင်ႇ ၼမ်ႉမၼ်းၸိူဝ်ႉၾႆးၵေႃႈ ၵႃႈၶိုၼ်ႈမိူၼ် ၵၼ် ၵူႈပွၵ်ႈ 1 လိတ်ႊလႂ် 5,000 ပျႃး ယၢမ်းလဵဝ် ပဵၼ်ၵႂႃႇ 6,500 ပျႃးယဝ်ႉ။

“မၼ်းယၢပ်ႇၵႂႃႇပႅတ်ႈၵူႈလွင်ႈယဝ်ႉ ဢၼ်ႁဝ်းတေၸႂ်ႉၵၢၼ်ၸႂ်ႉငၢၼ်း မိူၼ်ၸိူင်ႉၼမ်ႉမၼ်းၼႆႉ ႁဝ်းတေၸႂ်ႉၼႂ်းသူၼ် ၼႂ်းၼႃး လူဝ်ႇတီႇသူၼ်တီႇယိူဝ်ႇ ၸိူဝ်းၼၼ်ႉ ယွၼ်ႉလႆႈၸႂ်ႉၼမ်ႉမၼ်းလႄႈ တၢၼ်ႇႁဵတ်းလႆႈၼမ်ၵေႃႈ ဢမ်ႇႁဵတ်းလႆႈၼမ် မၼ်းယၢပ်ႇဝႆႉၸိူင်ႉၼၼ်ဢေႃႈ ၸူဝ်ႈၼမ်ႉမၼ်းၸၢၵ်ႈၵႃႈမႃးၼႆႉ”- ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈ ၼႄၼင်ႇၼႆ။

ယၢမ်းလဵဝ် တီႈဝဵင်းလၢႆးၶႃႈၼႆႉ လိူဝ်သေ ၶၼ်ၶူဝ်းၵုၼ်ႇၶွင်ၵိၼ်ယႅမ်ႉ ၽၵ်းၶဵဝ် ၼမ်ႉမၼ်းၸိူဝ်ႉၾႆး ၵႃႈၶိုၼ်ႈၵူၺ်းဢမ်ႇၵႃး လိူဝ်ၼၼ်ႉ ၼိူဝ်ႉမူ ၸိူဝ်းၼႆႉၵေႃႈ ၵႃႈၶိုၼ်ႈမိူၼ်ၵၼ် တေႃႈလဵဝ် ၼိူဝ်ႉမူ 1 ၸွႆႉလႂ် 38,000 ပျႃးယဝ်ႉ ဝႃႈၼႆ။

ၵူၼ်းမိူင်းၼႂ်းဝဵင်းလၢႆးၶႃႈၼႆႉ ယၢမ်းလဵဝ် လိူဝ်သေထူပ်းတၢင်းယၢပ်ႇ လွင်ႈသိုဝ်ႉၶၼ်ၶူဝ်းၵုၼ်ႇၵႃႈယဝ်ႉ၊ မိူၼ်ၼင်ႇ တႃႇ ႁႃၵူၼ်းႁဵတ်းၵၢၼ်လၢႆးဝၼ်းၵေႃႈယၢပ်ႇ။ ယွၼ်ႉဝႃႈ ၵူၼ်းၼုမ်ႇ ၵမ်ႈၼမ် ဢွၼ်ၵၼ်ၵႂႃႇ ႁဵတ်းၵၢၼ်ၵျႃးၽႅၼ်ႉပႅတ်ႈမူတ်းယဝ်ႉ။

“ႁႃၵူၼ်းႁဵတ်းၵၢၼ်ႁဵတ်းၼႃးၼႆႉ ပေႃးယၢပ်ႇယဝ်ႉဢိူဝ်ႈ၊ မိူဝ်ႈလဵဝ် ၸုမ်းၵျႃးၽႅၼ်ႉၶဝ်ၸၢင်ႈၵႃႈၼႃႇလူး ၼိုင်ႈလိူၼ်လႆႈသိပ်းသႅၼ်ပၢႆ ပေႃးႁဵတ်းၵၢၼ်ႁဝ်း မၼ်းဢမ်ႇလႆႈၵႃႈၼၼ်ႉ။ ႁဵတ်းႁႆႈႁဵတ်းၼႃးၼႆႉ မၼ်းဢမ်ႇလႆႈငိုၼ်းၼမ် ၵွပ်ႈၼႆလႄႈ ၵူၼ်းၼုမ်ႇၼႆႉ ၸၢင်ႈၵႂႃႇၵိၼ်ၸၢင်ႈၶဝ်ၼၼ်ႉယဝ်ႉ”- ၵူၼ်းပိုၼ်ႉတီႈ ဝဵင်းလၢႆးၶႃႈလၢတ်ႈ။

ယၢမ်းလဵဝ် ၼႂ်းဝဵင်းလၢႆးၶႃႈၼႆႉ မီးၸုမ်းၵျႃးၽႅၼ်ႉ ႁဵတ်းၵၢၼ်ဢွၼ်ႊလၢႆႊ ဢမ်ႇယွမ်း 3 ဢွင်ႈတီႈ။ မိူၼ်ၼင်ႇ တီႈႁိမ်းဝၢၼ်ႈပၢင်ႇ၊ ဝၢၼ်ႈလိူဝ်ႇလႄႈ ဝၢၼ်ႈႁႅင်ႈ ၸိူဝ်းၼႆႉ။ ဢၼ်တိုၵ်ႉၶၢႆႉမႃးထႅင်ႈ ၼႂ်းႁၢင်ပီ 2024 ၼၼ်ႉၵေႃႈ မီးထႅင်ႈတင်း ၼမ်။

ယွၼ်ႉၼၼ် ၵူၼ်းမိူင်းတႄႉ ဢွၼ်ၵၼ်မႆႈၸႂ် ၵူဝ်ၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊၼႆႉ ၼမ်ၶိုၼ်ႈမႃးႁႅင်းလႄႈ ၵူဝ်ႁဵတ်းႁႂ်ႈၵူၼ်းမိူင်း ဢမ်ႇသႂ်ႇၸႂ်ၼိူဝ်ၵၢၼ်ႁႆႈၵၢၼ်သူၼ်၊ ၵူဝ်ထူပ်းတၢင်းယၢပ်ႇလွင်ႈ ၵိၼ်ယႅမ်ႉမိူဝ်းၼႃႈ ၼႆယဝ်ႉ။