ၽွင်းသဵၼ်ႈတၢင်းၵၢၼ်ၵႃႉၶၢႆ တီႈလႅၼ်လိၼ်ယၢင်းၽိူၵ်ႇ – ထႆး ၺႃးဢိုတ်းႁၢမ်ႈၵၢၼ်တေႃႉၶူဝ်းၵုၼ်ႇတီႈ ၶူဝ်လႅၼ်လိၼ်မၢႆ (2) ဝဵင်းမျႃႉဝတီႇယဝ်ႉၼၼ်ႉ သိုၵ်းမၢၼ်ႈ တႄႇၵူတ်ႇထတ်းၶူဝ်းၵုၼ်ႇ ဢၼ်လုၵ်ႉတၢင်းမိူင်းထႆး ၶဝ်ႈၵႂႃႇၼႂ်းမိူင်းမၢၼ်ႈၼၼ်ႉႁၢဝ်ႈႁႅင်းသေ ဢိုတ်းႁၢမ်ႈသဵၼ်ႈတၢင်းတေႃႉၶူဝ်းၵုၼ်ႇၵႂႃႇ တၢင်းမိူင်းမၢၼ်ႈထုင်ႉပဵင်းလႄႈ မိူင်းတႆးပတ်းပိုၼ်ႉ ၼႆယဝ်ႉ။

မိူဝ်ႈပူၼ်ႉမႃး ဝၼ်းတီႈ 18/08/2025 ၼၼ်ႉ သိုၵ်းမၢၼ်ႈ ဢိုတ်းပႅတ်ႈၶူဝ်မၢႆ (2) တီႈလႅၼ်လိၼ်မႄႈသွတ်ႈ – မျႃႉဝတီႇ၊ ၾၢႆႇၼိုင်ႈၵေႃႈ ယွၼ်ႉမီးပၢင်တိုၵ်းၵၼ်ဝႆႉ ၼိူဝ်သဵၼ်ႈတၢင်းလူင် ႁၢႆႊဝေႊ မျႃႉဝတီႇ – ၵေႃႉၵရဵၵ်ႉလႄႈ ၸဝ်ႈရူတ်ႉၵႃးၶဝ် ဢမ်ႇၸၢင်ႈတေႃႉၶူဝ်းၵုၼ်ႇၵႂႃႇမႃး ၵိုတ်းဝႆႉၸူဝ်ႈၶၢဝ်း။

ၾၢႆႇၶွမ်ႊမသျိၼ်ႊသိုၵ်းမၢၼ်ႈ ပၼ်တၢင်းႁၼ်ထိုင် တုၵ်းယွၼ်းဝႆႉ ႁႂ်ႈၾၢႆႇမိူင်းထႆး သူင်ႇၶူဝ်းၵုၼ်ႇ လုၵ်ႉတၢင်းဝဵင်းရၼွင်း သူင်ႇၸွမ်း ႁိူဝ်းသၢင်းၽေႃး သဵၼ်ႈတၢင်းၼမ်ႉ ၶဝ်ႈၵႂႃႇတၢင်းဝဵင်းၵေႃႇသွင် (ၵေႃႉတွင်း) – တႃႈၵုင်ႈ (ယၼ်ႇၵုင်ႇ) ၊ သင်ပဵၼ်တၢင်းမိူင်းတႆးပွတ်းဢွၵ်ႇသမ်ႉ ႁႂ်ႈသူင်ႇဢွၵ်ႇတၢင်း ၵဵတ်ႉလၢၼ်ႇလႅၼ်လိၼ်မႄႈသၢႆ – တႃႈၶီႈလဵၵ်း သွင်သဵၼ်ႈတၢင်း ၼႆႉ ဝႃႈၼႆ။

တီႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼႆႉ မီးဝႆႉၶူဝ်ၶၢမ်ႈလႅၼ်လိၼ် တႃႇသွင်တီႈပဵၼ်မၢႆ (1) လႄႈ မၢႆ (2) ။ ယၢမ်းလဵဝ် ၾၢႆႇသိုၵ်းမၢၼ်ႈ ဢမ်ႇႁဵတ်းဢွၵ်ႇပၼ် ဝႂ်လၢႆႊသိၼ်ႊတႃႇတေႃႉၶူဝ်းၵုၼ်ႇလတ်းၽၢၼ်ႇ တီႈၶူဝ်မၢႆ (2) ၶဝ်ႈၵႂႃႇၼႂ်းမိူင်းမၢၼ်ႈ ႁႂ်ႈပေႃးၶိုတ်းတၼ်း၊ ၵုမ်ႇထူၼ်ႈသေ ၵမ်ၵိၼ်ၼိူဝ်ၵၢၼ်တေႃႉဢဝ် ၶူဝ်းၵုၼ်ႇတၢင်းမိူင်းထႆး ၶၢမ်ႈၵဵတ်ႉလၢၼ်ႇႁၢဝ်ႈ ႁႅင်း။

ၼၢင်းယိင်း ၵေႃႉႁဵတ်းၵၢၼ်ၵႃႉၶၢႆ တီႈဝဵင်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄဝႃႈ -“တီႈၶူဝ်ၶၢမ်ႈလႅၼ်လိၼ် မၢႆ (1) ၼႆႉ ၾၢႆႇသိုၵ်းမၢၼ်ႈယိုတ်းမိူင်း ပၼ်ၵူၼ်းၶဝ်ႈဢွၵ်ႇၵူၺ်း၊ မီးသုၼ်ႇလႆႈတေႃႉဢဝ် ၶူဝ်းၵုၼ်ႇၶၢမ်ႈၸွမ်း ဢိတ်းဢွတ်းၵူၺ်း။ ဢမ်ႇပၼ်တေႃႉဢဝ် ၵုၼ်ႇၶၢမ်ႈၵဵတ်ႉလၢၼ်ႇ ၵႂႃႇလႆႈလွတ်ႈလႅဝ်း မိူၼ်ဢွၼ်တၢင်းယဝ်ႉ”- ဝႃႈၼႆ။

ယွၼ်ႉၾၢႆႇသိုၵ်းမၢၼ်ႈႁႄႉႁၢမ်ႈ ဢမ်ႇပၼ်တေႃႉၶူဝ်းၵုၼ်ႇၶဝ်ႈၵႂႃႇၼႂ်းမိူင်းၵူႈသႅၼ်းလႄႈ ယၢမ်းလဵဝ် ၸိူဝ်းပဵၼ်ၶူဝ်းၵုၼ်ႇ တႃႇၼႂ်းၶၵ်ႉၵၢၼ်ၵေႃႇသၢင်ႈ မိူၼ်ၼင်ႇ – လဵၵ်းၸိူဝ်းၼႆႉ ၶၢတ်ႇဝႆႉလႄႈ ၵၢၼ်ၵေႃႇသၢင်ႈၼႂ်း မိူင်းၵမ်ႈၽွင်ႈၵေႃႈ လႆႈၵိုတ်းယင်ႉဝႆႉ ၼႆယဝ်ႉ။

လိူဝ်ၼၼ်ႉ ၾၢႆႇႁွင်ႈၵၢၼ်ၶႃႈႁၢပ်ႇၵၢၼ် တႂ်ႈသိုၵ်းမၢၼ်ႈယိုတ်းမိူင်းၶဝ် ယင်းႁူမ်ႈၵၼ်တင်ႈၵဵတ်ႉလၢၼ်ႇပႂ်ႉ တီႈတၢင်းဢွၵ်ႇဝဵင်းတႃႈၶီႈလဵၵ်း ႁိမ်းဝၢၼ်ႈမၢၵ်ႇယၢင်းၼၼ်ႉသေ ၵူတ်ႇထတ်းႁႄႉႁၢမ်ႈၶူဝ်းၵုၼ်ႇ ၸိူဝ်း တေတေႃႉဢွၵ်ႇၵႂႃႇတၢင်းမိူင်းတႆးပွတ်းဢွၵ်ႇလႄႈ ပွတ်းႁွင်ႇ ၸိူဝ်းၼၼ်ႉထႅင်ႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈ ဝဵင်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄဝႃႈ -“လုၵ်ႉတီႈတႃႈၶီႈလဵၵ်းသေ တေႃႉၶူဝ်းၵုၼ်ႇ သင်ဢွၵ်ႇၵေႃႈ ဢမ်ႇလႆႈ ဢမ်ႇငၢႆႈမိူၼ်ၵဝ်ႇယဝ်ႉ။ တေႃႈၼင်ႇ ၵူၼ်းၵေႃႈ ယင်းဢမ်ႇတၢင်ႇလႆႈၼမ် မိူၼ်ဢွၼ်တၢင်း။ ၶူဝ်းၵေႃႈ ပေႃးပဵၼ်ၶူဝ်းၵဝ်ႇၼႆလႆႈယူႇ။ ပေႃးပဵၼ်ၶူဝ်းမႂ်ႇတႄႉ ဢမ်ႇတေႃႉလႆႈ။ ပေႃးယဝ်ႉၸဝ်ႈၵႃးၵဵတ်ႉၶဝ်ၵေႃႈ ဢမ်ႇပေႃးၶႂ်ႈႁပ်ႉၶူဝ်းၵုၼ်ႇသင်”- ဝႃႈၼႆ။

လႆႈႁူႉဝႃႈ ယၢမ်းလဵဝ် ၵူၼ်းႁဵတ်းၵၢၼ်ပၢႆးမၢၵ်ႈမီးလူင် ၸွမ်းလႅၼ်လိၼ်ၶဝ် ႁူပ်ႉတၢင်းယၢပ်ႇ ၼႂ်းၶၵ်ႉၵၢၼ် တေႃႉသူင်ႇၶူဝ်းၵုၼ်ႇ တီႈလႅၼ်လိၼ်တႆး – ထႆး တႃႇၸႅၵ်ႇသူင်ႇၶဝ်ႈၼႂ်းမိူင်းႁူမ်ႈတုမ်ပတ်းပိုၼ်ႉ ၼႆယဝ်ႉ။

တႅမ်ႈ – ၽူၺ်းၼုမ်ႇ