ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ပၢင်တိုၵ်းဢမ်ႇပဵၼ်သေတႃႉ သိုၵ်းမၢၼ်ႈ ယိုတ်းမိူင်း ယိုဝ်းၵွင်ႈလူင် သႂ်ႇၼႂ်းဝၢၼ်ႈလႄႈ ႁိမ်းပၢင်သဝ်းၵူၼ်းပၢႆႈၽေးသိုၵ်း။
သိုၵ်းတဢၢင်း TNLA လူမ်ႇတိုၵ်းပိုတ်းယိုဝ်း သိုၵ်းမၢၼ်ႈ ၼႂ်းၸႄႈဝဵင်းၼွင်ၶဵဝ် တႄႇမိူဝ်ႈလိူၼ်ၵျုၼ်ႊ ပီ 2024 ၼၼ်ႉ ႁိုင်မႃးၶၢဝ်းတၢင်း 6 လိူၼ်ပၢႆ၊ ယၢမ်းလဵဝ် ၼႂ်းဝဵင်းၼွင်ၶဵဝ် ဢမ်ႇမီးပၢင်တိုၵ်းသိုၵ်းသိူဝ်သေတႃႉ သိုၵ်းမၢၼ်ႈ ပိုတ်းယိုဝ်း ၵွင်ႈလူင်ၶိူဝ်းယႂ်း။ ႁဵတ်းႁႂ်ႈၵူၼ်းပၢႆႈၽေးသိုၵ်း ပႆႇႁတ်းပွၵ်ႈၶိုၼ်းႁိူၼ်းယေး။
ယၢမ်းလဵဝ် ပၢင်တိုၵ်းယဵၼ်ဝႆႉမီးၸမ် 2 ဝူင်ႈပၢႆယဝ်ႉသေတႃႉ သိုၵ်းမၢၼ်ႈ ယိုဝ်းၵွင်ႈလူင်ၵႂႃႇတၢင်း ဝၢၼ်ႈၽူၺ်း (ပၢၼ်ႉပူၺ်း)လႄႈ ႁိူၼ်းယေးလူႉၵွႆ။
ၵူၼ်းၸၢႆးပၢႆႈၽေးသိုၵ်း ဝဵင်းၼွင်ၶဵဝ် ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ပၢင်တိုၵ်းတၢင်းၼႆႉ ပဵၼ်ယူႇ 6 လိူၼ်ယဝ်ႉ၊ ယၢမ်းလဵဝ်သမ်ႉ ယဵၼ်ၵႂႃႇတိုၵ်ႉမီး 2 ဝူင်ႈၵူၺ်း ၊ ၾၢႆႇသိုၵ်းမၢၼ်ႈ ၶိုၼ်းယိုဝ်းၵွင်ႈလူင်ၶႂ်ႈဝႃႈ ၵူႈဝၼ်းယဝ်ႉ ၊ တင်းပၢၼ်ႉပူၺ်းၼႆႉ တႄႇဝၼ်းတီႈ 25 ထိုင် 31 ယိုဝ်းၵူႈဝၼ်း” – ဝႃႈၼႆ။
ၵူၼ်းဝၢၼ်ႈလၢႆလၢႆတီႈ လၢႆလၢႆတၢင်း ၸိူဝ်းပၢႆႈၽေးသိုၵ်း မႃးမီးႁိမ်းႁွမ်း ပၢၼ်ႉပူၺ်းၼႆႉ မီး 6 လိူၼ်ယဝ်ႉ တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈမိူဝ်းၸႂ်းၶိုၼ်းႁိူၼ်း ယၢမ်းလဵဝ်သမ်ႉ ယွၼ်ႉပၢင်တိုၵ်းပဵၼ်ဝႆႉ ၸွမ်းဝၢၼ်ႈၸွမ်းသူၼ်လႄႈ ဢမ်ႇၸၢင်ႈဢဝ်မၢၵ်ႇၶဝ်ႈတဝ်ႈၼမ်ႉထႅင်ႈ။
ယၢမ်းလဵဝ် ၵူၼ်းၼႂ်းၸႄႈဝဵင်းၼွင်ၶဵဝ် ဢွၼ်ၵၼ်ပၢႆႈၽေးသိုၵ်းၵႂႃႇမီးဝႆႉတီႈ ႁူင်းၸၢၵ်ႈၵိူဝ်ဝၢၼ် ဢိၼ်းဝႅင်း။ ၵူၼ်းပၢႆႈၽေးသိုၵ်း ဢၼ်မႃးသွၼ်ႈယူႇဝႆႉတီႈ ႁူင်းၸၢၵ်ႈမီး 600 ပၢႆ။ တႄႇဝၼ်းတီႈ 3 ၼႆႉ ၵူၼ်းပိုၼ်ႉတီႈ ဢွၼ်ၵၼ်တႅပ်းဢွႆႈသေ သူင်ႇပၼ်ႁူင်းၸၢၵ်ႈၵိူဝ်ဝၢၼ်။ ႁူင်းၸၢၵ်ႈၵိူဝ်ဝၢၼ် တေတႄႇပိုတ်ႇႁဵတ်းၵၢၼ်ၶိုၼ်း ဝၼ်းတီႈ 6/1/ 2025 ၼႆႉ ဝႃႈၼႆ။
ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၵူၼ်းၵမ်ႈၼမ် ဢွၼ်ၵၼ်မႃးသွၼ်ႈယူႇတီႈႁူင်းၸၢၵ်ႈၵိူဝ်ဝၢၼ်၊ ၵူၼ်းပၢႆႈၽေးသိုၵ်းမႃးသွၼ်ႈယူႇဝႆႉ မီး 600 ပၢႆ ။ ႁူင်းၵိူဝ်ဝၢၼ်ၵေႃႈ မႄးၶိုၼ်းယဝ်ႉ၊ ဢွၼ်ၵၼ်တႄႇ တႅပ်းဢွႆႈယူႇယဝ်ႉ၊ ဝၼ်းတီႈ 6 ၼႆႉ ႁူင်းၸၢၵ်ႈ တေပိုတ်ႇၶိုၼ်းယဝ်ႉ”- ဝႃႈၼႆ။
ဝၼ်းတီႈ 1/1/2025 ယၢမ်းၵၢင်ၼႂ် 1 မူင်း သိုၵ်းမၢၼ်ႈ ယိုဝ်းၵွင်ႈလူင် 4 လုၵ်ႈ မၢၵ်ႇတူၵ်းတိူဝ်ႉႁိူၼ်းယေး တီႈၼႂ်းဝၢၼ်ႈသၢမ်သိူဝ် လူႉၵွႆ 2 လင် ဝႃႈၼႆ။
ပၢင်တိုၵ်း တီႈၸႄႈဝဵင်းၼွင်ၶဵဝ်ၼႆႉ သိုၵ်းမၢၼ်ႈတင်း သိုၵ်းတဢၢင်း TNLA ပိုတ်းယိုဝ်းၵၼ် တင်ႈတႄႇႁၢင်ပီ 2023 မႃး ႁၢၼ်ႉတေႃႇထိုင်ယၢမ်းလဵဝ် ပေႃးၼပ်ႉတူၺ်းၵူၼ်းဝၢၼ်ႈ ဢၼ်လႆႈပၢႆႈၽေးသိုၵ်းၼႆႉ မီးၸမ် 20 ဝၢၼ်ႈယဝ်ႉ။
ၵူၼ်းမိူင်း ၸိူဝ်းမီးႁႅင်းငိုၼ်းတႄႉ ပၢႆႈၵႂႃႇတၢင်းဝဵင်းလိူဝ်ႇ၊ ဝဵင်းပၢင်ႇဢူႈလူင်(ပၢင်ႁူႈ) ၸိူဝ်းဢမ်ႇမီးႁႅင်းငိုၼ်းတႄႉ မၢင် ၸိူဝ်း ပၢႆႈၵႂႃႇတၢင်းႁူင်းၸၢၵ်ႈၵိူဝ်ဝၢၼ်၊ ၸွမ်းဝတ်ႉဝႃးၽႃသိူဝ်ႇလႄႈ ပၢႆႈၵႂႃႇယူႇတၢင်း ဝၢၼ်ႈသၢမ်သိူဝ် ၸိူဝ်းၼၼ်ႉၵေႃႈ မီးတင်းၼမ်။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ