ၼႂ်းႁူဝ်ပီ 2025 လိူၼ်ၵျႅၼ်ႊၼိဝ်ႊရီႊၼႆႉ သိုၵ်းၵဝ်ႈၵၢင်ႉ MNDAA တေတႄႇၵဵပ်းၵႃႈၾႆးၾႃႉလႄႈ ၶွၼ်ႇယုၵ်းယၢၵ်း တီႈၵူၼ်းမိူင်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇယဝ်ႉ ဝႃႈၼႆ။
ၼၢင်းယိင်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ -“တီႈႁိူၼ်းႁဝ်းတႄႉ ၾႆးၾႃႉပႆႇလႆႈ။ ႁိူၼ်းပိူၼ်ႈ ၵမ်ႈၽွင်ႈတႄႉ လႆႈယဝ်ႉ။ ၼႂ်းႁူဝ်ပီၼႆႉ တေတႄႇၵဵပ်းၵႃႈမီႊတိူဝ်ႊၾႆး (Meter) ဝႃႇ၊ ၵႃႈၶွၼ်ႇယုၵ်းယၢၵ်းၵေႃႈ ၶဝ်တေၵဵပ်းယဝ်ႉ”- ဝႃႈၼႆ။
ယွၼ်ႉပၢင်တိုၵ်းသေ သဝ်းၾႆးၾႃႉ ႁူင်းၽႄၸႅၵ်ႇၸၢႆႇၾႆးၾႃႉ လူႉၵွႆၵႂႃႇတင်းၼမ်။ သိုၵ်းၵဝ်ႈၵၢင်ႉ ၶိုၼ်းမႄးၵေႃႇၵုမ်းသေ ၶိုၼ်းၸႅၵ်ႇၸၢႆႇပၼ်ၵူၼ်းမိူင်း ဝဵင်းလႃႈသဵဝ်ႈ ၸႂ်ႉတိုဝ်းလႆႈၶိုၼ်း မိူဝ်ႈၼႂ်းလိူၼ်သႅပ်ႊထႅမ်ႊပိူဝ်ႊ 2024 ပူၼ်ႉမႃး။ ၸိူဝ်းပဵၼ်တီႈ ဢၼ်တေႃႇသၢႆၾႆးယဝ်ႉ ၸိူဝ်းၼၼ်ႉ လႆႈၸႂ်ႉတိုဝ်းၾႆးၾႃႉ ၶိုၼ်းယဝ်ႉသေတႃႉ တေႃႇထိုင်ယၢမ်းလဵဝ် ပႆႇၵဵပ်းငိုၼ်းၵႃႈၸႂ်ႉၾႆး။ ၸင်ႇတေတႄႇၵဵပ်း ၼႂ်းလိူၼ်ၵျႅၼ်ႊ ၼိဝ်ႊရီႊၼႆႉ။ တေၵဵပ်းၼိုင်ႈယူႊၼိတ်ႊ 1,500 ပျႃး ဝႃႈ ၼႆ။
ၼၢင်းယိင်း ၵူၼ်းၵႃႉယူႇဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ပေႃးတေၵဵပ်းၵႃႈမီႊတိူဝ်ႊ ၾႆးၾႃႉၵေႃႈ ထုၵ်ႇလႆႈၸႅၵ်ႇၾႆးၾႃႉပၼ်ၵူႈႁိူၼ်းယဝ်ႉ ၸင်ႇၵဵပ်းၼႆႉတေလီ။ လူဝ်ႇႁႂ်ႈၾႆးလႅင်း ၵူႈႁိူၼ်း ဢၼ်လႆႈလႄႈ ဢၼ်တေလႆႈပၼ် ၸင်ႇတေၽဵင်ႇၵၼ်။ ၵူၼ်းဝၢၼ်ႈၵူၼ်းမိူင်းၵေႃႈ ပေႃးၾႆးမႃး ၸင်ႇၸၢင်ႈ ႁဵတ်းၵၢၼ်ႁႃၵိၼ်လဵင်ႉတွင်ႉလီလီ။ ယွၼ်ႉဝႃႈ တီႈၼႆႉဢမ်ႇၵႃး ၵႃႈၾႆးၵူၺ်း ၵႃႈၶၢတ်ႈႁွင်ႈ၊ ၵႃႈၼမ်ႉ၊ ၵႃႈၶွၼ်ႇၶူဝ်းၵုၼ်ႇ ၸိူဝ်းၼႆႉလႆႈပၼ်ၼမ်ၼႃႇ။ ၸင်ႇဝႃႈ ၶၼ်ၵုၼ်ႇၶိုၼ်ႈယိုၵ်ႈယိုၵ်ႈယဝ်ႉ။ ၵမ်းၼႆႉသမ်ႉဝႃႈ တေၵဵပ်းၶွၼ်ႇယုၵ်းယၢၵ်းထႅင်ႈ”- ဝႃႈၼႆ။
ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇတွင်ႈထၢမ်တီႈၽူႈၶၢၼ်ပၢၵ်ႇ ၽူႈမီးပုၼ်ႈၽွၼ်း တီႈတပ်ႉသိုၵ်းၵဝ်ႈၵၢင်ႉၵေႃႈ ၵပ်းသိုပ်ႇဢမ်ႇလႆႈ။
ယၢမ်းလဵဝ် တီႈဝဵင်းလႃႈသဵဝ်ႈ ပေႃးပဵၼ်ၵႃး လႆႈပၼ်ၶွၼ်ႇ တႃႇၼိုင်ႈပီ။ ပေႃးပဵၼ်ၶူဝ်းၵုၼ်ႇ ၶဝ်တေတူၺ်း တင်းၼမ်တင်းဢေႇမၼ်းသေ လႆႈပၼ် 10 ပုၼ်ႈ 1 ပုၼ်ႈ။ တီႈတၢင်းၶဝ်ႈဝဵင်းၵေႃႈ လႆႈပၼ်ၶွၼ်ႇၵႃး 1,000 ထိုင် 5,000 ပျႃး။
ၽႅၼ်ယၼ်ႇသိုၵ်း 1027 ပွၵ်ႈၵမ်း 2 သိုၵ်းၵဝ်ႈၵၢင်ႉ တႄႇၶဝ်ႈတိုၵ်းဝဵင်းလႃႈသဵဝ်ႈ မိူဝ်ႈဝၼ်းတီႈ 02/07/2024 ယၢမ်းၵၢင်ၶိုၼ်း 11:45 မူင်းသေ ထိုင်မႃးဝၼ်းတီႈ 03/10/2024 ပိုၼ်ၽၢဝ်ႇဝႃႈ ယိုတ်းလႆႈ ဝဵင်းလႃႈသဵဝ်ႈလီငၢမ်း။
ပီ 2024 ၼႂ်းလိူၼ်ဢွၵ်ႊထိူဝ်ႊပိူဝ်ႊၼၼ်ႉ ၽႅၼ်ယၼ်ႇသိုၵ်း 1027 ၶွပ်ႈတဵမ်ပီ သိုၵ်းမၢၼ်ႈ ပွႆႇမၢၵ်ႇတီႈ ႁူင်းၸၢၵ်ႈၾႆး ၾႃႉ ဝၢၼ်ႈၼမ်ႉမေႃႇလႄႈ ႁူင်းၸၢၵ်ႈၾႆးၾႃႉ ၼႃးမၢၵ်ႇၶေႃ လူႉၵွႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ