ႁူဝ်ပီ 2025 ၼႆႉ သိုၵ်းမၢၼ်ႈ ပလိၵ်ႈမၢၼ်ႈ ၸိူဝ်းပႂ်ႉၸွမ်းလႅၼ်ၶႅၼ်ႈ ၸိုင်ႈတႆးပွတ်းၸၢၼ်းလႄႈ ပွတ်းဢွၵ်ႇ ၵူတ်ႇထတ်းထဵတ်ႈထၢမ်ၵူၼ်းမိူင်း ၸိူဝ်းတေလတ်းၶၢမ်ႈၶူဝ်တႃႈၵေႃႈ ၶဝ်ႈၸူးမိူင်းတႆးပွတ်းဢွၵ်ႇၼၼ်ႉ ႁၢဝ်ႈႁႅင်း။

ၼႂ်းၼၼ်ႉ သင်ပဵၼ်ၸၢဝ်းၶိူဝ်းတဢၢင်း၊ ၶၢင်၊ ၵဝ်ႈၵၢင်ႉ ၸိူဝ်းၼႆႉ ယိင်ႈၶႅၼ်းၺႃးၵူတ်ႇထတ်းသေ ၵမ်ႈၼမ် ပေႃးလႆႈထွႆလင်ပွၵ်ႈမိူဝ်းၶိုၼ်းၵေႃႈမီး။ ပႆႇဝႃႈၵူၼ်းတၢင်ႇတီႈသီႇလႅၼ်၊ ၵူၼ်းၼႂ်းပိုၼ်ႉတီႈ ၵူၺ်းၵေႃႈ ပေႃးပဵၼ်ၸၢဝ်းၶိူဝ်း ၸိူဝ်းဝႃႈမႃးၼၼ်ႉ – သိုၵ်းမၢၼ်ႈ ၵူတ်ႇထတ်းဢမ်ႇပၼ်သုၼ်ႇၵႂႃႇတႂ်ႈမိူဝ်းၼိူဝ် ဝႃႈၼႆ။

ယၢမ်းလဵဝ်သမ်ႉ မႅၼ်ႈၽွင်းၵူၼ်းမိူင်းတီႈၸမ်တီႈၵႆ ဢဵၼ်းဢၢၼ်းႁွတ်ႈထိုင် ပၢင်ႁူမ်ႈၸူမ်းဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၶွပ်ႈတဵမ် 61 ပီ ဢၼ်တေထိုင်ဝၼ်းတီႈ 5/1/2025 ၼႆႉ။ ၵူၼ်းမိူင်း ဢွၼ်ၵၼ်လိုဝ်ႈၵၢၼ်လိုဝ်ႈငၢၼ်း ဢွၵ်ႇတၢင်းလတ်းၸူး မိူင်းၽူင်း ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၼပ်ႉႁူဝ်ႁဵင်။ ၵူၺ်းၵႃႈ မၢင်ၸိူဝ်း ဢမ်ႇၸၢင်ႈလတ်းၶၢမ်ႈ ၼမ်ႉၶူင်းတီႈၶူဝ်တႃႈၵေႃႈ ဢၼ် မီးၼႂ်းၵႄႈၵႃလီႉ – မိူင်းပဵင်းၼၼ်ႉ ၵႃးမွၵ်ႈ 7 လမ်းၼႆႉ လႆႈပွၵ်ႈၶိုၼ်းၼႆ ၽူႈၸမ်ၸႂ်ၸဝ်ႈၵႃး ၵေႃႉၼိုင်ႈ လၢတ်ႈၼႄဝႆႉၼင်ႇၼႆ

“ပေႃးဝႃႈပဵၼ် ၵူၼ်းတႆးတၢင်းတူၵ်းၶူင်းႁဝ်းတႄႉ ၶဝ်ပၼ်မႃးယူႇၶႃႈ ပေႃးပဵၼ်ပလွင်ႈၼႄႇ ယဝ်ႉၵေႃႈ ၶၢင်၊ ၵဝ်ႈၵၢင်ႉ ၼႆၸိူဝ်းၼႆႉ ဢမ်ႇပၼ်ၶၢမ်ႈၶူင်း ၸႂ်ႉမိူဝ်းၶိုၼ်းၼႆဢေႃႈ။ ပေႃးပဵၼ် ၸၢဝ်းၶိူဝ်းလဵဝ်ၵၼ် တင်း ဢၼ်တိုၵ်းယိုဝ်းၶဝ် ၼၼ်ႉၼႆ ၶဝ်တိုၼ်းဢမ်ႇပၼ်ၶၢမ်ႈၶူင်း။ တႄႇမႃးၸဵမ်မိူဝ်ႈ မိူဝ်ႈဝၼ်းတီႈ 28 – 29 ပၢႆလိူၼ်တီႊသႅမ်ႊပိူဝ်ႊ 2024 ပုၼ်ႉ ”- ဝႃႈၼႆ။

မိူဝ်ႈၽႅၼ်ယၼ်ႇသိုၵ်း 1027 ပႆႇတႄႇၼၼ်ႉ ၵူၼ်းမိူင်းတႆး တိုၵ်ႉၶဝ်ႈဢွၵ်ႇၵႂႃႇမႃးႁႃၵၼ်လႆႈယူႇ။ ဝၢႆးသေ ၸုမ်းဢူၺ်းလီပွတ်းႁွင်ႇ 3 ၸုမ်း AA – TNLA – MNDAA လေႃႇတိုၵ်းသိုၵ်းမၢၼ်ႈ ႁၢဝ်ႈႁႅင်းသေ ယိုတ်းလႆႈတပ်ႉမၢၼ်ႈ လၢႆတီႈလႄႈ ၵုမ်းလႆႈပႃးလၢႆဝဵင်း ၼႂ်းပွတ်းႁွင်ႇယဝ်ႉ သိုၵ်းမၢၼ်ႈ ႁႃလၢႆးတၢင်း ၵမ်ၵိၼ်းတေႃႇၸုမ်းလုၵ်ႉၽိုၼ်ႉ။

ၵူၼ်းမိူင်း ၸိူဝ်းဢၼ်ယူႇဝႆႉၼႂ်းပိုၼ်ႉတီႈ ဢၼ်ၸုမ်းလုၵ်ႉၽိုၼ်ႉၵုမ်းဝႆႉ ၸိူဝ်းၼၼ်ႉၵေႃႈ လႆႈၶၢမ်ႇတၢမ်ႇသိုၵ်းသိူဝ်ၸွမ်း။ တေႃႈၼင်ႇ ပွႆးၾိင်ႈငႄႈၾိင်ႈထုင်းလႄႈ ပၢင်ပွႆးဢၼ်ၵဵဝ်ႇတင်းသႃႇသၼႃႇ ၵူၺ်းၵေႃႈ ဢမ်ႇၸၢင်ႈႁဵတ်းသၢင်ႈသင်။

မိူၼ်ၼင်ႇ ပၢင်ႁူမ်ၸူမ်းဝၼ်းၵိူတ်ႇ ၸဝ်ႈသိလ်ထမ်းၶူး ဝႃးဝုၼ်းၸုမ်ႉၼႆႉ ၸဵမ်မိူဝ်ႈဝႃႇသႃၸဝ်ႈ တိုၵ်ႉလဵၵ်ႉ ၵူၼ်းမိူင်း မီးၸႂ်သတ်ႉထႃး ယႂ်ႇၼမ်သေ ဢွၼ်ၵၼ်ၵႂႃႇဝႆႈၵႂႃႇသႃ ၵူႈပီ လူၺ်ႈၽႂ်ဢမ်ႇတၢပ်ႈမၵ်း ၶၢၼ်းတဵၵ်းၸႂ်ႉ။

ပွႆးဝၼ်းၵိူတ်ႇ ပီၼႆႉတႄႉ ၵူၼ်းမိူင်းဢမ်ႇၸၢင်ႈၵႂႃႇဝႆႈသႃၶဝ်ႈႁူမ်ႈလူႇတၢၼ်းထၢင်ႇႁၢင်ႈ။ ၼႂ်းမၢႆၾၢင်ၼၼ်ႉ ပေႃးတႅမ်ႈဝႆႉဝႃႈ  ပဵၼ်ၵူၼ်း ဢၼ်ယူႇတၢင်းဝဵင်း ဢၼ်သိုၵ်းၸၢဝ်းၶိူဝ်း ယိုတ်းၵုမ်းလႆႈဝႆႉ ၸိူဝ်းၼၼ်ႉၼႆ ယိင်ႈၶႅၼ်းၺႃးၵူတ်ႇထတ်း။ လိူဝ်ၼၼ်ႉ သင်ပဵၼ်ၸၢဝ်းၶိူဝ်းတဢၢင်း၊ ၶၢင်၊ ၵဝ်ႈၵၢင်ႉ ၸိူဝ်းၼႆႉ ယိင်ႈၶႅၼ်းၺႃးၵူတ်ႇထတ်း လွၵ်ႇငိုတ်ႈႁႄႉႁၢမ်ႈ တိုၼ်းဝႃႈဢမ်ႇပၼ်လတ်းၶၢမ်ႈၶူင်း။

တီႈၶူဝ်တႃႈၵေႃႈၼႆႉ ပေႃးလုၵ်ႉၾင်ႇတၢင်းၸၢၼ်းမႃး တၢင်းပွတ်းဢွၵ်ႇၸိုင် သိုၵ်းမၢၼ်ႈ ပၼ်လတ်းၶၢမ်ႈ တႄႇဢဝ် 3 မူင်း ႁူဝ်ၶမ်ႈထိုင် 6 မူင်း ၊ ပေႃးလုၵ်ႉတၢင်းပွတ်းဢွၵ်ႇၼႆႉၵႂႃႇ ပွတ်းၸၢၼ်းတႄႉ တႄႇပိုတ်ႇပၼ်ၵၢင်ၼႂ် 5 မူင်း ဝႃႈၼႆ။

ယွၼ်ႉတတ်းမၵ်းၶၢဝ်းယၢမ်းဝႆႉ ၸိူင်ႉၼၼ်လႄႈ ရူတ်ႉၵႃးၵူၼ်းမိူင်း ၸိူဝ်းမႃးဝႆႈသႃ ၸဝ်ႈသိလ်ထမ်းဝုၼ်းၸုမ်ႉ လႆႈၵိုတ်းၶမ်ဝႆႉ ပွတ်းတၢင်းၵေႃႈမီး တင်းၼမ်။ ဝၼ်းၵိူတ်ႇ ၸဝ်ႈသိလ်ထမ်း ဝၼ်းတီႈ 5 ၵျႅၼ်ႊၼိဝ်ႊရီႊၵေႃႈ ၸမ်ယဝ်ႉလႄႈ ၸိူဝ်းႁွတ်ႈထိုင် မိူင်းၽူင်းၵေႃႈ ပေႃးၶပ်ႉပေႃးၶိုဝ်းယဝ်ႉၼႆ ၽူႈၶဝ်ႈၸုမ်းပွင်ၵၢၼ် ပၢင်ႁူမ်ၸူမ်းဝၼ်းၵိူတ်ႇ ၸဝ်ႈသိလ်ထမ်း ဝုၼ်ႉၸုမ်ႉ လၢတ်ႈၼႄဝႆႉၼင်ႇၼႆ –

“ရူတ်ႉၼႆႉတႄႉ လႆၶဝ်ႈလႆၶဝ်ႈၼင်ႇၵဝ်ႇၶႃႈဢေႃႈ လုၵ်ႉတၢင်းပွတ်းႁွင်ႇ ပွတ်းၸၢၼ်း မႃးၼၼ်ႉၶႃႈဢေႃႈ။ ရူတ်ႉဢွၼ်ႇရူတ်ႉလူင်ၼႆႉတႄႉ ပေႃးတဵမ်လူင်ဝႆႉယဝ်ႉ။ သုမ်ႉၸိူဝ်းၼႆႉၵေႃႈ ၶႂ်ႈတဵမ်မူတ်းယဝ်ႉ။ ၵူၼ်းၸႃႇၵတၢင်းၵိၼ်ၵေႃႈ တႄႇလဵင်ႉမိူဝ်ႈၼႆႉၵႂႃႇယဝ်ႉၶႃႈ။ မိူဝ်ႈၽုၵ်ႈၼႆႉ တေတၢင်ႇထီးၵွင်းမူး”- ဝႃႈၼႆ။  

ၽွင်းဢွၵ်ႇၶၢဝ်းတၢင်းၵႂႃႇမိူင်းၽူင်းၼၼ်ႉ ၼင်ႇႁိုဝ် တေဢမ်ႇမီးၽေးသင်ၼႆသေ ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈတႆး ပွတ်းဢွၵ်ႇၶူင်း လႆႈပၼ်ၾၢင်ႉဝႆႉလူင်ႈၼႃႈဝႃႈ ႁႂ်ႈၵူၼ်းမိူင်းႁၢင်ႈႁႅၼ်း ဢဝ်ဝႂ်ႁပ်ႉႁွင်း ၾၢႆႇၵဵဝ်ႇၶွင်ႈသေ ၸင်ႇၵႂႃႇၶဝ်ႈႁူမ်ႈ ၼႆယူႇသေတႃႉ ၵူၼ်းၸိူဝ်းဢမ်ႇၾၢင်ႉမႅၼ်ႈ ၶၢဝ်ႇငၢဝ်းတႄႉၵေႃႈ ၺႃးသိုၵ်းမၢၼ်ႈ ၵူတ်ႇထတ်းႁႅင်း သေ မၢင်ၸိူဝ်းၺႃးလွၵ်ႇငိုတ်ႈထႆၵိၼ် ငိုၼ်းၵေႃႈယင်းမီး ဝႃႈၼႆ။

သိုၵ်းတေႃႇသိုၵ်းၼင်ႇၵၼ်တႄႉ ၶိုင်ႁႃလၢႆးတၢင်းၵမ်ၵိၼ်းတေႃႇၵၼ် ႁႃတွပ်ႇတႅၼ်းၵၼ် ၶိုၼ်းယူႇၶိူဝ်းယႂ်းသေတႃႉ ၵူၼ်းမိူင်းတႄႉ ဢမ်ႇမီးတီႈပိုင်ႈတီႈၽူၺ်း။ ဝၢၼ်ႈမိူင်းပဵၼ်သင်မႃးၵေႃႈ ၵႃႈလႆႈၵူမ်ႈႁူဝ် ၶၢမ်ႇယူႇၵူၺ်းလႄႈ သင်ပဵၼ်လႆႈ ၶႂ်ႈႁႂ်ႈဝၢၼ်ႈမိူင်းၸဵဝ်းၵတ်းယဵၼ်ၵူၺ်းယဝ်ႉၼႆ ၵူၼ်းပၢႆႈၽေးသိုၵ်း ယူႇမိူင်းတႆးပွတ်းႁွင်ႇ ၵေႃႉၼိုင်ႈလၢတ်ႈၼင်ႇ ၼႆ။