မိူဝ်ႈဝႃး ဝၼ်းတီႈ 1/1/2025 ယၢမ်းၵၢင်ၶိုၼ်း 11 မူင်းပၢႆ ၶိူင်ႈမိၼ်သိုၵ်းမၢၼ်ႈပွႆႇမၢၵ်ႇ တီႈဝဵင်းသႅၼ်ဝီ တူၵ်းသႂ်ႇႁိူၼ်းယေးၵူၼ်းမိူင်း ဢၼ်မီးၾၢႆႇလင် ႁူင်းႁႅမ်းသႅၼ်ဝီ ဢၼ်မီးၼႂ်း ပွၵ်ႉ 3 ႁိူၼ်းယေးၵူၼ်းမိူင်းလူႉၵွႆ ဝႃႈၼႆ။
ၼၢင်းယိင်း ၵူၼ်းမိူင်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၽွင်းတိုၵ်ႉၼွၼ်းယူႇၼၼ်ႉ ငိၼ်းသဵင်မၢၵ်ႇတူၵ်းပေႃးတူၵ်းၸႂ်တိုၼ်ႇ ၊ မွၵ်ႈ 11 မူင်းပၢႆၼႆႉ မၢၵ်ႇတူၵ်းတီႈၾၢႆႇလင် ႁေႃႇတႄႇသႅၼ်ဝီ၊ တီႈႁိမ်းၼၼ်ႉ မႃးပွႆႇ 3 ပွၵ်ႈယဝ်ႉ”- ဝႃႈၼႆ။
ဢၼ်သိုၵ်းမၢၼ်ႈ မႃးပွႆႇမၢၵ်ႇတီႈႁူင်းႁႅမ်းသႅၼ်ဝီ ၵမ်းၼႆႉ ပဵၼ်ပွၵ်ႈၵမ်း 4 လႄႈ 5 ။ ႁိူၼ်းယေးၵူၼ်းမိူင်း ယွၵ်းယွႆ လူႉၵွႆၵႂႃႇမူတ်း ဝႃႈၼႆ။
ၼၢင်းယိင်း ၵူၼ်းမိူင်းသႅၼ်ဝီ သိုပ်ႇလၢတ်ႈၽူႈတွႆႇႁွၵ်ႈဝႃႈ -“ၶဝ်မႃးပွႆႇ 4-5 ပွၵ်ႈယဝ်ႉ ၵူၺ်းဢမ်ႇတိူဝ်ႉ ႁူင်းႁႅမ်းသေပွၵ်ႈ၊ တူၵ်းတိူဝ်ႉႁိမ်းႁွမ်းမၼ်းၵူၺ်း။ တီႈတႄႉမၼ်း ၵူၼ်းသိုၵ်းၵေႃႈဢမ်ႇယူႇ တီႈႁူင်းႁႅမ်းၼၼ်ႉ။ ႁဵတ်းသင်မႃးပွႆႇတိၵ်းတိၵ်းၵေႃႈ ဢမ်ႇႁူႉ”- ဝႃႈၼႆ။
တီႈဝဵင်းသႅၼ်ဝီၼႆႉ ပၢင်တိုၵ်းယဵၼ်ဝႆႉ မီးၸမ် 2 လိူၼ်ယဝ်ႉလႄႈ ၵူၼ်းမိူင်း ဢွၼ်ၵၼ်ပွၵ်ႈမိူဝ်းမႄးႁိူၼ်း ယေးၶိုၼ်းသေ မိူဝ်းယူႇသဝ်းဝႆႉယူႇၽွင်ႈယဝ်ႉ၊ သိုၵ်းၵဝ်ႈၵၢင်ႉၵေႃႈ သွၼ်ႈယူႇသဝ်း ၼႂ်းပွၵ်ႉၼႂ်းယွမ်ႇၸွမ်းလႄႈ ၵူၼ်းပိုၼ်ႉတီႈ လႆႈၾၢင်ႉယူႇၾၢင်ႉၵိၼ်ဝႆႉ ဝႃႈၼႆ။
ၵူၼ်းပိုၼ်ႉတီႈ လၢတ်ႈဝႃႈ – လႆႈငိၼ်းၶၢဝ်ႇဝႃႈ တီႈႁူင်းႁႅမ်းသႅၼ်ဝီၼၼ်ႉ မီးၸၢဝ်းၶႄႇ မႃးပိုတ်ႇႁူင်းမိပ်ႇၼူတ်ႈလႄႈ သိုၵ်းမၢၼ်ႈ ၸင်ႇၵႆႉမႃးပွႆႇမၢၵ်ႇသႂ်ႇ – ဝႃႈၼႆသေတႃႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ် တိတ်းတေႃႇၸူး ၸုမ်းသိုၵ်းၵဝ်ႈၵၢင်ႉၵေႃႈ ၵပ်းသိုပ်ႇတိတ်းတေႃႇဢမ်ႇလႆႈ။
ၼၢင်းယိင်း ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“တီႈသႅၼ်ဝီႁဝ်းၶႃႈၼႆႉ သိုၵ်းမၢၼ်ႈ ဢမ်ႇမႃးပွႆႇမၢၵ်ႇ ႁိုင်ၼႃႇယဝ်ႉ။ ၸင်ႇႁႃယူႇၵျေႃႇမူၼ်ႈသိူဝ်းမႃးဢိတ်းၼိုင်ႈၵူၺ်း။ ၵမ်ႈၽွင်ႈ တိုၵ်ႉမႃးမႄးႁိူၼ်းယေး တႃႇၶိုၼ်းမႃးယူႇ ၼႆယူႇ။ ယၢမ်းလဵဝ် ၶဝ်သမ်ႉၵိုင်ႉၵၢင်ႉ ၶိုၼ်းမႃးပွႆႇမၢၵ်ႇလႄႈ သမ်ႉပေႃးလႆႈၵူဝ် မႃးၶိုၼ်းယဝ်ႉ။ တီႈသႅၼ်ဝီၼႆႉတႄႉ ယၢမ်းလဵဝ် ပေႃးဢမ်ႇမီးၵၢၼ်ဝႆႉတႄႉ ဢမ်ႇၸၢင်ႈယူႇယဝ်ႉ။ ၶၼ်ၵုၼ်ႇၶိုၼ်ႈသုင် ႁႅင်းၼႃႇ။ ၵုၼ်ႇမၢင်ၸိူဝ်းၼႆႉ ၶၢႆၵႃႈယႂ်ႇလိူဝ်သေ တီႈဝဵင်းတႃႈၶီႈလဵၵ်းလူးၵွၼ်ႇ”- ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 25/10/2024 ယၢမ်းၵၢင်ၶမ်ႈ 8 မူင်းပၢႆ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇ တီႈဝၢၼ်ႈၵွင်းႁေႃ ၼႂ်းဝဵင်းသႅၼ်ဝီ ၼၼ်ႉၵေႃႈ တိူဝ်ႉၺႃး ၵူၼ်းမိူင်းမၢတ်ႇၸဵပ်း 6 ၵေႃႉ။ ၼႂ်းၼၼ်ႉ တႃႇ 4 ၵေႃႉ လႆႈတိူဝ်ႉမၢတ်ႇ ၸဵပ်းႁႅင်း။
သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA ႁူမ်ႈၵၼ် ပိုတ်ႇၼႃႈသိုၵ်း ၽႅၼ်ယၼ်ႇသိုၵ်း 1027 သေ လေႃႇတိုၵ်း တပ်ႉသိုၵ်းမၢၼ်ႈမႃး ၶွပ်ႈတဵမ်ပီ ၼႂ်းဝၼ်းတီႈ 27 လိူၼ်ဢွၵ်ႊထူဝ်ႊပိူဝ်ႊ ပီ 2024 ။
သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇ ယိုတ်းၵုမ်းလႆႈဝဵင်းသႅၼ်ဝီ မိူဝ်ႈဝၼ်းတီႈ 7 လိူၼ်ၵျႅၼ်ႊၼိဝ်ႊရီႊ 2024 ။ ဝၢႆး ၼၼ်ႉ ပၢင်တိုၵ်းဢမ်ႇပဵၼ်သေတႃႉ သိုၵ်းမၢၼ်ႈၵမ်းၵမ်းမႃးပွႆႇမၢၵ်ႇ။ ထိုင်တီႈၵူၼ်းမိူင်း ဢမ်ႇၸၢင်ႈယူႇတီႈႁိူၼ်းယေးသေ လႆႈဢွၼ်ၵၼ်ပၢႆႈၵႂႃႇသွၼ်ႈယူႇတၢင်ႇတီႈတၢင်ႇဝဵင်း။ ဝၢႆးၼၼ်ႉ ဢမ်ႇႁိုင် သိုၵ်းၵဝ်ႈၵၢင်ႉပိုၼ်ၽၢဝ်ႇ တႄႇပၼ်ႇ ၵၢၼ်ၽွင်းငမ်းႁင်းၶဝ် တီႈဝဵင်းသႅၼ်ဝီမႃး။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ