ၸုမ်းဢူၺ်းလီသိုၵ်းပွတ်းႁွင်ႇ 3 ၸုမ်း သိုၵ်းၶႄႇၵဝ်ႈၵၢင်ႉ MNDAA သိုၵ်းရၶႅင်ႇ AA တင်း သိုၵ်းတဢၢင်း ပလွင်ႈ TNLA ႁူမ်ႈပၼ်ပိုၼ်ၽၢဝ်ႇ တႄႇပၢင်ယၼ်ႇသိုၵ်း 1027 မိူဝ်ႈပီ 2023 လိူၼ်ဢွၵ်ႇထူဝ်ႊပိူဝ်ႊ ဝၼ်း တီႈ 27 ယၢမ်းၵၢင်ၼႂ် 4 မူင်း။ တႄႇလူမ်ႈတိုၵ်း ဝဵင်းၼမ်ႉၽႃႈ ၶျိၼ်းသူၺ်ႇႁေႃႇ ။ ပွႆႇမၢၵ်ႇလၼ်ႇၶူဝ် ယႃႉသဵၼ်ႈတၢင်း ၼႂ်းၵႄႈ သႅၼ်ဝီ၊ ၵုၼ်လူင်၊ ႁူဝ်ပၢင်ႇ ။

ၶၢဝ်းတၢင်း 2 လိူၼ်ပၢႆပၢႆ သိုၵ်းၶႄႇ ၵဝ်ႈၵၢင်ႉ ယိုတ်းလႆႈ ၼႃႈလိၼ်ၽွင်းငဝ်းတူဝ်ႇၵဝ်ႈၵၢင်ႉ ဢၼ်ပဵၼ် ၸႄႈဝဵင်း ၵၢတ်ႇၵဝ်ႇ လၢဝ်ႇၵၢႆး ၸႄႈဝဵင်းၵွင်းၸၢင်ႉ ၵုင်းၵျၢၼ်း သေဢမ်ႇၵႃး ယိုတ်းလႆႈပႃး ၸႄႈဝဵင်း ၵုၼ်လူင် ၸႄႈဝဵင်းသႅၼ်ဝီ ၸႄႈဝဵင်းၵူတ်ႉၶၢႆ ၾၢၵ်ႇတၢင်းဢွၵ်ႇ ဢၼ်မီး ထုင်ႉမိူင်းငႅၼ်း မိူင်းၸီး ယိုတ်း ပႃး ဝဵင်းမိူင်းၵူဝ်း ၵိဝ်ႇၵူတ်ႉပၢင်ႇသၢႆး။

ဝၼ်းတီႈ 27 ဢွၵ်ႊထူဝ်ႊပိူဝ်ႊ ထိုင် ဝၼ်းတီႈ 11 လိူၼ်ၵျၼ်ႊၼိဝ်ႊရီႊ ႁူဝ်ပီ 2024 ၶၢဝ်းတၢင်းမွၵ်ႈ 70 ဝၼ်း ၵူၺ်း သိုၵ်းမၢၼ်ႈ ၵၢၼ်ႉငဝ်ႈငုၼ်းၵုမ်းၵမ်ယၼ်ႇသိုၵ်း ၸၵၶ 16 သႅၼ်ဝီ လႄႈ ၻၵၸ လၢဝ်ႇၵၢႆး ဢၼ်ၵုမ်းၵမ် တပ်ႉၵွင် 20 တပ်ႉၵွင်ၼၼ်ႉ လႆႈယွမ်းၵၢၼ်ႉသိုၵ်း မၢင်ၸိူဝ်းတၢႆ မၢၵ်ႇၸိူဝ်းမၢၼ်ႇ မၢင်ၸိူဝ်းလႆႈပဵၼ် ၽူႈယွမ်းသိုၵ်း မၢင်ၸိူဝ်းပၢႆႈလိပ်းပၢႆႈတၢႆ ဢွၵ်ႇယၢၼ်ပိုၼ်ႉတီႈ။

ၽွင်းၼၼ်ႉၶၢဝ်းလဵဝ် သိုၵ်းလွႆတဢၢင်းပလွင်ႈသမ်ႉ လူမ်ႇယိုဝ်း ၸႄႈဝဵင်းၼမ်ႉတူႈ ၼမ်ႉသၼ်ႇ မၢၼ်ႈ တူင်ႈ ၼမ်ႉၶမ်း ၵူတ်ႉၶၢႆ သိုၵ်းမၢၼ်ႈ ယွမ်းၵၢၼ်ႉ လႆႈထွၼ်ႇဢွၵ်ႇပၼ်သဵင်ႈသဵင်ႈသဵင်ႈ ။ ယိုတ်းလႆႈပႃး ၵိင်ႇၸႄႈဝဵင်းမိူင်းငေႃႉ ၵိင်ႇၸႄႈဝဵင်းမိူင်းလူင်။

ၸိူင်ႉၼၼ် ၼင်ႇၵဝ်ႇ သိုၵ်းရၶႅင်ႇ ဢေႇဢေႇၵေႃႈ လေႃႇတိုၵ်း သိုၵ်းမၢၼ်ႈ တွၼ်ႈၼႃႈ တၢင်းတူၵ်း ၸႄႈဝဵင်း ပလႅတ်ႉဝႃႉ ၼႂ်းၸႄႈမိူင်းၶျၢင်းသေ ဢမ်ႇၵႃး သူင်ႇႁႅင်းသိုၵ်းၶႂၢၵ်ႈမင် ၼႂ်းၸႄႈမိူင်းရၶႅင်ႇ တွၼ်ႈတၢင်းဢွၵ်ႇ ၸဵင်ႇၼိူဝ် လေႃႇတိုၵ်း ယိုတ်းဢဝ် ဝဵင်းယဝ်ႉဝဵင်း။

ဢိင်ဢဝ်ပၢင်ယၼ်ႇသိုၵ်း 1027 ပဵၼ်ႁႅင်းၸႂ်သေ သိုၵ်းယၢင်းလႅင် လၢႆလၢႆၸုမ်းၵေႃႈ ၶွၼ်ႈႁႅင်းၵၼ် တႄႇ ပၢင်ယၼ်ႇသိုၵ်း 1111 လိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 11 ၊ ပိုတ်ႇၼႃႈသိုၵ်း လေႃႇတိုၵ်း သိုၵ်း မၢၼ်ႈ ၼႂ်းၸႄႈမိူင်းယၢင်းလႅင်။

ဢိင်ၶေႃႈပိုၼ်ၽၢဝ်ႇ သိုၵ်းယၢင်းလႅင် မိူဝ်ႈလိူၼ်မၢတ်ႉၶျ် ဝၼ်းတီႈ 23 ပီ 2024 ၼႆႉသေ လႆႈႁူႉဝႃႈ သိုၵ်း ယၢင်း လႅင် ႁူမ်ႈၵၼ် ယိုတ်းလႆႈ ဝဵင်းမႄႈၸေႉ တီးမေႃးသူဝ်ႇ ယႂႃႇတိတ်ႉ သျှႃးတေႃး မေႃႇၶျီး ၼမ်ႉမႄႈၶုၼ် ပႃးၸဵမ် ၸႄႈဝဵင်းၾၢႆၶုၼ် မိူင်းပၢႆး တွၼ်ႈၼႂ်းမိူင်းတႆး ပွတ်းၸၢၼ်း ။

ငဝ်းလၢႆးၼင်ႇၼၼ် ၸုမ်းသိုၵ်း ၵႅတ်ႇၶႄႇပိုၼ်ႉတီႈ တၢင်းၸႄႈၵႅင်းၵေႃႈ လေႃႇတိုၵ်းသိုၵ်းမၢၼ်ႈ ႁၢဝ်ႈ ႁႅင်း။ ၶျၢင်းၵေႃႈ ၶွၼ်ႈႁႅင်းၵၼ် လေႃႇတိုၵ်း သိုၵ်းမၢၼ်ႈ ဢၼ်ပၵ်းယူႇမိူင်းၶျၢင်း ႁၢဝ်ႈႁႅင်း။ ၸႄႈမိူင်း ၶျၢင်း မီးယူႇ 9 ၸႄႈဝဵင်းၼၼ်ႉ သိုၵ်းၶျၢင်း ပိုၼ်ၽၢဝ်ႇဝႃႈ ၼွၵ်ႈသေ ၼႂ်းတူဝ်ဝဵင်း ပိုၼ်ႉတီႈ မိူင်းၶျၢင်း တင်းသဵင်ႈ 75% ၼၼ်ႉ ၶဝ်ယိုတ်းလႆႈဝႆႉသဵင်ႈယဝ်ႉဝႃႈၼႆ။ ၽွင်းၼင်ႇၼၼ် ယၢင်းၽိူၵ်ႇ ၵေႃႈ လေႃႇ တိုၵ်း ယိုတ်းဢဝ်ပိုၼ်ႉတီႈ ၼႂ်းၸႄႈမိူင်းယၢင်းၽိူၵ်ႇလၢႆလၢႆတိုၵ်း လေႃႇတိုၵ်း သိုၵ်းမၢၼ်ႈ ထိုင် ဝဵင်းမျႃႉ ဝတီႇ။

ၽွင်းၼင်ႇၼၼ် ဝၼ်းတီႈ 11 မိူင်းၶႄႇ ႁႅတ်းၵႄႇယူႇၵၢင်သေ မွၵ်ႇႁွင်ႉ တူဝ်တႅၼ်း သိုၵ်းမၢၼ်ႈ တင်း တူဝ်တႅၼ်း သိုၵ်းတဢၢင်းပလွင်ႈ လႄႈ တူဝ်တႅၼ်း သိုၵ်းၶႄႇ ၵဝ်ႈၵၢင်ႉ တီႈႁူင်းႁႅမ်း သူၼ်မွၵ်ႇ ႁၢႆႊၵိူင်ႊ တီႈဝဵၼ်းၶုၼ်ႊမိင်ႊသေ ၸႂ်ႉႁႂ်ႈ သွင်ၾၢႆႇၵိုတ်းၵၢၼ်တိုၵ်းတေႃးၵၼ်။

မိူဝ်ႈသိုၵ်း TNLA လႄႈ MNDAA လိုဝ်ႈၵိုတ်း ပၢင်ယၼ်ႇသိုၵ်း 1027 ယဝ်ႉဢမ်ႇႁိုင် ၼႂ်းလိူၼ်လဵဝ်ၵၼ် သိုၵ်းမၢၼ်ႈ လူမ်ႇယိုဝ်းၵႃး တၢင်ႇၵွင်ႈ တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈပဢူဝ်း PNLA တီႈဝၢၼ်ႈၸၢမ်ၽူး ၸႄႈဝဵင်းႁူဝ်ပူင်း မိူဝ်ႈႁူဝ်ပီ 2024 လိူၼ်ၵျၼ်ႊၼိဝ်ႊရီႊ ဝၼ်းတီႈ 21 ၼၼ်ႉလႄႈ သွင်ၾၢႆႇလႆႈပဵၼ်ပၢင် တိုၵ်း ထိုင်တီႈ ပေႃးၶဝ်ႈလိုပ်ႈလမ်းတိုၵ်းတေႃး သိုၵ်းမၢၼ်ႈ ဢွၵ်ႇသေ ယိုတ်းလႆႈ ဝဵင်းသီႇ ၵႂႃႇၸူဝ်ႈၶၢဝ်း။

ၾၢႆႇတၢင်းမိူင်းၶၢင် သမ်ႉ လိူၼ်မၢတ်ႉဝၼ်းတီႈ 7 သိုၵ်းၶၢင် လႄႈ သိုၵ်း PDF ၶၢင် ပိုၼ်ၽၢဝ်ႇ ပၢင်ယၼ်ႇ သိုၵ်း 0307 လေႃႇတိုၵ်းသိုၵ်းမၢၼ်ႈႁၢဝ်ႈႁႅင်းႁႅင်း။ ၽွင်းၼင်ႇၼၼ် တၢင်းမိူင်းတႆး ပွတ်းႁွင်ႇ သိုၵ်းမၢၼ်ႈ ၵေႃႈ သူင်ႇႁိူဝ်းမိၼ် ပွႆႇမၢၵ်ႇ ဢမ်ႇထၢတ်ႇ ၾၢႆႇၸုမ်းဢူၺ်းလီသိုၵ်း ပွတ်းႁွင်ႇ ၵေႃႈ ဝၵ်ႉဢဝ် တိုဝ်ႉတၢင်း ၵိုတ်းသိုၵ်းသေ မႄႇၶႂၢၵ်ႈ ၼႃႈသိုၵ်း။ ၵဝ်ႉၼႄးၵႃ ၵႃၼႄးၵဝ်ႉ ပိၼ်ႇၼႄးၵၼ်တၢင်းသွင်ၾၢႆႇ။ ထိုင်မႃး လိူၼ်ၵျုၼ်ႊဝၼ်းတီႈ 25 ထိုင်တီႈ ပိုတ်ႇၼႃႈသိုၵ်း တႄႇပၢင်ယၼ်ႇသိုၵ်း ႁွပ်ႈၵမ်း 2 ၶိုၼ်း။

ၾၢႆႇသိုၵ်းၶႄႇ ၵဝ်ႈၵၢင်ႉ သူင်ႇႁႅင်းသိုၵ်း လူမ်ႇတိုၵ်း ငဝ်ႈငုၼ်းသိုၵ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ ရပၶ ၵူၼ်ႇပင်းသေ ယိုတ်းလႆႈ ဝဵင်းလႃႈသဵဝ်ႈ မိူဝ်ႈဝၼ်းတီႈ 3 ဢေႃႊၵၢတ်ႉသ်။ ၼႂ်းပိုၼ်းၶၢဝ်းတၢင်း လုၵ်ႉၽိုၼ်ႉ 70 ပီ လႆႈဝႃႈ သိုၵ်းမၢၼ်ႈ သုမ်းယႂ်ႇသုမ်းလူင်။ ပၢင်ယၼ်ႇသိုၵ်း ႁွပ်ႈၵမ်းသွင်ၼႆႉ သိုၵ်းလွႆၵေႃႈ ယိုတ်း လႆႈ ဝဵင်းမိူင်းၵုတ်ႈ မိူင်းမိတ်ႈ ၼွင်ၶဵဝ် ၵျွၵ်ႉမႄး တၢင်း ဝဵင်းသီႇပေႃႉထႅင်ႈ။

ၶၢဝ်းတၢင်း ပၢင်ယၼ်ႇသိုၵ်း 1027 ၼႆႉ မိူင်းၶႄႇ ၶတ်းၸႂ်ၶဝ်ႈၵႄႈ ႁွင်ႉၸုမ်းသိုၵ်းမၢၼ်ႈ တင်း ၸုမ်းဢူၺ်း လီသိုၵ်းပွတ်းႁွင်ႇ ဢုပ်ႇၵၼ် 6 ပွၵ်ႈ သေတႃႉ ဢမ်ႇလႆႈၶေႃႈလႆႈသဵင်သင်။ ၽွင်းၼင်ႇၼၼ် တၢင်းၸႄႈမိူင်းရၶႅင်ႇ ဢၼ်တႄႇ ပၢင်ယၼ်ႇသိုၵ်း 1027 ၸွမ်းမိူဝ်ႈလဵဝ်ၵၼ်ၼႆႉ ၶၢဝ်းတၢင်း ပီၵွႆး ၼႂ်းၸႄႈမိူင်းရၶႅင်ႇ မီး 17 ၸႄႈဝဵင်းၼၼ်ႉ သိုၵ်းဢႃရတ်ႉၶ ယိုတ်းလႆႈ 14 ၸႄႈဝဵင်း။ ယင်းပႆႇသွၼ်ႇ ပႃး ၸႄႈဝဵင်းပလႅတ်ႉဝႃႉ ဢၼ်ယူႇၼႂ်းၸႄႈမိူင်းၶျၢင်း ပွတ်းတႂ်ႈ ထုင်ႉတိတ်းဢိူမ်ႈမိူင်း ရၶႅင်ႇ ဢၼ်သိုၵ်း ဢေႇဢေႇ ယိုတ်းလႆႈ ၸဵမ်မိူဝ်ႈ ႁၢင်ပီ 2023။

ပေႃးႁုပ်ႈသေ လၢတ်ႈၵေႃႈ ၶၢဝ်းတၢင်း ပၢင်ယၼ်ႇသိုၵ်း 1027 ၼႆႉ သိုၵ်းမၢၼ်ႈ သုမ်းၵၢၼ်ႉ တိူင်းသိုၵ်း ရမၶ လႃႈသဵဝ်ႈ ဢၼ်မီးၼႂ်းမိူင်းတႆးပွတ်းႁွင်ႇ လႄႈ တိူင်းသိုၵ်းဝၼ်းတူၵ်း ၼပၶ ဢၼ်ပၵ်း တီႈဝဵင်း ဢၢမ်း ဢၼ်သိုၵ်းရၶႅင်ႇ တိုၵ်ႉယိုတ်းလႆႈ မိူဝ်ႈဝၼ်းတီႈ 20/12/2024 ပူၼ်ႉမႃးၼႆႉ။

ၶၢဝ်းတၢင်းပၢင်ယၼ်ႇသိုၵ်းၼႆႉ သိုၵ်းမၢၼ်ႈ သုမ်းၵၢၼ်ႉ ငဝ်ႈငုၼ်းၵုမ်းၵမ်ၵၢၼ်သိုၵ်း ၼႂ်းမိူင်းတႆး တၵၸ လၢဝ်ႇၵၢႆး ၸၵသ သႅၼ် ဝီ။ တၢင်းမိူင်းရၶႅင်ႇၵေႃႈ သိုၵ်းမၢၼ်ႈ သုမ်းၵၢၼ်ႉ 3 ငဝ်ႈငုၼ်းၵုမ်းၵၼ် ၵၢၼ်သိုၵ်းမိူၼ်ၵၼ်။ ဢဝ်တပ်ႉတိုၵ်း ၶလယ တင်း ၶမယ ဝႃႈ သိုၵ်းမၢၼ်ႈ သုမ်းၵၢၼ် ၼႂ်းမိူင်းတႆး 47 တပ်ႉၵွင် ၼႂ်းမိူင်းရၶႅင်ႇ 42 တပ်ႉၵွင် ယင်းပႆႇ သွၼ်ႇ ပႃး တပ်ႉၵွင်ႈလူင် တပ်ႉတေႃႉသူင်ႇ တပ်ႉမ တပ်ႉလူမ်း တပ်ႉပၢႆးယူႇလီ တပ်ႉဢိၼ်ႊၵျိၼ်ႊၼီႊယႃႊ ဢၼ်ပၵ်းၼႂ်းပိုၼ်ႉတီး။