မေႃယႃယိင်းၵေႃႉၼိုင်ႈ ၺႃးၸူၼ် တီႈဝဵင်းမူႇၸေႊ

မေႃယႃယိင်းၵေႃႉၼိုင်ႈ တီႈဝဵင်းမူႇၸေႊ ၺႃးၽူႈၸၢႆးၵေႃႉၼိုင်ႈ ဢဝ်ၵွင်ႈၸမ်ႈသေ ၸူၼ်ဢဝ်ၵႃး မၼ်းၼၢင်းၵႂႃႇ ဝႃႈ ၼႆ။

ဝၼ်းတီႈ 21/12/2024 ယၢမ်းၵၢင်ၼႂ်မွၵ်ႈ 10 မူင်း မေႃယႃယိင်း ၵေႃႉၼိုင်ႈ ၽွင်းတိုၵ်ႉသၢႆႇႁူဝ် ၼႂ်းႁၢၼ်ႉၵႅတ်းၶူၼ်ႁူဝ် “ၼိၼ်းၼိၼ်း” (နှင်းနှင်းဆံပင်ညှင်ဆိုင်) တီႈပွၵ်ႉၼိူဝ် ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇၼၼ်ႉ ၺႃးၽူႈၸၢႆးၵေႃႉၼိုင်ႈ ဢမ်ႇႁူႉၾၢႆႇ ၶဝ်ႈၼႂ်းႁၢၼ်ႉသေ ဢဝ်ၵွင်ႈၸမ်ႈမၼ်း ၼၢင်းၸူၼ်ဢဝ်ၵႃးၵႂႃႇ။   

ၵူၼ်းမူႇၸေႊ ၽူႈၸၢႆးၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ပိူင်ပဵၼ်မၼ်း ပဵၼ်ၵႂႃႇမိူဝ်ႈယၢမ်း ၵၢင်ၼႂ်မွၵ်ႈ 10 မူင်း မိူဝ်ႈၽွင်းမၼ်းၼၢင်း တိုၵ်ႉၼင်ႈသၢႆႇႁူဝ် တီႈၼႂ်းသႅင်ႇၵႅတ်းၶူၼ်ႁူဝ်ၼၼ်ႉ မီးၽူႈၸၢႆးၵေႃႉၼိုင်ႈ ၶဝ်ႈမႃးၼႂ်းသႅင်ႇ ၼၼ်ႉသေဝႃႈ လူဝ်ႇၶၢႆႉၵႃးၼႆသေ ပႆၵႂႃႇတီႈႁိမ်းမေႃယႃၼၼ်ႉယဝ်ႉ ဢဝ်ၵွင်ႈၸမ်ႈမၼ်းၼၢင်းသေ ဢဝ်သေႃးၵႃးတင်း ထူင်ငိုၼ်းမၼ်းၼၢင်းၵႂႃႇဢေႃႈ”- ဝႃႈၼႆ။

ၵႃးမေႃယႃယိင်း ဢၼ်ၺႃးၸူၼ် ဢဝ်ၵႂႃႇၼၼ်ႉ ပဵၼ်ၵႃးမီးဝႂ်ၶွၼ်ႇ (လၢႆႊၸိၼ်ႊ)။ ယဝ်ႉၵေႃႈ ၽူႈၸၢႆး ဢၼ်ၶဝ်ႈမႃး ၸူၼ်ၼၼ်ႉၵေႃႈ တေႃႇထိုင်ယၢမ်းလဵဝ် ပႆႇတီႉၺွပ်းလႆႈ။

ယၢမ်းလဵဝ် ယွၼ်ႉငဝ်းလၢႆးၵၢၼ်မိူင်းသေ ၸွမ်းလႅၼ်လိၼ်တႆး – ၶႄႇ ၸိူဝ်းၼႆႉ ထုၵ်ႇလီၾၢင်ႉ (သတိ) ၵၼ် မိူၼ်ၼင်ႇ – ၵူၼ်းႁဵတ်းၵၢၼ် ၸုမ်းၵျႃးၽႅၼ်ႉ၊ ၵူၼ်းလႅၵ်ႈငိုၼ်း၊ ၵူၼ်းပိုတ်ႇၶၢႆၶူဝ်းၵုၼ်ႇယႂ်ႇ ၸိူဝ်းၼႆႉ။  

တီႈဝဵင်းမူႇၸေႊၼႆႉ ယၢမ်းလဵဝ် မီးၵူၼ်းတင်ႈၸုမ်းၽူႈလၵ်ႉၸၵ်ႉၶုတ်ႈမႃး ၼိုင်ႈၸုမ်းလႂ် 5 ၵေႃႉ ဢမ်ႇၼၼ် 10 ၵေႃႉ ၶဝ်ၸိူဝ်းၼႆႉ တေပၼ်ႇပုတ်ႈၵၼ်သေ လၵ်ႉၸူၼ် – ၵူၼ်းမူႇၸေႊ ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈၼႄၼင်ႇ ၼႆ။  

“တီႈဝဵင်းမူႇၸေႊၼႆႉ ပဵၼ်ဢၼ်ငဝ်းလၢႆးႁၢႆႉႁႅင်းမႃးတႄႉယဝ်ႉ ၸုမ်းၽူႈလၵ်ႉၸၵ်ႉၶုတ်ႈၼၼ်ႉ ၶဝ်တေတင်ႈဝႆႉ ၼိုင်ႈၸုမ်းလႂ် 5 ၵေႃႉ ဢမ်ႇၼၼ် 10 ၵေႃႉ တေပၼ်ႇပုတ်ႈၵၼ်သေ လၵ်ႉၸူၼ် ယဝ်ႉၵေႃႈ ၶဝ်တေလႅၵ်ႈလၢႆႈၵူၼ်းသေလၵ်ႉ ၼင်ႇႁိုဝ် တေဢမ်ႇတွင်းလႆႈ ၼႃႈၶဝ်ၼၼ်ႉ။ ၵွပ်ႈၼႆလႄႈ ထုၵ်ႇလီဢွၼ် ၵၼ်ၾၢင်ႉ(သတိ) ၵၼ်ယႂ်ႇၼမ်။ တေႃႈၼင်ႇ မေႃယႃယိင်းၼၼ်ႉ ၸႂ်ႉၶၢႆႉၵႃးသေ ဢဝ်ၵွင်ႈငႃ ၸူၼ်ဢဝ် ၵႂႃႇ ငၢႆႈငၢႆႈၸိူင်ႉၼႆၼႆႉ။ ဢိင်ၼိူဝ် လွင်ႈပိူင်ပဵၼ်ၼႆႉသေ ဢမ်ႇမီးၽႂ်ဢဝ်ပုၼ်ႈၽွၼ်း လိူင်ႈသင်ပၼ်” – ဝႃႈၼႆ။

ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်ၶႄႇ ၵေႃႈၸႂ်ႈ ယဝ်ႉၵေႃႈ ၸုမ်းယိပ်းၵွင်ႈ တူင်ႉၼိုင်ၵႂႃႇ မႃးၼမ် မိူၼ် ၼင်ႇ – သိုၵ်းမၢၼ်ႈ၊ ပျီႇတူႉၸိတ်ႉၵွင်းၶႃး၊ မဵဝ်ႉမ၊ ပၢၼ်းသေး၊ လူင်ထင်၊ ပဵင်းသႃႇ၊ မၢၼ်ႈၸေႊ၊ သႅင်ၵႅဝ်ႉ၊ မၢၼ်ႈဝဵင်း၊ တႃႈမိူင်းငႄး၊ မိူင်းပေႃႈ ၸိူဝ်းၼႆႉ တင်းမူတ်း ဢမ်ႇယွမ်း 15 ၸုမ်း။ ယဝ်ႉၵေႃႈ မိူၼ်ၼင်ႇ – သိုၵ်းၵဝ်ႈၵၢင်ႉ MNDAA ၊ သိုၵ်းၶၢင် KIA ၊ သိုၵ်းတဢၢင်း TNLA လႄႈ သိုၵ်းတႆး SSPP ၸိူဝ်းၼႆႉၵေႃႈ တူင်ႉၼိုင်ဝႆႉထႅင်ႈ။

ၵဵဝ်ႇလူၺ်ႈ ၽႅၼ်ယၼ်ႇသိုၵ်း 1027 ၼၼ်ႉသေ တီႈဝဵင်းမူႇၸေႊၼႆႉ ဢမ်ႇပဵၼ်ပၢင်တိုၵ်းႁၢဝ်ႈႁႅင်းသေတႃႉ ၵူၺ်းၵႃႈ ယၢမ်းလဵဝ်သမ်ႉ ပဵၼ်တီႈသိုၵ်းမၢၼ်ႈ ယိုတ်းမိူင်းၶဝ် မႃးၶွၼ်ႈယူႇဝႆႉၼမ် – ၵူၼ်းပိုၼ်ႉတီႈ ဝဵင်းမူႇၸေႊလၢတ်ႈ။

“သိုၵ်းမၢၼ်ႈ ၸိူဝ်းသုမ်းသိုၵ်း ၼႂ်းမိူင်းတႆးပွတ်းႁွင်ႇ မိူၼ်ၼင်ႇ တၢင်းမိူင်းၵူဝ်း၊ ပၢင်ႇသၢႆး၊ ၶျိၼ်ႊသၢၼ်ႊၵျေႃႉ၊ 105 လၵ်း၊ ၼမ်ႉၶမ်း၊ ၵူတ်ႉၶၢႆ၊ ၼမ်ႉၽၵ်းၵႃ၊ မၢၼ်ႈဝဵင်း၊ ၼွင်မူၼ်း၊ ထုင်ႉလွႆႁူဝ်သိူဝ် ၸိူဝ်းၼႆႉမႃး ၵွင်ဝႆႉတီႈမူႇၸေႊမူတ်း။ တၢင်းမိူင်းၶၢင် ပွတ်းလွႆၸေႊ၊ ၵၢၼ်ႇပၢႆႉတီႇ ၸိူဝ်းၼၼ်ႉၵေႃႈ မႃးၵွင်တီႈၼႆႈ မူတ်း။ လၢမ်းၶၢတ်ႈဝႆႉတႄႉ ႁူဝ်ၼပ်ႉသိုၵ်းၶဝ် မီးၼပ်ႉႁူဝ်ႁဵင်ၶႃႈယဝ်ႉ။ ဢၼ်သူင်ႇမႃးတၢင်းၶိူင်ႈမိၼ်ၵေႃႈ မီးဢေႃႈ”- ဝႃႈၼႆ။

ယၢမ်းလဵဝ် တီႈဝဵင်းမူႇၸေႊၼႆႉ သိုၵ်းမၢၼ်ႈ ယိုတ်မိူင်း တမ်းသိုၵ်းၶဝ် ၸွမ်းၶႅပ်ႇဝဵင်းၼႅၼ်ႈၼႃ မိူၼ်ၼင်ႇ ၼႂ်းၵႄႈမူႇၸေႊ – ၼမ်ႉၶမ်း ၸွမ်းလွႆၵိဝ်ႇလွၵ်ႇ၊ ႁူဝ်ပေႃႈ ၊ ဝဵင်းၼၢင်း ၸိူဝ်းၼႆႉၵေႃႈ ၼမ်ႁႅင်း ဝႃႈၼႆ။

မိူဝ်ႈဝၼ်းတီႈ 23/11/2024 ယၢမ်းၵၢင်ၶမ်ႈ သိုၵ်းမၢၼ်ႈ 300 ပၢႆ ထုၵ်ႇသိုၵ်းၶႄႇ သူင်ႇတူဝ်ဢွၵ်ႇမႃး တီႈၽၵ်း တူမၢၼ်ႈဝဵင်း ၼႂ်းဝဵင်းမူႇၸေႊ ယွၼ်ႉသုမ်းသိုၵ်းၶၢင် တီႈဝဵင်းၵၢၼ်ႇပၢႆႉတီႇ (ကန်ပိုက်တီမြီု့) ၸႄႈမိူင်းၶၢင် ၼၼ်ႉသေ ပၢႆႈၶဝ်ႈၸူးမိူင်းၶႄႇ ဝႃႈၼႆ။