သိုၵ်းမၢၼ်ႈ ယိုတ်းမိူင်း တီႈဝဵင်းလၢႆးၶႃႈ ႁႄႉႁၢမ်ႈၵူၼ်းမိူင်း ဢမ်ႇပၼ်လတ်းၽၢၼ်ႇၵႂႃႇမႃး တီႈၼႃႈၵဵတ်ႉ/ လၢၼ်ႇၶဝ် ယၢမ်းၵၢင်ၶမ်ႈၵၢင်ၶိုၼ်း သင်ဢမ်ႇႁဵတ်းၸွမ်း တေၺႃးတၢမ်ႇၼၵ်းၼႃ ဝႃႈၼႆ။

မိူဝ်ႈဝႃး ဝၼ်းတီႈ 19/12/2024 တႄႇဢဝ် ယၢမ်းႁူဝ်ၶမ်ႈ 6 မူင်း ထိုင် 6 မူင်းၵၢင်ၼႂ်ၸဝ်ႉ သိုၵ်းမၢၼ်ႈ ႁၢမ်ႈၵူၼ်းမိူင်း ဢမ်ႇပၼ်လတ်းၽၢၼ်ႇ ၵႂႃႇမႃးတီႈၼႃႈၵဵတ်ႉၶဝ် ၸွမ်းတၢင်းၶဝ်ႈဢွၵ်ႇဝဵင်း ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇႁႅင်း တႃႇၵႂႃႇမႃးႁႃၵိၼ်လဵင်ႉတွင်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃး ယၢမ်းၵၢင်ဝၼ်းၼႆႉ ၾၢႆႇၽွင်းငမ်း ၼႂ်းဝဵင်းလၢႆးၶႃႈ ၶီႇရူတ်ႉၵႃးလူင်းသေႃႇပဝ်ႇ ၸွမ်းၼႂ်းပွၵ်ႉၼႂ်းယွမ်ႇ၊ ပေႃးထိုင်ယၢမ်းၵၢင်ၶမ်ႈၵၢင်ၶိုၼ်းမႃး ဢမ်ႇႁႂ်ႈၵူၼ်းမိူင်းလတ်းၶၢမ်ႈၵႂႃႇ ၸွမ်းၼႃႈၵဵတ်ႉ/ လၢၼ်ႇၶဝ်။ ပေႃးထူပ်းႁၼ်မႅၼ်ႈၸိုင် တေပၼ်တူတ်ႈတၢမ်ႇ ၸွမ်းၼင်ႇပၵ်းပိူင်လႄႈ တေတီႉၺွပ်း ၸဵမ်ၸိူဝ်းၼႆႉ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈ ႁႄႉႁၢမ်ႈၵူၼ်းမိူင်း ၸိူင်ႉၼႆၼႆႉ ယွၼ်ႉသင်လႄႈႁၢမ်ႈ ဢၼ်ဝႃႈၼၼ်ႉ ပႆႇမီးၽႂ်ႁူႉ ငဝ်ႈ ႁၢၵ်ႈလွင်ႈတၢင်းမၼ်းလီလီ။ ယဝ်ႉၵေႃႈ တေပိၵ်ႉဢိုတ်းတေႃႇထိုင်ဝၼ်းလႂ် ၸိူဝ်းၼႆႉၵေႃႈ ဢမ်ႇလၢတ်ႈဝႆႉပႃး။ ၵဵတ်ႉ/ လၢၼ်ႇ ဢၼ်ၶဝ်ႈၸူး ဝဵင်းလၢႆးၶႃႈၼႆႉ တေမီး 3 တီႈ – ပဵၼ်သဵၼ်ႈ တၢင်းၽႄၸူး ဝဵင်းပၢင်လူင်၊ ဝဵင်းမိူင်းၵိုင်လႄႈ ဝဵင်း ၵေးသီး ၸိူဝ်းၼႆႉ။

ဢိင်ၼိူဝ် လွင်ႈဢၼ်ႁၢမ်ႈ ၵူၼ်းမိူင်းလၢႆးၶႃႈၵႂႃႇမႃးၼႆႉ ၵူၼ်းမိူင်းလၢတ်ႈဝႃႈ ၾၢႆႇတင်းသိုၵ်း SSPP ၵေႃႈ ႁၢမ်ႈႁႅၵ်ႉ ၶၢဝ်းၵၢင်ၶမ်ႈၵၢင်ၶိုၼ်း ဢမ်ႇပၼ်ၵႂႃႇမႃး ဝႃႈၼႆ။ ၵူၺ်းၵႃႈ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူးၽူႈၶၢၼ်ပၢၵ်ႇ SSPP ၵေႃႈ ဢမ်ႇမီးၽႂ်ႁပ်ႉတွပ်ႇ။

ယၢမ်းလဵဝ် ပဵၼ်ၽွင်းလူဝ်ႇဢဝ်ၶဝ်ႈၵၢပ်ႇ ၽုၵ်ႇၽၵ်းမီႇ ၸိူဝ်းၼႆႉလႄႈ ၵူၼ်းမိူင်း ၸိူဝ်းႁဵတ်းၵၢၼ် သူၼ်ႁႆႈၼႃးၶဝ် ထူပ်းတၢင်းယၢပ်ႇၽိုတ်ႇ ဢမ်ႇၸၢင်ႈၵႂႃႇမႃးႁႃၵိၼ်ထၢင်ႇႁၢင်ႈ မိူၼ်ၵူႈပွၵ်ႈလႄႈ လႆႈ ႁိပ်ႈၼႅတ်ႈႁဵတ်းၵၢၼ် ပွၵ်ႈႁိူၼ်းၸဝ်ႉ ၼႆယဝ်ႉ။

“ယၢမ်းလဵဝ် ပဵၼ်ၽွင်းလူဝ်ႇၵႂႃႇႁႆႈၵႂႃႇသူၼ်၊ လူဝ်ႇဢဝ်ၶဝ်ႈၵၢပ်ႇတေႃႉသူင်ႇၶၢႆ ၸိူဝ်းၼႆႉ။ ၵမ်ႈၽွင်ႈသမ်ႉ မီးသူၼ် ၸွမ်းၾၢႆႇၼွၵ်ႈဝဵင်း ၸိူဝ်းၼႆႉလႄႈ လႆႈၵႂႃႇလႃႈမႃးၸဝ်ႉ လႆႈႁိပ်ႈႁဵတ်းၵၢၼ်ၵူၺ်းဢမ်ႇၵႃႈ ၼႃႈၵၢၼ်တႃငၢၼ်းၵေႃႈ ဢမ်ႇယဝ်ႉဢမ်ႇတူဝ်ႈသေ မီးလွင်ႈၸိူင်ႉၵၢတ်ႈတင်းၼမ်။ တႃႇလႆႈငိုၼ်းၶဝ်ႈ ၼႂ်းၼႃႈႁိူၼ်းၵေႃႈ တေမီးလွင်ႈယုပ်ႈယွမ်းမႃး ” – ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ဢၼ်သိုၵ်းမၢၼ်ႈၵူတ်ႇထတ်း ၸွမ်းတၢင်းၶဝ်ႈဢွၵ်ႇဝဵင်းၼႆႉ လိူဝ်သေ တီႈဝဵင်းလၢႆးၶႃႈယဝ်ႉ မိူၼ်ၼင်ႇ – ၸွမ်းဝဵင်းလူင်တူၼ်ႈတီး၊ ဝဵင်းလွႆလႅမ်၊ ပၢင်လူင်၊ ၶူဝ်လမ်လႄႈ တၢင်ႇတီႈတၢင်ႇဝဵင်း ၸိူဝ်းၼႆႉၵေႃႈ ၵူတ်ႇထတ်းၵူႈတီႈ။ ယွၼ်ႉၼၼ် ၵူၼ်းမိူင်းပိုၼ်ႉတီႈ ဢွၼ်ၵၼ်မႆႈၸႂ် လွင်ႈႁူမ်ႇလူမ်ႈ လွင်ႈၵႂႃႇတႃႈပႆတၢင်း ၸိူဝ်းၼႆႉ။