တီႈဝဵင်းၼွင်ၶဵဝ်ၼႆႉ ပၢင်တိုၵ်းသိုပ်ႇပဵၼ်ၶိူဝ်းယႂ်းလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်း ပႆႇၸၢင်ႈပွၵ်ႈၶိုၼ်းႁိူၼ်း ယေးၽႂ်မၼ်း။

ဝၼ်းတီႈ 18/12/2024 ယၢမ်းဝၢႆးဝၼ်းမွၵ်ႈ 2 မူင်း သိုၵ်းမၢၼ်ႈ ယိုတ်းမိူင်း ယိုဝ်းၵွင်လူင် သႂ်ႇတီႈဝၢၼ်ႈဢုမ်ႇ တီးၼႂ်း ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မွၵ်ႈ 10 လုၵ်ႈ။ ယွၼ်ႉပၢင်တိုၵ်း တိုၵ်ႉသိုပ်ႇပဵၼ်ႁႅင်းလႄႈ ၵူၼ်းပၢႆႈၽေးၶဝ် ပႆႇၸၢင်ႈပွၵ်ႈႁိူၼ်း ၼႆယဝ်ႉ။

ၵူၼ်းပၢႆႈၽေးသိုၵ်း ၽူႈၸၢႆး ၼႂ်းၸႄႈဝဵင်းၼွင်ၶဵဝ် လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 18 ၼႆႉ ၶဝ်ပွႆႇ မႃးမၢၵ်ႇ 10 လုၵ်ႈပၢႆ။ ပဵၼ်မၢၵ်ႇလူင်လၢႆလၢႆၶႃႈယဝ်ႉ။ ပွႆႇမႃးတၢင်းဢူင်းသီး (ဢုမ်ႇတီး) ဝၢႆးဝၼ်း 2 မူင်း တေႃႇထိုင်ဝၼ်းတူၵ်းလပ်းသိင်ႇသွမ်ႉႁွမ်ႉဢေႃႈ။ ၸုမ်းသိုၵ်းၵေႃႈ ၼိုင်ႈၸုမ်းလႂ် ယူႇဝႆႉၼိုင်ႈၾၢႆႇၸိူင်ႉၼၼ်။ ၶဝ်တိုၵ်ႉၶဵင်ႈၶႅင်ၵၼ်ယူႇ ႁဝ်းၶႃႈ ပႆႇၸၢင်ႈမိူဝ်း”- ဝႃႈၼႆ။

ၵူၼ်းပၢႆႈၽေးသိုၵ်း မၢင်ၸိူဝ်း ဢၼ်မႃးမီးႁိမ်းႁွမ်းဝဵင်းပၢၼ်ႉပူၺ်းၼႆႉ မီး 6 လိူၼ်ယဝ်ႉ တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈမိူဝ်းၸႂ်းႁိူၼ်း ယၢမ်းလဵဝ်သမ်ႉ ယွၼ်ႉပၢင်တိုၵ်းပဵၼ်ဝႆႉ ၸွမ်းဝၢၼ်ႈၸွမ်းသူၼ်လႄႈ ဢမ်ႇၸၢင်ႈဢဝ်မၢၵ်ႇၶဝ်ႈတဝ်ႈ ၼမ်ႉထႅင်ႈ။

“တႃႇတေႁႃငိုၼ်းၼႆႉ မၢင်ၸိူဝ်းႁဵတ်းဝႆႉႁႆႈၼႃးတၢင်းဢူင်းသီး လၢၼ်းၶႂၢႆး ၸိူဝ်းၼႆႉ။ ၸိူဝ်းပၢၼ်ႉပူၺ်းၼၼ်ႉ ၵမ်ႈၽွင်ႈ ယင်းပႆႇလႆႈပၢတ်ႇၶဝ်ႈ။ ၶဝ်ႈၼႃးၼႆႉ ပႅတ်ႈလၢႆၵႂႃႇ ၸိူင်ႉၼၼ်ၵူၺ်း။ ၶဝ်ႈၵၢပ်ႇၵေႃႈ ဢမ်ႇၸၢင်ႈၵၢၼ်ႉ ဢမ်ႇၸၢင်ႈ ၵႂႃႇဢဝ် ယွၼ်ႉမၼ်းမီးၼႂ်းၵႄႈပၢင်တိုၵ်း။ ၵွပ်ႈၼႆလႄႈ ပီၼႃႈၼႆႉ တေႁဵတ်းႁိုဝ် ဢမ်ႇႁူႉဝူၼ်ႉပေႃးဢမ်ႇဢွၵ်ႇယဝ်ႉ”- ၵူၼ်းပၢႆႈၽေးသိုၵ်း တီႈဝဵင်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။

ပၢင်တိုၵ်း တီႈၸႄႈဝဵင်းၼွင်ၶဵဝ်ၼႆႉ သိုၵ်းမၢၼ်ႈတင်း သိုၵ်းတဢၢင်း TNLA ပိုတ်းယိုဝ်းၵၼ် တင်ႈတႄႇ ႁၢင်ပီ 2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ပေႃးၼပ်ႉတူၺ်းၵူၼ်းဝၢၼ်ႈ ဢၼ်လႆႈပၢႆႈၽေးသိုၵ်းၼႆႉ မီးၸမ် 20 ဝၢၼ်ႈယဝ်ႉ။

ၵူၼ်းမိူင်း ၸိူဝ်းမီးႁႅင်းငိုၼ်းတႄႉ ပၢႆႈၵႂႃႇတၢင်းဝဵင်းလိူဝ်ႇ၊ ဝဵင်းပၢင်ႇဢူႈလူင်(ပၢင်ႁူႈ) ၸိူဝ်းဢမ်ႇမီးႁႅင်း ငိုၼ်းတႄႉ မၢင် ၸိူဝ်း ပၢႆႈၵႂႃႇတၢင်းႁူင်းၸၢၵ်ႈၵိူဝ်ဝၢၼ်၊ ၸွမ်းဝတ်ႉဝႃးၽႃသိူဝ်ႇလႄႈ ပၢႆႈၵႂႃႇယူႇတၢင်း ဝၢၼ်ႈသၢမ်သိူဝ် ၸိူဝ်းၼၼ်ႉၵေႃႈ မီးတင်းၼမ်။