မၢၵ်ႇၶဝ်ႈတဝ်ႈၼမ်ႉ ဢမ်ႇလိူင်ႇမၢၵ်ႈလႄႈ ၸဝ်ႈသူၼ် ၼႂ်းၼွင်ႁၢႆးယႃႈ ယၢပ်ႇၵိၼ်းၸႂ် 

ပီၼႆႉ ၵူၼ်းမိူင်းၼႂ်းၼွင်ႁၢႆးယႃႈ ထူပ်းတၢင်းယၢပ်ႇၽိုတ်ႇလၢႆလၢႆလွင်ႈ၊ ၽွင်းတေၵဵပ်းမၢၵ်ႇၶဝ်ႈတဝ်ႈၼမ်ႉသမ်ႉ ထူပ်း ၽေးၼမ်ႉထူမ်ႈ၊ ယၢမ်းလဵဝ်သမ်ႉ ထိုင်ၶၢဝ်းၵဵပ်းမၢၵ်ႇၶဝ်ႈတဝ်ႈၼမ်ႉထႅင်ႈၵမ်းၼိုင်ႈယဝ်ႉၵေႃႈ မွၵ်ႇမၢၵ်ႇဢမ်ႇလိူင်ႇမၢၵ်ႈပူင်းလီလႄႈ ၸဝ်ႈသူၼ်ထူပ်းတၢင်းယၢပ်ႇၽိုတ်ႇလိူဝ်ႁႅင်း။

ၼၢင်းယိင်းၸဝ်ႈသူၼ် ၵေႃႉၼိုင်ႈ ၵူၼ်းၼႂ်းၼွင်ႁၢႆးယႃႈ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဢွၼ်တၢင်း ၽုၵ်ႇမၢၵ်ႇၽိတ်ႉလူင် လိၼ်လီ မၢၵ်ႇၶႅမ်ႉလႄႈ လႆႈၼမ်ႉတွၼ်းမၼ်း ဢမ်ႇယွမ်း (50) သႅၼ်ပျႃး။ ယၢမ်းလဵဝ်သမ်ႉ ၽုၵ်ႇၵေႃႈတူၼ်ႈမၼ်း ဢမ်ႇမၢၵ်ႈသုင်၊ မၢၵ်ႇမၼ်းဢမ်ႇဢွၵ်ႇပူင်ႇလႄႈ ၾၢႆႇၼိုင်ႈၸဝ်ႈသူၼ် ၵမ်ႈၼမ် ၸႂ်ႉပုၺ်ထၢတ်ႈ မျေႇဢေႃးၸႃႇၼမ် ၼႃႇၵေႃႈ တေပႃး၊ မၢင်ၸဝ်ႈသမ်ႉ သိုဝ်ႉၺႃးၸိူဝ်ႉၽၼ်း ဢၼ်ပွမ်၊ လိုၼ်းသုတ်း ဢမ်ႇၶိုၼ်းလႆႈမၢၵ်ႇလႆႈမႂ်သင်လႄႈ ဢွၼ်ၵၼ်သုမ်း”- ဝႃႈၼႆ။

ၸိူဝ်ႉၽၼ်းမၢၵ်ႇၽိတ်ႉလူင်ၼႆႉ ၼိုင်ႈထူင်လႆႈသိုဝ်ႉ 2 မိုၼ်ႇပျႃး၊ ၵႃႈၸိူဝ်ႉၽၼ်းလႄႈ ၵႃႈလိၼ်ပုၺ်ထၢတ်ႈ လႆႈလူင်းတိုၼ်းလၢင်း ဢမ်ႇယွမ်း 50 သႅၼ်ပျႃး ထိုင်ၶိင်ႇမၢၵ်ႇသမ်ႉ ဢမ်ႇမၢၵ်ႇလႄႈ ဢွၼ်ၵၼ်သုမ်း ဝႃႈၼႆ။

ၼႂ်းၼွင်ႁၢႆးယႃႈပီၼႆႉ ၸဝ်ႈသူၼ်ဢွၼ်ၵၼ်ၽုၵ်ႇ မၢၵ်ႇၽိတ်ႉလူင်၊ မၢၵ်ႇၶိူဝ်သူမ်ႈ၊ မၢၵ်ႇပၵ်ႉ၊ ၽၵ်းၵၢတ်ႇ။ ၶၼ်ၵုၼ်ႇသမ်ႉ ပုင်ႈၶိုၼ်ႈသုင်လႄႈ ၸဝ်ႈသူၼ်လႆႈႁႃလိူၵ်ႈသိုဝ်ႉ ၸိူဝ်ႉၽၼ်းဢၼ်ၵႃႈထုၵ်ႇၵႃႈပေႃး။ ၸင်ႇဝႃႈမွၵ်ႇမၢၵ်ႇႁၢၵ်ႈႁူဝ် ၵေႃႈ ဢမ်ႇဢွၵ်ႇၼမ်။ 

ၵူၼ်းၸၢႆး ဢႃယု 30 ပၢႆ ၸဝ်ႈသူၼ်ၼႂ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၸိူဝ်ႉၽၼ်းၼႆႉ မၼ်းၵႃႈယႂ်ႇၼႃႇလႄႈ ပိူၼ်ႈဢမ်ႇၵႂႃႇသိုဝ်ႉတီႈၶွမ်ႊပၼီႊမၼ်း၊ သၢင်ႇတေႃႇႁၢၼ်ႉလႂ်၊ ႁၢၼ်ႉလႂ်ၶၢႆထုၵ်ႇၶၢႆပေႃးၵေႃႈ ၵႂႃႇႁႃသိုဝ်ႉမႃးၸိူင်ႉၼၼ် ၵူၺ်း၊ ၵွပ်ႈၼႆ မၢင်ၵေႃႉ ၸိူဝ်ႉၽၼ်း ဢမ်ႇငွၵ်ႈတူၼ်ႈ။ မၢင်ၵေႃႉၵေႃႈ သိုဝ်ႉမိူၼ်ၼႆ ၵူၺ်းသမ်ႉဢွၵ်ႇတူၼ်ႈယူႇ ၵူၺ်း ၵႃႈဢမ်ႇမၢၵ်ႇ။ ၵွပ်ႈၼႆ ၸဝ်ႈသူၼ်လႆႈၵႂႃႇႁႃၵိၼ် ၸၢင်ႈပိူၼ်ႈတၢင်ႇ တီႈတၢင်ႇဝၢၼ်ႈသေ ၵႄႈလိတ်ႈၵႂႃႇဝၼ်းလႂ်ဝၼ်း ၼၼ်ႉၵူၺ်းယဝ်ႉ တေႃႈလဵဝ်တႄႉ”- ဝႃႈၼႆ။

ပီၼႆႉ ၸဝ်ႈသူၼ်ၼႂ်းၼွင်ႁၢႆးယႃႈ သိုဝ်ႉၺႃးၸိူဝ်ႉၽၼ်း ဢမ်ႇငွၵ်ႈပဵၼ်တူၼ်ႈလႄႈ ဢၼ်လႆႈသုမ်းၵႂႃႇမီး 50 ဢေႊၶိူဝ်ႊပၢႆ မၼ်းၸၢႆးသိုပ်ႇလၢတ်ႈၼင်ႇၼႆ။ 

ၾၢႆႇၼိုင်ႈ ၼႂ်းပီၼႆႉ ၵူၼ်းမိူင်းၼွင်ႁၢႆးယႃႈ ထူပ်းၽေးၼမ်ႉထူမ်ႈၼမ်ႉၼွင်း။ ၼၼ်ႉၵေႃႈ ႁဵတ်းႁႂ်ႈၵၢၼ်ၽုၵ်ႇသွမ်ႈလူႉ ၵွႆမူတ်း ဢမ်ႇၵိုတ်းလိူဝ်သင်။  

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)