တပ်ႉသိုၵ်းပူတ်းပွႆႇၵူၼ်းမိူင်းထၼု DPLA လႄႈ သိုၵ်းမၢၼ်ႈ ယိုတ်းမိူင်း ပဵၼ်ပၢင်တိုၵ်းၵၼ် ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း သိုၵ်းမၢၼ်ႈ ပွႆႇမၢၵ်ႇတူၵ်းၼႂ်း ဢိူင်ႇၵျွၵ်ႉၵူႇ ၵူၼ်းပိုၼ်ႉတီႈလူႉတၢႆ။
ဝၼ်းတီႈ 18/12/2024 ယၢမ်းၵၢင်ဝၼ်း 3 မူင်း သိုၵ်းမၢၼ်ႈ ပွႆႇမၢၵ်ႇတူၵ်းတိူဝ်ႉသႂ်ႇ ၵူၼ်းဝၢၼ်ႈထမိၼ်းပွင်း (ထမင်းပေါင်း) ပဵၼ်ၽူႈၸၢႆး ဢႃယု 20 ပၢႆ မၢတ်ႇၸဵပ်း ႁၢဝ်ႈႁႅင်းထိုင်တီႈလူႉတၢႆ။
ၽူႈၶၢၼ်ပၢၵ်ႇ DPLA လၢတ်ႈၽူႈတွႆႇႁွၵ်ႈဝႃႈ – “ပၢင်တိုၵ်း တႄႇပဵၼ်ၶိုၼ်း မိူဝ်ႈၼႆႉၵၢင်ၼႂ်၊ ပဵၼ်တေႃႇထိုင် ဝၢႆးဝၼ်း၊ ၵၢင်ၶမ်ႈၼႆႉတႄႉ သဵင်ယဵၼ်ၵႂႃႇ ၵမ်းၼိုင်ႈ၊ သိုၵ်းမၢၼ်ႈ ပွႆႇမၢၵ်ႇ ၵူၼ်းၸၢႆးဢႃယု ၼႂ်းၵႄႈ 25-30 တၢႆ ၵေႃႉၼိုင်ႈ” – ဝႃႈ ၼႆ။
ဝၼ်းလဵဝ်ၵူၺ်း သိုၵ်းမၢၼ်ႈ ပွႆႇမၢၵ်ႇသႂ်ႇ တိူဝ်ႉမႅၼ်ႈၶူဝ်တၢင်းၶဝ်ႈ ၼႂ်းဢိူင်ႇၵျွၵ်ႉၵူ လူႉၵွႆ – ၵူၼ်းၸၢႆး ၼႂ်းပိုၼ်ႉတီႈ ၵေႃႉ ၼိုင်ႈ လၢတ်ႈၽူႈတွႆႇႁွၵ်ႈၼင်ႇၼႆ။
“တႄႇပဵၼ်ပၢင်တိုၵ်းၼႆႉ ယွၼ်ႉသိုၵ်းထၼုၶဝ် မႃးတင်ႈၵဵတ်ႉ တီႈတၢင်းၶဝ်ႈဝဵင်း။ တေႃႈလဵဝ်တႄႉ ယဵၼ်ဝႆႉယူႇ။ ၵႆႉပွႆႇမၢၵ်ႇၼႃႇလႄႈ ၵူၼ်းပိုၼ်ႉတီႈပၢႆႈမူတ်း။ တိူဝ်ႉၺႃး ၼၢင်းယိင်းၼႂ်းပိုၼ်ႉတီႈတၢႆ ၵေႃႉၼိုင်ႈ။ ၵၢၼ်ၵပ်းသိုပ်ႇ လႅင်း ၾူၼ်းၵေႃႈ ၶၢတ်ႇပဵၼ်ၵမ်း လႆႈပဵၼ်ၵမ်း။ ၶူဝ်တၢင်းၶဝ်ႈဝဵင်းတႄႉ ႁၵ်းၵွႆလႄႈ ရူတ်ႉၵႃးယႂ်ႇ ၵႂႃႇမႃးဢမ်ႇလႆႈယဝ်ႉ”- ဝႃႈၼႆ။
ၶူဝ်ဢၼ်လူႉၵွႆၵႂႃႇၼႆႉ ပဵၼ်ၶူဝ်ဢၼ်လမ်ႇလွင်ႈ ဢၼ်လတ်းၵႂႃႇတၢင်းမိူင်းတႆးပွတ်းၸၢၼ်း – ႁွင်ႇ။ ပဵၼ်ၶူဝ်ဢၼ် မီးၼိူဝ်သဵၼ်ႈတၢင်းလူင် လွၵ်ႉၸွၵ်ႇ- ဢၢင်ႇတေႃး (ပႃႇတိုင်း) – ၵျွၵ်ႉၵူႇ – ၼွင်ၶဵဝ် – ၼမ်ႉလၼ်ႈ – လႃႈသဵဝ်ႈ – ၵျွၵ်ႉမႄး။
တပ်ႉၸုမ်းၾၢႆႇပူတ်းပွႆႇ ၸၢဝ်းထၼု DPLA လႄႈ သိုၵ်းမၢၼ်ႈ ပဵၼ်ပၢင်တိုၵ်းၵၼ် တီႈဢိူင်ႇၵျွၵ်ႉၵူႇ တီႈႁိမ်း တပ်ႉၵွင်ႈလူင် ဢမတ 349 ၼႆ DPLA ပိုၼ်ၽၢဝ်ႇဝႆႉ မိူဝ်ႈဝၼ်းတီႈ 18/12/2024 ၼင်ႇၼႆ။ ပၢင်တိုၵ်း ပဵၼ်ႁၢဝ်ႈႁႅင်းလႄႈ ၵူၼ်းပိုၼ်ႉတီႈ ႁိမ်းႁွမ်း 2-3 ဝၢၼ်ႈ ငိူင်ႉပၢႆႈၽေးသိုၵ်းဝႆႉ ဝႃႈၼႆ။
တီႈဢိူင်ႇၵျွၵ်ႉၵူႇၼႆႉ သိုၵ်းမၢၼ်ႈၵႆႉ ပွႆႇမၢၵ်ႇလူင်၊ ၵႆႉဢဝ်ၶိူင်ႈမိၼ် ၻရူၼ်ႊ မႃးပွႆႇမၢၵ်ႇ။ ၼႂ်းဝၼ်းတီႈ 10/12/2024 ၼၼ်ႉၵေႃႈ သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇ တီႈၵျွင်းမုၼ်ၸဝ်ႈ ဝၢၼ်ႈၵျွၵ်ႉမီးၶၢတ်ႉ၊ ၵူၼ်း ဝၢၼ်ႈ မၢတ်ႇၸဵပ်း ႁၢဝ်ႈႁႅင်း ၵေႃႉၼိုင်ႈ။
ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ တပ်ႉသိုၵ်းထၼု ၼႂ်းၸႄႈဝဵင်းလွၵ်ႉၸွၵ်ႇၼႆႉ တႄႇပဵၼ်မႃးႁၢဝ်ႈႁႅင်း မိူဝ်ႈ 30/11/2024 တေႃႇထိုင် 09/12/2024 ၼႆႉ သိုၵ်းမၢၼ်ႈ မၢတ်ႇ/တၢႆ ဢမ်ႇယွမ်း 50 ၵေႃႉ။ DPLA ပိုၼ် ၽၢဝ်ႇဝႆႉဝႃႈ မိူဝ်ႈဝၼ်းတီႈ 07/12/2024 ၼၼ်ႉ သိုၵ်းမၢၼ်ႈ ပွႆႇမၢၵ်ႇဢၼ်ပႃးထၢတ်ႈၵွင်ႉငူၼ်ႉသႂ်ႇ ဝႃႈၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုပ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ