ၼုမ်ႇယိင်းတႃႈၶီႈလဵၵ်း ၵေႃႉၼိုင်ႈ ၺႃးၵူၼ်းႁၢႆႉ လၢၵ်ႈၸၼ်ထူင်ငိုၼ်းပၢႆႈ

မိူဝ်ႈၼႆႉ ဝၼ်းတီႈ 19/12/2024 ယၢမ်းၵၢင်ၼႂ် 6:47 မူင်း မီးၽူႈၸၢႆးသွင်ၵေႃႉ လၢၵ်ႈၸၼ်ထူင်ငိုၼ်း ၼၢင်းယိင်းၼုမ်ႇ ၵေႃႉၼိုင်ႈ တီႈၼႃႈႁိူၼ်း ပွၵ်ႉသၼ်သၢႆး (ၵ) ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး။

ၵူၼ်းတႃႈၶီႈလဵၵ်း ၽူႈၸၢႆး ဢႃယုမွၵ်ႈ 30 ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ လႆႈႁၼ်ၶၢဝ်ႇဢွၵ်ႇဝႆႉ ပဵၼ်တီႈပွၵ်ႉသၼ်သၢႆး ၽွင်းမၼ်းၼၢင်း တေဢွၵ်ႇႁိူၼ်းၵႂႃႇတၢင်းၼွၵ်ႈ။ ထုၵ်ႇၵူၼ်းႁၢႆႉၼၼ်ႉ လၢၵ်ႈၸၼ်ထူင်ငိုၼ်းမၼ်း ၵႂႃႇဢေႃႈ”- ဝႃႈၼႆ။

တီႈၵွင်ႈထၢႆႇ CCTV ပိုၼ်ၽႄႈဢွၵ်ႇဝႆႉတႄႉ လႆႈႁၼ် ၽူႈၸၢႆးသွင်ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်လမ်းၼိုင်ႈသေ လၢၵ်ႈၸၼ်ဢဝ် ထူင်ငိုၼ်း တီႈၼၢင်းယိင်းၼုမ်ႇ ၵေႃႉၼၼ်ႉၵႂႃႇ တီႈၼႃႈႁိူၼ်းမၼ်းၼၢင်း ပွၵ်ႉသၼ်သၢႆး မိူဝ်ႈၽွင်းမၼ်းၼၢင်း ဢဝ်ရူတ်ႉၶိူင်ႈဢွၵ်ႇ မႃးတၢင်းၼႃႈႁိူၼ်းၼၼ်ႉ။ ထိုင်တီႈ လၢၵ်ႈၸၼ်ထူင်ငိုၼ်းမၼ်းၼၢင်းၵႂႃႇႁႅင်းသေ လႆႈလူမ်ႉထူၵႂႃႇ ထိုင် တီႈၵွၵ်းႁူဝ်တႅၵ်ႇ လႆႈယဵပ်ႉ 4 ၶဵမ် ဝႃႈၼႆ။  

ပူၼ်ႉမႃး မိူဝ်ႈဝၼ်းတီႈ 13/12/2024 ယၢမ်းၵၢင်ၼႂ် 6:04 မူင်း ၸဝ်ႈၶွင်ႁၢၼ်ႉလႅၵ်ႈငိုၼ်း (ၸၢဝ်းၶႄႇ) ဢူးယၼ်ႇထိၼ်ႇၶျၢၼ်း (ဉီးရန်ထင်ချန်း) ဢႃယု 78 ပီ ၺႃးၸုမ်းဢမ်ႇႁူႉၾၢႆႇ တီႉၺွပ်းဢဝ်ပဵၼ်တူဝ်ယိူဝ်ႇ (ပြန်ပေးဆွဲ) ၵႂႃႇ တီႈၼႃႈႁိူၼ်းမၼ်းၸၢႆး ဢၼ်မီးၾၢႆႇၼႃႈယေးငိုၼ်း (ပၢၼ်ႇ) KBZ မၢႆ 2 ပွၵ်ႉမႄႈၶၢဝ် ဝဵင်းတႃႈၶီႈလဵၵ်း ထိုင်တီႈ ၸုမ်းဢမ်ႇႁူႉၾၢႆႇ ယွၼ်းငိုၼ်းၶႄႇ 7 သႅၼ်ယႂၼ်ႊ ႁႂ်ႈထုတ်ႇတူဝ်ဢွၵ်ႇၶိုၼ်း ဝႃႈၼႆ။

ၵူၼ်းတႃႈၶီႈလဵၵ်း ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “လႆႈႁူႉၶၢဝ်ႇဝႃႈ ၵူၼ်းႁၢႆႉၼၼ်ႉ ႁႂ်ႈၵူၼ်း ႁိူၼ်းလႅၵ်ႈငိုၼ်းၼၼ်ႉ ၵႂႃႇထုတ်ႇတူဝ်ဢွၵ်ႇ ငိုၼ်းၶႄႇ 7 သႅၼ်ယႂၼ်ႊ (မႅၼ်ႈငိုၼ်းထႆး 3 လၢၼ်ႉပၢႆ)။ လႆႈငိၼ်းဝႃႈ ပလိၵ်ႈၶဝ် ၶဝ်ႈၵႂႃႇယိုဝ်း ၵူၼ်းႁၢႆႉၼၼ်ႉတၢႆသေ ၸွႆႈဢဝ်ၵူၼ်းလႅၵ်ႈငိုၼ်းၼၼ်ႉ ဢွၵ်ႇမႃးလွတ်ႈၽႄးယဝ်ႉ။ ငိုၼ်းတႄႉ ဢမ်ႇလႆႈပၼ်”- ဝႃႈၼႆ။

ၵဵဝ်ႇၵပ်းလွင်ႈၼႆႉ တီႈသိုဝ်ႇၶၢဝ်ႇ Tachileik News Agency ဢွၵ်ႇဝႆႉတႄႉ ဝၼ်းတီႈ 18/12/2024 ယၢမ်းၵၢင်ၶမ်ႈ ပလိၵ်ႈမၢၼ်ႈႁူမ်ႈတင်း ၽူႈမီးပုၼ်ႈၽွၼ်း ၼႂ်းပွၵ်ႉယွမ်ႇသေ ၶဝ်ႈတီႉၺွပ်း ၵူၼ်းႁၢႆႉၼၼ်ႉ တီႈပွၵ်ႉပႃႇသၵ်း ဝဵင်းတႃႈၶီႈလဵၵ်း ထိုင်တီႈတင်းသွင်ၾၢႆႇ မီးလွင်ႈပိုတ်းယိုဝ်းၵၼ်သေ တၢင်းၾၢႆႇၵူၼ်းႁၢႆႉၼၼ်ႉ လႆႈလူႉတၢႆၵႂႃႇ 6 ၵေႃႉ ဝႃႈၼႆ။

“ယၢမ်းလဵဝ် တီႈဝဵင်းတႃႈၶီႈလဵၵ်းၼႆႉ ၸူၼ်လိူင်ႇၼမ် မိူဝ်ႈၼႆႉ ၵၢင်ၼႂ်ၸဝ်ႉ ၶဝ်ပေႃးလၢၵ်ႈၸၼ်(ၸူၼ်) ထႅင်ႈယဝ်ႉ။ ပလိၵ်ႈမၢၼ်ႈတႄႉ ၶႅၼ်ႇယူႇ လွင်ႈၸွပ်ႇၶၢဝ်ႇၵူၼ်းႁၢႆႉတႄႉ ၵူၺ်းၵႃႈ မီးတီႈၶဝ် ႁဵတ်းၵၢၼ် ဢမ်ႇႁဵတ်းၵၢၼ် မွၵ်ႈ ၼၼ်ႉၵူၺ်း။ ပေႃးၶဝ်ႁဵတ်းတႄႉ မၼ်းတီႉလႆႈယူႇ ၵူၼ်းႁၢႆႉ။ ပေႃးၶဝ် ဢမ်ႇၶႂ်ႈႁဵတ်းၵေႃႈ တီႉဢမ်ႇလႆႈသေပွၵ်ႈၼၼ်ႉ ၼႃႇ ပလိၵ်ႈၵေႃႈ လႅပ်ႈၶဝ်တေ မီးသုၼ်ႇလႆႈသုၼ်ပဵၼ်ၸွမ်းယူႇၵႃႈ ႁဝ်းထၢင်ႇတႄႉ”- ၵူၼ်းတႃႈၶီႈလဵၵ်း ၽူႈၸၢႆး ဢႃယုမွၵ်ႈ 30 ပီ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တီႈဝဵင်းတႃႈၶီႈလဵၵ်းၼႆႉ ဢမ်ႇမီးလွင်ႈႁူမ်ႇလူမ်ႈယဝ်ႉ ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ၸမ် 4 ပီ ၼႆႉ။ ၵူၼ်းတၢင်ႇတီႈသီႇလႅၼ် ပၢႆႈမႃးယူႇၼမ်။ ယဝ်ႉၵေႃႈ ပၢင်တေႃႇလွင်း၊ ယႃႈမဝ်းၵမ် ၸိူဝ်းၼႆႉ ၵေႃႈလိူင်ႇ။ ၵဵဝ်ႇလူၺ်ႈ လွင်ႈၽူႈလၵ်ႉၸၵ်ႉၶုတ်ႈ ၸိူင်ႉၼႆၼႆႉ ၶႂ်ႈဝႃႈမီးၵူႈဝၼ်းယဝ်ႉ ဝႃႈၼႆ။

“ႁဝ်းၶႃႈၼႆႉ ပေႃးၵၢင်ၶမ်ႈ 7 မူင်းၵႂႃႇၼႆ ဢမ်ႇႁတ်းဢွၵ်ႇႁိူၼ်းႁင်းၵူၺ်းယဝ်ႉ ၵူဝ်ၶႃႈဢေႃႈ။ တေႃႈၼင်ႇ ၵႂႃႇၵိုတ်းၸွမ်း ၼိူဝ်သဵၼ်ႈတၢင်းသီႇယႅၵ်ႇၾႆးလႅင်းၵူၺ်း ယင်းဢမ်ႇဝႆႉ ၶဝ်ယင်းလၢၵ်ႈၸၼ်ထူင်ငိုၼ်း။ ၸူၼ်ႁိမ်းဢဝ်ဢေႃႈ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်းလၢတ်ႈ။

ပူၼ်ႉမႃး မိူဝ်ႈဝၼ်းတီႈ 13/11/2024 ယၢမ်းၵၢင်ၼႂ်မွၵ်ႈ 10 မူင်း ၼၼ်ႉၵေႃႈ မီးၸုမ်းဢမ်ႇႁူႉၾၢႆႇ ၽူႈၸၢႆး 4 ၵေႃႉ သွၼ်ႉရူတ်ႉၶိူင်ႈ မႃးၸွမ်းသွင်လမ်း ၶဝ်ႈၸူၼ်ၼႂ်းႁၢၼ်ႉၶၢႆၾူၼ်း First Rate ဢၼ်ပိုတ်ႇဝႆႉ တီႈပွၵ်ႉပႃႇလႅင် ဝဵင်းတႃႈ ၶီႈလဵၵ်း ၼၼ်ႉၵေႃႈ ၵူၼ်းႁဵတ်းၵၢၼ်တီႈႁၢၼ်ႉၶၢႆၾူၼ်းၼၼ်ႉ ၺႃးယိုဝ်းတၢႆ ၵေႃႉၼိုင်ႈ ဝႃႈၼႆ။