ပလိၵ်ႈထႆး ၸႄႈတွၼ်ႈၵဵင်းႁၢႆး ပိုၼ်ၽၢဝ်ႇဝႃႈ တီႉလႆႈၵူၼ်းလုၵ်ႉတၢင်းၾင်ႇမိူင်းမၢၼ်ႈ ၶဝ်ႈမႃးၵဵပ်းတၢင်းလူႇ ၼႂ်းၵၢတ်ႇသၼ်လူမ်းၵျွႆး ဝဵင်းမႄႈသၢႆ တႃႇဢဝ်မိူဝ်းၸွႆႈထႅမ် ၵူၼ်းထူပ်းၽေးၼမ်ႉ တၢင်းၾင်ႇဝဵင်းတႃႈၶီႈလဵၵ်း တင်းမူတ်း မီး 18 ၵေႃႉ ဢဝ်တၢင်ႇၵႃး သူင်ႇပွၵ်ႈမိူဝ်းၶိုၼ်းမူတ်းယဝ်ႉ ဝႃႈၼႆ။
ဝၼ်းတီႈ 17/12/2024 ယၢမ်းၵၢင်ၶိုၼ်း ၽွင်းၸဝ်ႈၼႃႈတီႈ ၾၢႆႇႁူမ်ႇလူမ်ႈ ၾင်ႇၸႄႈဝဵင်းမႄႈသၢႆ လႆႈလူင်းပိုၼ်ႉတီႈၵူတ်ႇထတ်း ၼႂ်းပွၵ်ႉယွမ်ႇ ဝၢၼ်ႈဢိူင်ႇၼၼ်ႉ လႆႈႁၼ်ၵူၼ်းဝၢၼ်ႈ ၸိူဝ်းမႃးယွၼ်းၶူဝ်းၶွင်ၵိၼ်ယႅမ်ႉလႄႈ ၶူဝ်းၼုင်ႈတၢင်းဝႆ ၼႂ်းၵၢတ်ႇသၼ်လူမ်းၵျွႆး ၸႄႈဝဵင်းမႄႈသၢႆ။ ၵူၼ်းၸုမ်းၼႆႉ ပဵၼ်ၼၢင်းယိင်း 13 ၵေႃႉ ၵူၼ်းၸၢႆး ၵေႃႉၼိုင်ႈလႄႈ လုၵ်ႈဢွၼ်ႇ 4 ၵေႃႉ။ ၸိူဝ်းၶဝ် ပႃးတင်းထူင်သႂ်ႇၶူဝ်းၶွင် သမ်ႉပေႃးတဵမ်ႁင်းၽႂ်မၼ်း။
ၵူၼ်းၸုမ်းၼႆႉ လၢတ်ႈတီႈပလိၵ်ႈဝႃႈ – ၸိူဝ်းၶဝ် လုၵ်ႈတၢင်းၾင်ႇတႃႈၶီႈလဵၵ်းမႃး။ ဢဝ်ဝႂ်ၶၢမ်ႈၶူဝ် ယွၼ်းၶႂၢင်ႉဢႅဝ်ႇယဵမ်ႈမိူင်းထႆး 7 ဝၼ်းၼၼ်ႉသေ ၶဝ်ႈမိူင်းထႆး မိူဝ်ႈဝၼ်းတီႈ 16/12/2024 ၼၼ်ႉမႃး။ မႃးယွၼ်းလူႇၶၢမ်ႇၶူဝ်းၶွင်ၵိၼ်ယႅမ်ႉလႄႈ ၶူဝ်းၸႂ်ႉၶူဝ်းသွႆၼႂ်းၵၢတ်ႇသၼ်လူမ်းၵျွႆး။ တႃႇဢဝ်မိူဝ်းၶိုၼ်း ၸႅၵ်ႇပၼ်ၵူၼ်းတၢင်းဝၢၼ်ႈ ၸိူဝ်းထူပ်းၽေးၼမ်ႉထူမ်ႈ 2 လိူၼ်ပူၼ်ႉမႃး – ဝႃႈၼႆ။
ပလိၵ်ႈထႆးလၢတ်ႈဝႃႈ – ၸွမ်းၼင်ႇ ၶေႃႈတူၵ်းလူင်း လူင်ပွင်ၸိုင်ႈ သွင်ၸိုင်ႈမိူင်းသေ လွင်ႈပၼ်ဢၼုယၢတ်ႈ ၶၢမ်ႈလႅၼ်လိၼ်ၼၼ်ႉ ပဵၼ်ၼႂ်းႁူဝ်ၶေႃႈ 1- သူႇၸႂ်းပီႈၼွင်ႉ ၊ 2- ဢႅဝ်ႇယဵမ်ႈတွင်ႈတဵဝ်း၊ 3- ၵၢၼ်လူင်ပွင်ၸိုင်ႈ၊ 4- ၵၢၼ်ငၢၼ်း ၊ 5- ၶေႉၶဵင်ႇလဵၼ်ႈႁႅင်း၊ 6- ၵၢၼ်ငၢၼ်းလမ်ႇလွင်ႈၵႂႃႇမႃး ဝၼ်းလဵဝ်၊ 7- ၶဝ်ႈႁူမ်ႈပၢင်ၵုမ် ပၢင်သွၼ် ဢမ်ႇၼၼ် ၵၢၼ်ငၢၼ်း ဢၼ်သွင်ၾင်ႇၸိုင်ႈမိူင်းႁူမ်ႈၵၼ်ႁဵတ်း ၸိူဝ်းၼႆႉၵူၺ်း – သိုဝ်ႇၶၢဝ်ႇထႆး ဢွၵ်ႇဝႆႉၼင်ႇၼႆ။
