ၼႂ်းၶၢဝ်းတၢင်း 2 ဝူင်ႈမႃးၼႆႉ ၵူၼ်းၼုမ်ႇ ၼႂ်းတိူင်းဝဵင်းလိူဝ်ႇ (မၼ်းတလေး) 100 ပၢႆ ၺႃးသိုၵ်းမၢၼ်ႈ – ပလိၵ်ႈမၢၼ်ႈ တီႉၺွပ်း ဢဝ်ၵႂႃႇႁၢပ်ႇၵၢၼ်သိုၵ်း ဝႃႈၼႆ။

ၸုမ်းလုၵ်ႉၽိုၼ်ႉသၢၼ်ၶတ်း (သပိတ်အင်အားစု) ဝဵင်းလိူဝ်ႇ ပိုၼ်ၽၢဝ်ႇၼႂ်းဝၼ်းတီႈ 16/12/2024 ၼႆႉဝႃႈ – တႄႇဢဝ်ဝၼ်းတီႈ 1 တေႃႇထိုင်ဝၼ်းတီႈ 15 ၼႆႉ ၵူၼ်းၼုမ်ႇ ၼႂ်းၸႄႈဝဵင်းဢွင်ႇမျေႇတႃႇၸၢၼ်ႇ၊ ၶျၢၼ်းဢေးတႃႇၸၢၼ်ႇ၊ မႁႃႇ ဢွင်ႇမျေႇ၊ ၶျၢၼ်းမျႃႉတႃႇၸီႇ၊ ပျီႇၵျီးတၶုၼ်ႇ၊ ဢမရပူႇရလႄႈ ၸႄႈဝဵင်းပတဵင်ႇၵျီး ၸိူဝ်းၼႆႉ ၺႃးသိုၵ်းမၢၼ်ႈ တီႉၺွပ်း ၵႂႃႇ 125 ၵေႃႉ ဝႃႈၼႆ။

ၼႂ်းၼၼ်ႉ ဢၼ်ၺႃးတီႉၺွပ်း ၼမ်လိူဝ်ပိူၼ်ႈသုတ်း ပဵၼ်ၼႂ်းၸႄႈဝဵင်းပျီႇၵျီးတၶုၼ်ႇ၊ ပတဵင်ႇၵျီးလႄႈ ဢွင်ႇမျေႇတႃႇ ၸၢၼ်ႇ တင်းမူတ်း ၺႃးတီႉၺွပ်း 90 ပၢႆ ၼႆယဝ်ႉ။

သိုၵ်းမၢၼ်ႈ – ပလိၵ်ႈမၢၼ်ႈတင်း ပျီႇတူႉၸိတ်ႉ ႁူမ်ႈၵၼ် ပၼ်ႇလဵပ်ႈယၢမ်းၵၢင်ၶိုၼ်းသေ ၵူတ်ႇထတ်းတီႉၺွပ်း ၵူၼ်း ၼုမ်ႇ ၼႄၶေႃႈဢၢင်ႈဝႃႈ ၵူတ်ႇထတ်းသဵၼ်ႈမၢႆၶႅၵ်ႇၼႆသေ ၶဝ်ႈတီႉၺွပ်းၵႂႃႇၵေႃႈမီး – ၵူၼ်းဝဵင်းလိူဝ်ႇ ၵေႃႉၼိုင်ႈလၢတ်ႈ။

လိူဝ်ၼၼ်ႉ ၸွမ်းႁၢၼ်ႉတၢင်းၵိၼ် ၼႂ်းဝဵင်းလိူဝ်ႇ ၸိူဝ်းၼႆႉၵေႃႈ ၽူႈပၼ်ၶၢဝ်ႇသိုၵ်းမၢၼ်ႈ ပႂ်ႉတူၺ်းၸွမ်း ၵူၼ်းၼုမ်ႇ ဢၼ်တေလႆႈတီႉၺွပ်းၼၼ်ႉသေ ပႂ်ႉတီႉၺွပ်းဢဝ်ၵႂႃႇၸွမ်းတၢင်း ၵေႃႈမီး။

ၵူၼ်းၼုမ်ႇ ၸိူဝ်းၺႃးသိုၵ်းမၢၼ်ႈ တီႉၺွပ်းၵႂႃႇၼၼ်ႉ ၵမ်ႈၽွင်ႈပၼ်ငိုၼ်းသေ လွတ်ႈဢွၵ်ႇမႃးၶိုၼ်းသေတႃႉ မၢင်ၸိူဝ်း ၶၢတ်ႇဝႆႉလွင်ႈၵပ်းသိုပ်ႇၵၼ်တင်း ပီႈၼွင်ႉၵူၼ်းႁိူၼ်း။

ယၢမ်းလဵဝ် လွင်ႈတီႉၺွပ်းၵူၼ်းၼုမ်ႇ ၵႂႃႇႁၢပ်ႇၵၢၼ်သိုၵ်းၼမ်ၶိုၼ်ႈမႃးလႄႈ ႁႂ်ႈၾၢင်ႉလွင်ႈၵႂႃႇလႄႇပွႆးလၢမ်းလႄႈ ဢွၵ်ႇၶၢဝ်းတၢင်း ၸိူဝ်းၼႆႉ – ၸုမ်းလုၵ်ႉၽိုၼ်ႉသၢၼ်ၶတ်း ဝဵင်းလိူဝ်ႇ တိုၵ်းသူၼ်းဝႆႉၼင်ႇၼႆ။

တေႃႇထိုင် လိူၼ်ၼူဝ်ႊဝႅမ်ႊပိူဝ်ႊသဵင်ႈ ပူၼ်ႉမႃးၼႆႉ သိုၵ်းမၢၼ်ႈ ပၼ်ပၢင်သွၼ်ၵၢၼ်သိုၵ်း ယဝ်ႉၵႂႃႇထိုင် ၸုပ်ႈထီႉ (5) ။ တိုၵ်ႉသိုပ်ႇပၼ်ပၢင်သွၼ်ၵၢၼ်သိုၵ်းဝႆႉထႅင်ႈ ၸုပ်ႈထီႉ (6) တင်း ၸုပ်ႈထီႉ (7) – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။