သိုၵ်းမၢၼ်ႈ ယိုတ်းမိူင်းတင်း ၸုမ်းပျီႇတူႉၸိတ်ႉလူင်ထၢင် လႆႈပိုတ်းယိုဝ်းၵၼ် ၵမ်းၼိုင်ႈ တီႈဝဵင်းမူႇၸေႊ ၵဵဝ်ႇလူၺ်ႈ ဢဝ်ႁူမ်ႇလူမ်ႈပၼ် ၸုမ်းၵျႃးၽႅၼ်ႉ ဝႃႈၼႆ။

ဝၼ်းတီႈ 16/12/2024 ယၢမ်းဝၢႆးဝၼ်း သိုၵ်းမၢၼ်ႈႁူမ်ႈတင်း ပျီႇတူႉၸိတ်ႉမဵဝ်ႉမသေ ၶဝ်ႈတီႉၺွပ်း ၸုမ်းၵျႃးၽႅၼ်ႉ တီႈပွၵ်ႉမၢၼ်ႈဝဵင်း ၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇသေ လႆႈပိုတ်းယိုဝ်းၵၼ် တင်းၸုမ်းပျီႇတူႉၸိတ်ႉလူင်ထၢင် ဢၼ်ဢဝ်ႁူမ်ႇလူမ်ႈဝႆႉပၼ် ၸုမ်းၵျႃးၽႅၼ်ႉၼၼ်ႉ။  

ၵူၼ်းမူႇၸေႊ ၽူႈၸၢႆးဢႃယု 30 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၶဝ်ယိုဝ်းၵၼ် ၵမ်းၼိုင်ႈဢေႃႈ။ သိုၵ်းမၢၼ်ႈတင်း ပျီႇတူႉၸိတ်ႉလူင်ထၢင်။ သိုၵ်းမၢၼ်ႈ တီႉလႆႈၵႂႃႇ ၸုမ်းၵျႃးၽႅၼ်ႉၼမ်ဢေႃႈ ၵူၺ်းၵႃႈ ႁူဝ် ၵူၼ်းမီးၵႃႈႁိုဝ်တႄႉ ပႆႇ ႁူႉ။ ယွၼ်ႉၸုမ်းၵျႃးၽႅၼ်ႉ ၸိူဝ်းၼၼ်ႉ ဢမ်ႇသၢင်းလႆႈၶွၼ်ႇတဵမ်ထူၼ်ႈ ၶႃႈယူဝ်ႉ ထိုင်တီႈသိုၵ်းမၢၼ်ႈ ႁူမ်ႈတင်း ပျီႇတူႉၸိတ်ႉမဵဝ်ႉမၶဝ် ပေႃးလႆႈၶဝ်ႈၵႂႃႇတီႉၸိူင်ႉၼၼ်”- ဝႃႈၼႆ။

ဢွင်ႈတီႈ ဢၼ်သိုၵ်းမၢၼ်ႈ ႁူမ်ႈတင်း ပျီႇတူႉၸိတ်ႉမဵဝ်ႉမ ၶဝ်ႈတီႉၺွပ်း ၸုမ်းၵျႃးၽႅၼ်ႉၼၼ်ႉ ပဵၼ်တၢင်းယွမ်ႇပၢင်ႇလူင်မႂ်ႇ၊ ပၢင်ႇလူင်ၵဝ်ႇလႄႈ တၢင်းယွမ်ႇႁေႃၽီၶႄႇ (မျေႃႇၶႄႇ) ၼႂ်းပွၵ်ႉမၢၼ်ႈဝဵင်း ၸိူဝ်းၼႆႉ။

“ၼႂ်းဝၼ်းတီႈ 16 ယၢမ်းၵၢင်ၼႂ် ၼၼ်ႉၵေႃႈ ၶဝ်တီႉၺွပ်း ၼႂ်းႁိူၼ်းလင်ၼိုင်ႈ တီႈယွမ်ႇႁူဝ်ၼႃး သဵၼ်ႈတၢင်းၵႂႃႇပွၵ်ႉပၢႆးၸၢၵ်း။ တီႉလႆႈၵႂႃႇၸုမ်းၵျႃးၽႅၼ်ႉလၢႆၵေႃႉ ဢၼ်ၶဝ်မႃးၶၢတ်ႈႁိူၼ်း ယူႇဝႆႉတီႈၼၼ်ႈ။ ယၢမ်းလဵဝ် ႁိူၼ်းလင်ၼၼ်ႉ လႆႈထုၵ်ႇပိၵ်ႉဝႆႉယဝ်ႉ။ တၢင်းယွမ်ႇႁူဝ်ၼႃး – ယွမ်ႇပၢႆးၸၢၵ်ႈၼၼ်ႉ ႁိူၼ်းယေး ဢၼ်လႆႈထုၵ်ႇပိၵ်ႉဢိုတ်း ယွၼ်ႉၸုမ်း ၵျႃးၽႅၼ်ႉၼႆႉ ၶႂ်ႈဝႃႈဝႆႉတင်းၼမ်ယဝ်ႉ”- ၵူၼ်းမူႇၸေႊ သိုပ်ႇ လၢတ်ႈၼႄၼင်ႇၼႆ။

ယၢမ်းလဵဝ် တီႈဝဵင်းမူႇၸေႊၼႆႉ ၵူၼ်းမိူင်းၶႄႇ မႃးၶၢတ်ႇၸွမ်းႁူင်းႁႅမ်းသေ ႁဵတ်းပၢင်တေႃႇလွင်း၊ ၵၢၼ်လႅၼ်ၵိၼ်ငိုၼ်းတၢင်းဢွၼ်ႊလၢႆႊ ၸိူဝ်းၼႆႉ မီးတင်းၼမ်ယဝ်ႉ။ ၸိူဝ်းၶၢတ်ႈႁိူၼ်းယေးသေ ႁဵတ်းၵေႃႈ မီးၼမ် ၼႆယဝ်ႉ။

တႄႇဢဝ် ႁၢင်လိူၼ်တီႊသႅမ်ႊပိူဝ်ႊၼႆႉမႃး ပလိၵ်ႈမၢၼ်ႈသိုၵ်းမၢၼ်ႈ လူင်းပိုၼ်ႉတီႈ ၵူတ်ႇထတ်းတီႉၺွပ်း ၸုမ်းၵျႃး ၽႅၼ်ႉ တီႈဝဵင်းမူႇၸေႊမႃးႁၢဝ်ႈႁႅင်း ယွၼ်ႉၾင်ႇမိူင်းၶႄႇ မိပ်ႇဢီးမႃးထႅင်ႈႁိုဝ် ဢမ်ႇႁူႉ – ၽူႈတူင်ႉၼိုင် ၵၢၼ်တူင်ႇဝူင်းၵူၼ်း ၼႂ်းဝဵင်းမူႇၸေႊ ၵေႃႉၼိုင်ႈလၢတ်ႈ။

တႄႇဢဝ် ဝၼ်းတီႈ 22/09/2024 ၼၼ်ႉမႃး ပလိၵ်ႈမၢၼ်ႈသိုၵ်းမၢၼ်ႈ ၵူတ်ႇထတ်းတီႉၺွပ်း ၸုမ်းၵျႃးၽႅၼ်ႉ ၼႂ်းဝဵင်းမူႇၸေႊ ႁၢဝ်ႈႁႅင်း ၶၢဝ်းတၢင်း 3 ဝၼ်း တီႉၺွပ်းလႆႈ 500 ပၢႆ ၼႂ်းၼၼ်ႉ ပႃးၵူၼ်းမိူင်းမၢၼ်ႈ ၶိုင်ႈၼိုင်ႈ ယွၼ်ႉၾင်ႇမိူင်း ၶႄႇ မိပ်ႇဢီးမႃး ဝႃႈၼႆ။

ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်ၶႄႇ ဝဵင်းၼိုင်ႈ၊ ပဵၼ်ဝဵင်းၵူၼ်းၵိုၼ်းငိုၼ်းၶွၼ်ႈ ဝဵင်းၵႃႉၶၢႆ ႁဵတ်းၵၢၼ်ပၢႆးမၢၵ်ႈမီး ၵေႃႈၸႂ်ႈ။ ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်းမိူင်းမႃး ၶၢဝ်းတၢင်းၸမ် 4 ပီၼႆႉ ၵူၼ်းမိူင်းၶႄႇ ၶဝ်ႈမႃးႁဵတ်း ၵၢၼ် ပိုတ်ႇပၢင်တေႃႇလွင်း၊ လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ (ၸုမ်းၵျႃးၽႅၼ်ႉ) တီႈမူႇၸေႊၼႆႉ တင်းၼမ်။

ယွၼ်ႉၽႅၼ်ယၼ်ႇသိုၵ်း 1027 ၼၼ်ႉမႃးသေ ႁဵတ်းႁႂ်ႈၸုမ်းၵျႃးၽႅၼ်ႉ ဢၼ်ပၵ်းယူႇဝႆႉ တၢင်းမိူင်းတႆး ပွတ်းႁွင်ႇ လႅၼ်လိၼ်တႆး – ၶႄႇ ၸိူဝ်းၼၼ်ႉ ဢွၼ်ၵၼ်ပၢႆႈႁွတ်ႈထိုင် တၢင်းမိူင်းတႆးပွတ်းၸၢၼ်း – ပွတ်းဢွၵ်ႇၶူင်း ၸိူဝ်းဢွင်ႈတီႈ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းလႄႈ ၸုမ်းပျီႇတူႉၸိတ်ႉ ၵုမ်းၵမ်ဝႆႉ ၸိူဝ်းၼၼ်ႉ  ထႅင်ႈတင်းၼမ်။