ၵၢင်ႉၵႄႇဝဵင်းသီႇသႅင်ႇ ဢၼ်ထုၵ်ႇၸုမ်းပျီႇတူႉၸိတ်ႉ PNO တီႉၺွပ်းၵႂႃႇၼၼ်ႉ ၵူၼ်းဝၢၼ်ႈၵူၼ်းႁိူၼ်း လႆႈဢဝ်ငိုၼ်း ၵႂႃႇထုတ်ႇတူဝ်သေ ၸင်ႇပူၼ်ႉလွတ်ႈမႃးၶိုၼ်း။
ၵူၼ်းဝၢၼ်ႈသၢႆးၶၢဝ် ၸႄႈဝဵင်းသီႇသႅင်ႇ ဢၼ်ႁွတ်ႈထိုင် ဝဵင်းလူင်တူၼ်ႈတီး လၢတ်ႈၽူႈတွႆႇႁွၵ်ႈဝႃႈ – “ဝၼ်းတီႈ 11/12/2024 ယၢမ်းၵၢင်ၶမ်ႈ ၵၢင်ႉၵႄႇဝၢၼ်ႈတူၺ်ပူး လွတ်ႈမႃးၶိုၼ်းယဝ်ႉ ၵူၼ်းဝၢၼ်ႈလႄႈ လုၵ်ႈလၢင်းၼၢင်းမေး လႆႈ ၵႂႃႇပၼ်ငိုၼ်းသႅၼ် 600 သႅၼ်ပျႃး။ တီႈတႄႉမၼ်းပျီႇတူႉၸိတ်ႉၶဝ် ၶႂ်ႈလႆႈငိုၼ်းလႄႈ တီႉၺွပ်းၵႂႃႇၵူၺ်း”- ဝႃႈၼႆ။
ၵၢင်ႉၵႄႇ ဢၼ်ၺႃးပျီႇတူႉၸိတ်ႉ PNO တီႉၺွပ်းၵႂႃႇၼႆႉ ပဵၼ်ၵၢင်ႉၵႄႇဝၢၼ်ႈတူၺ်ပူး ၸိုင်ႈႁွင်ႉ ၽျႃးၻူင်းၵျေႃႇ (ဖြားဒုံးကျော်) ။ ၺႃးတီႉၺွပ်းၵႂႃႇ မိူဝ်းဝၼ်းတီႈ 07/12/2024 ယၢမ်းၵၢင်ၶမ်ႈ 11 မူင်း (https://shannews.org/archives/60350) တီႉၺွပ်းယွၼ်ႉသင်ၼႆ ပျီႇတူႉၸိတ်ႉပဢူဝ်း ဢမ်ႇလၢတ်ႈသင်။ ၶိုၼ်ႈ ႁိူၼ်းမႃးသေ မႃးတီႉၺွပ်းၵႂႃႇ ၸိူင်ႉၼၼ်ၵူၺ်း – ဝႃႈၼႆ။
ၵဵဝ်ႇလွင်ႈၵဵပ်းငိုၼ်းတွင်းသေ ၸင်ႇပွႆႇတူဝ်ပၼ်ၶိုၼ်းၼႆႉ – ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး ၽူႈၶၢၼ်ပၢၵ်ႇ PNO ၵေႃႈ ၵပ်းသိုပ်ႇဢမ်ႇလႆႈ။ တီႈဝၢၼ်ႈသၢႆးၶၢဝ်ၵေႃႈ ဢမ်ႇမီးလႅင်းၾူၼ်း (သၼ်ယႃးၾူၼ်း) လႄႈ ၵပ်းသိုပ်ႇႁႃၵူၼ်းၼႂ်းဝၢၼ်ႈၵေႃႈ ဢမ်ႇလႆႈ။
ၵူၼ်းၼုမ်ႇ ဝၢၼ်ႈသၢႆးၶၢဝ် လၢတ်ႈၽူႈတွႆႇႁွၵ်ႈဝႃႈ -“ထၢင်ႇတေၵဵဝ်ႇလွင်ႈၵဵပ်းၵူၼ်း သိုၵ်းၼႆႉၵူၺ်း။ ၽွင်းဢမ်ႇပဵၼ်ပၢင်တိုၵ်းၼၼ်ႉ တီႈဝၢၼ်ႈသၢႆးၶၢဝ်ၼႆႉ သိုၵ်း PLNA တူင်ႉၼိုင်။ ယၢမ်းလဵဝ် PNO ၶဝ်ႈမႃးတူင်ႉၼိုင်။ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ။ လွင်ႈတီႉၺွပ်းၵၢင်ႉၵႄႇၼႆႉၵေႃႈ ၶဝ်ၼႄးဝႃႈ ၵၢင်ႉၵႄႇ ဢမ်ႇႁႃ ၵူၼ်းသိုၵ်းမႂ်ႇပၼ်ၶဝ် ၼႆၼၼ်ႉၵူၺ်း ”- ဝႃႈၼႆ။
မိူဝ်ႈဢွၼ်တၢင်းၵေႃႈ ပျီႇတူႉၸိတ်ႉပဢူဝ်း တီႉၺွပ်းၵၢင်ႉၵႄႇ ဝၢၼ်ႈၼွင်ယဵၼ်း ဢၼ်မီးၾၢႆႇၸၢၼ်း ဝဵင်းသီႇသႅင်ႇသေ ၶႃႈႁႅမ်ပႅတ်ႈၵေႃႈ ယၢမ်ႈမီးမႃးယဝ်ႉ – ၵူၼ်းပိုၼ်ႉတီႈလၢတ်ႈ။
ယၢမ်းလဵဝ် တီႈဝဵင်းသီႇသႅင်ႇၼႆႉ ၸုမ်းပျီႇတူႉၸိတ်ႉပဢူဝ်း PNO ႁွင်ႉၶိုၼ်း လုၵ်ႈၸုမ်းၵဝ်ႇ ၶဝ်ႈႁၢပ်ႇၵၢၼ်ၶိုၼ်း၊ ၵူၼ်း ၵဝ်ႇမၢင်ၸိူဝ်း ဢမ်ႇၶႂ်ႈၶဝ်ႈသိုၵ်းၶိုၼ်းလႄႈ ဢွၼ်ၵၼ်ပၢႆႈ ၵႂႃႇမိူင်းထႆးၵေႃႈမီး – ၵူၼ်းပိုၼ်ႉတီႈလၢတ်ႈ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ