သိုၵ်းမၢၼ်ႈ ပႂ်ႉၵဵပ်းၶွၼ်ႇၸဝ်ႈသူၼ်ဢွႆႈ ၸွမ်းၵဵတ်ႉ/ လၢၼ်ႇ ၼမ်ႁႅင်း တၢင်းၶဝ်ႈဢွၵ်ႇဝဵင်းတၢင်ႉယၢၼ်း ၼိုင်ႈတီႈလႂ် လႆႈပၼ်ဢမ်ႇယွမ်း 3 မိုၼ်ႇပျႃး။  

ယၢမ်းလဵဝ် ၸဝ်ႈသူၼ်ဢွႆႈ တီႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ဢွၼ်ၵၼ် ထူပ်းလွင်ႈယၢပ်ႇၽိုတ်ႇတႃႇတေႃႉတၢင်ႇၶၢႆဢွႆႈ ယွၼ်ႉသိုၵ်းမၢၼ်ႈ ယိုတ်းမိူင်း ပႂ်ႉၵဵပ်းၶွၼ်ႇယွၼ်းငိုၼ်း ၸွမ်းၵဵတ်ႉ/ လၢၼ်ႇ ဝႃႈၼႆ။

ၸဝ်ႈသူၼ်ဢွႆႈ ဝဵင်းတၢင်ႉယၢၼ်း လၢတ်ႈၽူႈတွႆႇႁွၵ်ႈဝႃႈ – “ဢွႆႈၼႆႉ ပေႃးဝႃႈတၢင်ႇဢွၵ်ႇဝဵင်းတၢင်ႉယၢၼ်းမႃးယဝ်ႉ ၼႆၵေႃႈ ၺႃးၵဵတ်ႉမၢၼ်ႈ တီႈၼၼ်ႈလႆႈပၼ် 7 မိုၼ်ႇ။ ပေႃးထိုင်တီႈႁိမ်းၵွင်းမူး လွႆယွႆးသမ်ႉ လႆႈပၼ်ထႅင်ႈ 3 မိုၼ်ႇ။ တီႈမၢၼ်ႈၵၢတ်ႈသမ်ႉ လႆႈပၼ်ထႅင်ႈ 5 မိုၼ်ႇ။ ၵမ်းၼႆႉ ပေႃးထိုင်ထႅင်ႈ တီႈတၢင်းၽႄႁူဝ်ယ မိူင်းယႆသမ်ႉ လႆႈပၼ်ထႅင်ႈ။ လိူဝ်ၼၼ်ႉ ၽူႈၵွၼ်းတိူင်းသိုၵ်းမၢၼ်ႈ (တိုင်းမှူး)ၵေႃႈ လႆႈပၼ်ဢမ်ႇယွမ်းသႅၼ်”- ဝႃႈၼႆ။

လိူဝ်ၼၼ်ႉ ၼႂ်းပီၼႆႉ ၵႃႈႁႅင်း ၶၼ်ၾုၼ်ႇထၢတ်ႈ ၸိူဝ်းၼႆႉ ၵႃႈၶိုၼ်ႈႁႅင်း။ ယွၼ်ႉၼၼ် ၸဝ်ႈသူၼ်ၶဝ် လႆႈလူင်းတိုၼ်းလၢင်းၼမ်လိူဝ် ၵူႈပီ။ ၶၼ်ဢွႆႈပီၼႆႉသမ်ႉ ဢမ်ႇလႆႈၵႃႈလႄႈ တႃႇၸဝ်ႈသူၼ်ၶဝ်တႄႉ ဢမ်ႇပေႃးမီးၼမ်ႉမႅတ်ႉၼမ်ႉတွၼ်းသင်။

“ၶၼ်ဢွႆႈၵေႃႈ ဢမ်ႇလႆႈၼင်ႇၸႂ်။ ၼိုင်ႈတၼ်ႊၼႆႉ လႆႈ 170,000 ပျႃးၵူၺ်း။ ပေႃးမႃးထွၼ်ၵႃႈၵႃး၊ ၵႃႈၵဵတ်ႉ ၸိူဝ်းၼႆႉယဝ်ႉ ဢမ်ႇလိူဝ်သင်ယဝ်ႉ။ ဢၼ်ၼႆႉ ပဵၼ်ၵႃးသုၼ်ႇတူဝ်ႁဝ်းၶႃႈ တေႃႉတၢင်ႇၵွၼ်ႇ။ သင်ဢမ်ႇမီးၵႃး သုၼ်ႇတူဝ်တေႃႉတၢင်ႇၼႆ ၶႅၼ်းတေဢမ်ႇလႆႈသင်ယဝ်ႉ။ ပီၼႆႉ သင်လႆႈၶိုၼ်းတိုၼ်း လၢင်းသေ လိူဝ်ဢိတ်းဢွတ်းၵူၺ်းတႄႉ တေလႆႈဝႃႈမၢၼ် ၵၢမ်ႇလီၼႃႇယဝ်ႉ”- ၸဝ်ႈသူၼ်ဢွႆႈ ဝဵင်း တၢင်ႉယၢၼ်း သိုပ်ႇလၢတ်ႈၼႄၼင်ႇၼႆ။

ဢွႆႈ ဢၼ်ဢွၵ်ႇတီႈဝဵင်းတၢင်ႉယၢၼ်းၼႆႉ ၵမ်ႈၼမ် လႆႈသူင်ႇၶၢႆၸူးတၢင်းဝဵင်းမိူင်းယႆ။ ၵူႈပွၵ်ႈ ၽွင်း ဝၢၼ်ႈမိူင်းလီတႄႉ လႆႈသူင်ႇၶၢႆၸူးပႃး တၢင်းလႅၼ်လိၼ်မိူင်းၶႄႇ ၸိူဝ်းၼၼ်ႉသေတႃႉ ယၢမ်းလဵဝ် သဵၼ်ႈတၢင်းမၢင်တီႈ မီးၸုမ်းသိုၵ်းလၢႆမူႇၸုမ်း ပႂ်ႉၵူတ်ႇထတ်းႁၢဝ်ႈႁႅင်း ၸွမ်းသဵၼ်ႈတၢင်းလႄႈ ၸဝ်ႈ သူၼ်ၶဝ် မီးလွင်ႈယၢပ်ႇ လႆႈမႆႈၸႂ်တႃႇႁႃၵိၼ်လဵင်ႉတွင်ႉ တႃႇမိူဝ်းၼႃႈ ၼႆယဝ်ႉ။