ဝၼ်းတီႈ 10/12/2024 ယၢမ်းၵၢင်ၼႂ်မွၵ်ႈ 9 မူင်း ၸဝ်ႈၼႃႈတီႈ တီႉၺွပ်းလႆႈ ၵူၼ်းမိူင်းၶႄႇ 50 ပၢႆ ၼႂ်းသူၼ်တီႈၼိုင်ႈ ဝၢၼ်ႈလွႆသထူင်ႇ ဢိူင်ႇဝၢၼ်ႈလူင် ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။
ၵူၼ်းမိူင်းၶႄႇ 50 ပၢႆၼၼ်ႉ ၵမ်ႈၼမ် ပဵၼ်ၽူႈၸၢႆး၊ ၼၢင်းယိင်းၵေႃႈ ပႃးၽွင်ႈ။ ၵူၼ်းပိုၼ်ႉတီႈလၢတ်ႈဝႃႈ ၸိူဝ်းၶဝ်ပဵၼ် ၵူၼ်းမိူင်းၶႄႇ ဢၼ်ၶၢႆႉၵႂႃႇႁဵတ်းၵၢၼ်တီႈၼိုင်ႈယဝ်ႉတီႈၼိုင်ႈ။ ၸိူဝ်းၶဝ်တိုၵ်ႉလုၵ်ႉတၢင်း မိူင်းလၢဝ်း၊ ဝႅတ်ႉၼၢမ်းလႄႈ ၵမ်ႇပူးၶျႃး ၸိူဝ်းၼၼ်ႉသေ ၶဝ်ႈမႃးတၢင်းတႃႈၶီႈလဵၵ်းၼႆႉ။ ၵမ်ႈၼမ် ဢမ်ႇမီး ဝတ်းဝႂ်မၢႆၾၢင်သင် ဝႃႈၼႆ။
ၵူၼ်းၸၢႆးပိုၼ့်တီႈဝဵင်းတႃႇၶီႈလဵၵ်းလၢတ်ႈၽူႈတွႆႇႁွၵ်ႈဝႃႈ – “ၸဝ်ႈၼႃႈတီႈပလိၵ်ႈ၊ ပျီႇတူႉၸိတ်ႉ ႁူမ်ႈၵၼ် တီႉၺွပ်းလႆႈ ၵူၼ်းမိူင်းၶႄႇ 50 ၵေႃႉၼႆႉ။ ၶဝ်ႁဵတ်းၵၢၼ်သင်တႄႉတႄႉ ဢမ်ႇႁူႉ။ ၵူၺ်းၵႃႈ တၢင်းလွႆသထူင်ႇၼၼ်ႉတႄႉ ပေႃးပဵၼ်ၶႄႇၸိူင်ႉၼႆမႃးယူႇၼႆ ၵမ်ႈၼမ် ပဵၼ်ၵူၼ်းႁဵတ်းၵၢၼ်ၵျႃးၽႅၼ်ႉ ဢမ်ႇၼၼ် ၵဵဝ်ႇၶွင်ႈတၢင်းၵၢၼ်ၶုတ်းၶမ်း။ ယၢမ်းလဵဝ် ၵျႃးၽႅၼ်ႉၵေႃႈ ၶိုၼ်းၼမ်မႃးၼႃႇယဝ်ႉ တီႈတႃႈၶီႈလဵၵ်းၼႆႉ”- ဝႃႈၼႆ။
ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း မႃးၶၢဝ်းတၢင်းၸမ် 4 ပီၼႆႉ တီႈဝဵင်းတႃႈၶီႈလဵၵ်းၼႆႉ လႆႈဝႃႈၵူၼ်းႁဵတ်း ၵၢၼ်လွၵ်ႇလႅၼ်ၵိၼ်ငိုၼ်း ၵျႃးၽႅၼ်ႉ မီးၼမ်သုတ်း။ ၸူဝ်ႈၵူၼ်းႁဵတ်းၵၢၼ်ၵျႃးၽႅၼ်ႉ ၼမ်မႃးၼႆႉ ၵႃႈၶၼ်ၶူဝ်းၵုၼ်ႇ ၵိၼ်ယႅမ်ႉၵေႃႈ ပုင်ႈၶိုၼ်ႈသုင်ႁႅင်း။ ၵူၼ်းမိူင်းပိုၼ်ႉတီႈတႄႉ ယၢပ်ႇၽိုတ်ႇၵိၼ်းၸႂ်။
ဢၼ်ပလိၵ်ႈ လိုပ်ႈလမ်းတီႉၺွပ်း ၵူၼ်းႁဵတ်းၵၢၼ်လႅၼ်ငိုၼ်းဢွၼ်ႊလၢႆႊၼႆႉ မီးမႃး 3-4 လိူၼ်ယဝ်ႉ။ ပေႃးပဵၼ်တီႈ ဢၼ်လႆႈငိုၼ်းယဵတ်ႈငိုၼ်းမွၼ်တႄႉ ႁၼ်ပလိၵ်ႈပွႆႇဝႆႉယူႇသေတႃႉ ၸိူဝ်းဢၼ်ဢမ်ႇပၼ် ၶွၼ်ႇတီႈပလိၵ်ႈတႄႉ ၵႆႉ ႁၼ်ပလိၵ်ႈၶဝ်ႈတီႉၺွပ်း လႆႈပဵၼ်မူႇပဵၼ်ၸုမ်း ၸိူင်ႉၼႆယူႇ ၵူၼ်းပိုၼ်ႉတီႈ လၢတ်ႈၼင်ႇၼႆ။
“ပေႃးၶဝ်ၶႂ်ႈတီႉၺွပ်းတႄႉတႄႉ ၵူၼ်းမီးပဵၼ် 50 ၶဝ်ဢမ်ႇႁူႉတႄႉ ဢမ်ႇၸႂ်ႈ၊ ပေႃးပဵၼ်ၵူၼ်းလၵ်ႉ ၶဝ်ႈမႃးၵေႃႈ ၶဝ်ႈမႃးတင်းၽၵ်းတူလႂ် ၶဝ်တိုၼ်းႁူႉ၊ ဢၼ်ၺႃးတီႉ ၵမ်းၼႆႉၵေႃႈ လႅပ်ႈတေပဵၼ် ယွၼ်ႉဢမ်ႇပၼ် ၶွၼ်ႇၶဝ်၊ ဢမ်ႇပၼ်ငိုၼ်း ၶဝ်လႄႈ တီႉၺွပ်းၵူၺ်း”- ၼၢင်းယိင်း ၵူၼ်းပိုၼ်ႉတီႈ ၵေႃႉၼိုင်ႈ လၢတ်ႈၼင်ႇၼႆ။
ဝဵင်းတႃႈၶီႈလဵၵ်းၼႆႉ ၵူၼ်းမိူင်းတၢင်ႇတီႈတၢင်ႇလႅၼ် မႃးယူႇသဝ်းၼမ်လိူင်ႇ မၢင်ၸိူဝ်း ယွၼ်ႉႁႃၵိၼ်လဵင်ႉတွင်ႉယၢပ်ႇလႄႈ ႁဵတ်းမူႇႁဵတ်းၸုမ်း ၸၵ်ႉၶုတ်ႈႁိမ်ၸူၼ်၊ မၢင်ၸိူဝ်း ႁဵတ်းၵၢၼ်လႅၼ်ငိုၼ်းဢွၼ်ႊလၢႆႊ။ လိူဝ်ၼၼ်ႉ ၼႂ်းဝတ်ႉၼႂ်း ၵျွင်းၵေႃႈဢမ်ႇဝႆႉ ၸဝ်ႈငိုၼ်းသႃးၶဝ် ဢွၼ်ပိုတ်ႇပၢင်တေႃႇလွင်း ဢူၼ်ဢၢၼ်မေႃးပၼ်း ႁဵတ်းႁႂ်ႈၵူၼ်းမိူင်းပိုၼ်ႉတီႈ ယၢပ်ႇၽိုတ်ႇလၢႆလွင်ႈ ဝႃႈၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ