ၼႂ်းၶၢဝ်းတၢင်းဝူင်ႈလဵဝ် ႁႅင်းၵၢၼ်မိူင်းမၢၼ်ႈ ၸိူဝ်းယူႇသဝ်းၼႂ်းမိူင်းမလေးသျႃး ဢမ်ႇမႅၼ်ႈတၢင်းၵၢၼ် ၺႃးတီႉၺွပ်း ဢမ်ႇယွမ်း 170 ၵေႃႉ ဝႃႈၼႆ။
တႄႇဢဝ် ဝၼ်းတီႈ 03 – 09/12/2024 ပလိၵ်ႈၶဝ်ႈတီႉၺွပ်း ႁႅင်းၵၢၼ်မိူင်းမၢၼ်ႈ ၼႂ်းၸႄႈတွၼ်ႈၵျူဝ်ႇႁူဝ်း မိူင်းမလေးသျႃး ၵမ်ႈၼမ် ပဵၼ်ႁႅင်းၵၢၼ်မိူင်းမၢၼ်ႈ ဢၼ်တိုၵ်ႉၵႂႃႇထိုင် ပႆႇပေႃးႁိုင် ၼႆယဝ်။
တႃႇတေပွႆႇပၼ်ၶိုၼ်း တူဝ်ၵူၼ်းၸိူဝ်းၺႃးတီႉၺွပ်းဝႆႉၼၼ်ႉ မိူဝ်ႈဢွၼ်တၢင်း ဢုပ်ႇဢူဝ်းငူပ်ႉငီႉၵၼ်တင်း ၸဝ်ႈၼႃႈတီႈ ငၢႆႈယူႇသေတႃႉ ယၢမ်းလဵဝ်လႆႈပၼ်ငိုၼ်း 1 ၵေႃႉလႂ် 9,000 လိင်ႊၵိတ်ႊ (Ringgit) ငိုၼ်းမလေးသျႃး (မႅၼ်ႈငိုၼ်းမိူင်းမၢၼ်ႈ မွၵ်ႈ 90 သႅၼ်) ။ ၵူၼ်းၸိူဝ်းဢမ်ႇပၼ်ငိုၼ်းလႆႈၼၼ်ႉ ၺႃးၸဝ်ႈၼႃႈတီႈ ပၼ်တၢမ်ႇၶွၵ်ႈ 6 လိူၼ်ယဝ်ႉ ၸင်ႇသူင်ႇပွၵ်ႈမႃးၶိုၼ်း မိူင်းမၢၼ်ႈ။
ၸွမ်းၼင်ႇသဵၼ်ႈမၢႆ UNHCR သေ တေႃႇထိုင်လိူၼ်ဢွၵ်ႊထိူဝ်ႊပိူဝ်ႊ 2024 ၼႆႉ ၵူၼ်းၸိူဝ်းယိုၼ်ႈတၢင်ႇ သဵၼ်ႈမၢႆသုၼ်ႇယူႇသဝ်းၼႂ်းမိူင်းမလေးသျႃးမီး 190,000 ၵေႃႉ။ ၼႂ်းၼၼ်ႉ ၵူၼ်းမိူင်းမၢၼ်ႈမီး 170,000 ဝႃႈၼႆ။
မိူၼ်ၼႆ ပူၼ်ႉမႃးမိူဝ်ႈဝၼ်းတီႈ 08/12/2024 ၼႆႉ ၸဝ်ႈၼႃႈတီႈထႆး ၶဝ်ႈၵူတ်ႇထတ်း ၼႂ်းႁူင်းၵၢၼ်ၵေႃႇ သၢင်ႈတီႈၼိုင်ႈ ၼႂ်းၸႄႈတွၼ်ႈဢယုတ်ႉထယႃးသေ တီႉၺွပ်းၵႂႃႇႁႅင်းၵၢၼ်မိူင်းမၢၼ်ႈ ပၢၵ်ႇပၢႆ ဝႃႈၼႆ။
ၼႂ်းႁႅင်းၵၢၼ် ဢၼ်ၺႃးတီႉၺွပ်း 37 ၵေႃႉၼႆႉ ပဵၼ်ၵူၼ်းပၢႆႈၽေးသိုၵ်း လတ်းထိူၼ်ႇမႄႈႁွင်ႈသွၼ်သေ တိုၵ်ႉၶဝ်ႈၵႂႃႇထိုင်တီႈၼၼ်ႈ ယင်းပႆႇႁိုင်၊ ၸိူဝ်းၶဝ် လႆႈပၼ်တီႈၼၢႆးၼႃႈ ၼိုင်ႈၵေႃႉလႂ် 15,000 ဝၢတ်ႇ (ငိုၼ်းထႆး)သေ လႆႈၵၢၼ်ဝႆႉ တီႈႁူင်းၵၢၼ်ၵေႃႇသၢင်ႈ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ