ၶၢဝ်းတၢင်း 10 ဝၼ်းမႃးၼႆႉ ပၢင်တိုၵ်း တီႈဝဵင်းလွၵ်ႉၸွၵ်ႇ ပဵၼ်ႁၢဝ်ႈႁႅင်း ၾၢႆႇသိုၵ်းမၢၼ်ႈ လူႉတၢႆ 50 ပၢႆ ယိုတ်းၵုမ်းလႆႈပႃး ၶိူင်ႈၵွင်ႈၵၢင်ႇ မၢၵ်ႇမိုဝ်ႈၸိုၼ်းယၢမ်းထႅင်ႈတင်းၼမ် – သိုၵ်းတၼု (DPLA) ပိုၼ်ၽၢဝ်ႇ ဝႆႉၼင်ႇၼႆ။

တႄႇဢဝ် ဝၼ်းတီႈ 30/11/2024 တေႃႇထိုင် ဝၼ်းတီႈ 09/12/2024 ၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်းတၼု (DPLA) တႄႇပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းဢိူင်ႇၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း။

ၽူႈမီးပုၼ်ႈၽွၼ်း ၼႂ်းႁွင်ႈၵၢၼ် ပွင်ႇၶၢဝ်ႇ တပ်ႉသိုၵ်းတၼု လၢတ်ႈၽူႈတွႆႇႁွၵ်ႈဝႃႈ – “ၼႂ်းၶၢဝ်းတၢင်း ပၢင်တိုၵ်း 10 ဝၼ်းၼႆႉ ၾၢႆႇသိုၵ်းမၢၼ်ႈ လူႉတၢႆ 50 ပၢႆ။ ၶၢပ်ႈတူဝ်တၢႆၶဝ်ၵေႃႈ ပဵၼ်ၵေႃႇပဵၼ်ၵွင်ဝႆႉ ၸိူင်ႉၼၼ်ၶႃႈဢေႃႈ။ တၢင်း ၾၢႆႇႁဝ်းၶႃႈတႄႉ မီးလွင်ႈတုမ်ႉတိူဝ်ႉ ဢိတ်းဢွတ်းၵူၺ်း”- ဝႃႈၼႆ။

ပၢင်တိုၵ်းၼႆႉ ယွၼ်ႉပဵၼ်ႁိမ်းၸမ် မူႇဝၢၼ်ႈလႄႈ ႁဵတ်းႁႂ်ႈၵူၼ်းဝၢၼ်ႈ ပၢႆႈၽေးသိုၵ်းၸမ်ႁဵင် ၵမ်ႈၼမ် ပၢႆႈသွၼ်ႈဝႆႉ ၸွမ်းၼႂ်းထိူၼ်ႇ၊ ႁိူၼ်းယေး ပီႈၼွင်ႉၽႂ်မၼ်း။

ၵူၼ်းပၢႆႈၽေးသိုၵ်း တီႈဢိူင်ႇၵျွၵ်ႉၵူႇ လၢတ်ႈၽူႈတွႆႇႁွၵ်ႈဝႃႈ – “ယၢမ်းလဵဝ်တႄႉ ႁဝ်းၶႃႈ ပၢႆႈၽေးသွၼ်ႈယူႇ ဝႆႉၸွမ်း ၼႂ်းထိူၼ်ႇ၊ ႁိူၼ်းယေး ပီႈၼွင်ႉၽႂ်မၼ်း ၶႃႈဢေႃႈ။ ႁူဝ်ၵူၼ်းတႄႉ မီးၸမ်ႁဵင်ၶႃႈယဝ်ႉ။ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်ဢေႃႈ။ တေပွၵ်ႈမိူဝ်းၶိုၼ်းတီႈဝၢၼ်ႈၵေႃႈ ဢမ်ႇလႆႈပဵၼ်ဝႆႉၸိူင်ႉၼႆဢေႃႈ”- ဝႃႈၼႆ။

ဢိင်ၼိူဝ် လွင်ႈၵူၼ်းပၢႆႈၽေးၼႆႉသေ ယူႇတီႈ တပ်ႉသိုၵ်းတၼု (DPLA) ပၼ်ၾၢင်ႉဝႃႈ ၵူၼ်းမိူင်း ဢၼ်ယူႇၸမ်ပၢင်တိုၵ်းၸိူဝ်းၼၼ်ႉလႄႈသင် ဢၼ်ယူႇၸမ်တပ်ႉသိုၵ်းမၢၼ်ႈ ၸိူဝ်းၼၼ်ႉလႄႈသင် ႁႂ်ႈၶၢႆႉပၢႆႈယူႇဝႆႉ ၸိူဝ်းဢွင်ႈတီႈလွတ်ႈၽေးၶဵၼ် ဝႃႈၼႆ။

“ယၢမ်းလဵဝ် ပဵၼ်ၶၢဝ်းယၢပ်ႇၽိုတ်ႇၼႆသေတႃႉ ႁႂ်ႈဝႆႉၸႂ်ၵႅၼ်ႇၶႅင်သေ သိုပ်ႇႁူမ်ႈႁွမ်း လုၵ်ႉၽိုၼ်ႉၵႂႃႇၸွမ်းၵၼ်။ ၵွပ်ႈၼႆလႄႈ သင်ပဵၼ်လႆႈႁႂ်ႈၶၢႆႉပၢႆႈၵႂႃႇယူႇဝႆႉ တီႈလွတ်ႈၽေးဝႆႉသေၵမ်း” – ၽူႈမီးပုၼ်ႈၽွၼ်း ၼႂ်းႁွင်ႈၵၢၼ် ပွင်ႇၶၢဝ်ႇတပ်ႉသိုၵ်းတၼုလၢတ်ႈ။

လိူဝ်ၼၼ်ႉ မိူဝ်ႈဝၼ်းတီႈ 09/12/2024 ယၢမ်းၵၢင်ဝၼ်း 12 မူင်းၶိုင်ႈ မၢၵ်ႇလူင်သိုၵ်းမၢၼ်ႈ တူၵ်းသႂ်ႇၼႂ်းဝၢၼ်ႈသုမ်ႇသၢႆႇ ၸႄႈဝဵင်းၼွင်ၶဵဝ် တႅၵ်ႇတိူဝ်ႉၵူၼ်းဝၢၼ်ႈမၢတ်ႇၸဵပ်း 3 ၵေႃႉ။ ၼႂ်းၼၼ်ႉ ပဵၼ်ၽူႈၸၢႆး 2 ၵေႃႉလႄႈ ၽူႈယိင်း 1 ၵေႃႉ။ ၸၢၵ်ႇမၢၵ်ႇတိူဝ်ႉၺႃးၵူၼ်းဝၢၼ်ႈ ၸွမ်းၵွၵ်းႁူဝ်ၸွမ်းတူဝ် ၸိူဝ်းၼႆႉ။ ယဝ်ႉ ၵေႃႈ တိူဝ်ႉၺႃး ရူတ်ႉၵႃးထႅင်ႈ 2 လမ်းလႄႈ ႁိူၼ်းယေး ၸိူဝ်းၼႆႉလူႉၵွႆၼမ် – ယူႇတီႈ တပ်ႉသိုၵ်းတဢၢင်း TNLA ပိုၼ်ၽၢဝ်ႇဢွၵ်ႇဝႆႉၼင်ႇၼႆ။