တႄႇႁူဝ် လိူၼ်တီႊသႅမ်ႊပိူဝ်ႊၼႆႉမႃး သိုၵ်းမၢၼ်ႈၸႂ်ႉၵူၼ်းပၢႆႈၽေးသိုၵ်း ဝဵင်းလွႆၶေႃ ပွၵ်ႈၶိုၼ်းႁိူၼ်း တႃႇႁၢပ်ႇၵၢၼ်သိုၵ်း တီႈဝဵင်းလွႆၶေႃ ၸိုင်ႈတႆးပွတ်းၸၢၼ်း။
ဝၼ်းတီႈ10/12/2024 ၵၢင်ႉၵႄႇ တႂ်ႈသိုၵ်းမၢၼ်ႈ မႃးလၢတ်ႈတီႈၵျွင်းမုၼ်ၸဝ်ႈ ပွၵ်ႉပၢင်ၵၢင်းဝႃႈ ၵူၼ်းၸၢႆးၼႂ်းပွၵ်ႉ တေလႆႈၵႂႃႇႁၢပ်ႇၵၢၼ်သိုၵ်း၊ ၽႂ်ဢမ်ႇၸွမ်းၵႂၢမ်းသင်ႇ တေယိုတ်းဢဝ်ၶူဝ်းၶွင်ႁိူၼ်းယေး တီႈယူႇတင်းမူတ်း ဝႃႈၼႆပႃး။
ၵူၼ်းဢၼ်ပွၵ်ႈယူႇၶိုၼ်းႁိူၼ်း လၢတ်ႈၽူႈတွႆႇႁွၵ်ႈဝႃႈ – “ၵူၼ်းၼႂ်းဝဵင်းလွႆၶေႃ ဢွၼ်ၵၼ် ပွၵ်ႈယူႇၶိုၼ်းႁိူၼ်း တင်းၼမ်ယဝ်ႉ။ ဢၼ်သိုၵ်းမၢၼ်ႈ ၸႂ်ႉႁၢပ်ႇၵၢၼ်သိုၵ်းၼႆႉ ပဵၼ်ၵူၼ်းၼုမ်ႇ ၼႂ်းဝဵင်းလွႆၶေႃ တင်းမူတ်း၊ ၵၢင်ႉၵႄႇမႃးႁွင်ႉ ၼိုင်ႈပွၵ်ႉ 5 ၵေႃႉ၊ ဢၼ်ၵႂႃႇၸွမ်းၵေႃႈမီးယူႇ”- ဝႃႈၼႆ။
ၵူၼ်းဢၼ် ႁိူၼ်းၺႃးၽဝ် ဢမ်ႇမီးႁိူၼ်းယူႇသဝ်းၼၼ်ႉ လႆႈယူႇသဝ်းတီႈဝတ်ႉၵျွင်းမုၼ်ၸဝ်ႈသေ ႁဵတ်းၵၢၼ်ႁႃၸဝ်ႉၵိၼ်ၶမ်ႈ ၵႄႈလိတ်ႈပၼ်ႁႃလဵင်ႉတွင်ႉၵႂႃႇဝၼ်းလႂ်ဝၼ်းၼၼ်ႉ ဝႃႈၼႆ။
ယွၼ်ႉဝႃႈ ပၢႆႈၽေးသိုၵ်းမႃးႁိုင် ဢမ်ႇၸၢင်ႈႁဵတ်းၵိၼ်ႁႃလဵင်ႉတွင်ႉသင်လႄႈ ၶႂ်ႈပွၵ်ႈမိူဝ်းႁဵတ်းၵၢၼ်ႁႃၵိၼ် လဵင်ႉတွင်ႉ တီႈဝၢၼ်ႈၵိူတ်ႇမိူင်းၼွၼ်းသေတႃႉ ယွၼ်ႉသိုၵ်းမၢၼ်ႈ ၵဵပ်းၵူၼ်းတႃႇႁၢပ်ႇၵၢၼ်သိုၵ်းလႄႈ ဢမ်ႇပႆႇႁတ်းပွၵ်ႈၶိုၼ်း ႁိူၼ်းၼႆ ၵူၼ်းပၢႆႈၽေးသိုၵ်း ဢၼ်မႃးယူႇတီႈ ယွင်ႇႁူၺ်ႈလၢတ်ႈၼင်ႇၼႆ။
“ပေႃးလုၵ်ႈဢွၼ်ႇ တွပ်ႇလိၵ်ႈယဝ်ႉ ႁဝ်းၶႃႈၵေႃႈ ဢၢင်ႈပွၵ်ႈၶိုၼ်းႁိူၼ်းယဝ်ႉဢေႃႈ။ တေမိူဝ်းႁဵတ်းၵိၼ် တင်းဝၢၼ်ႈႁဝ်းမိူင်းႁဝ်းၵူၺ်းယဝ်ႉၼႆ။ ပၢႆႈမႃးမီးပီပၢႆ ၸဝ်ႈတႃႇၼၵေႃႈ ဢမ်ႇႁွတ်ႈထိုင် တေၵႂႃႇႁဵတ်းၵၢၼ်ႁႃၵိၼ်လဵင်ႉတွင်ႉၵေႃႈ ၼိုင်ႈဝၼ်းလႆႈ 7 ႁဵင်ၵူၺ်း၊ ဢမ်ႇပေႃးလဵင်ႉတႃႇၼႃႈႁိူၼ်း၊ မႃးယူႇဝဵင်းပိူၼ်ႈ ဢမ်ႇမိူၼ်ဝၢၼ်ႈၵိူတ်ႇမိူင်းၼွၼ်းႁဝ်း ယၢပ်ႇၸႂ်ၼႃႇ။ ၵူၺ်းၵႃႈ ပေႃးဝႃႈတေပွၵ်ႈမိူဝ်းယူႇၶိုၼ်းႁိူၼ်းၼႆၵေႃႈ သမ်ႉဝႃႈ တေလႆႈၵႂႃႇႁၢပ်ႇၵၢၼ်သိုၵ်းၼႆလႄႈ ဢမ်ႇႁတ်းမိူဝ်းၶႃႈ”- ဝႃႈၼႆ။
ယွၼ်ႉပိူဝ်ႈၽႅၼ်ယၼ်ႇသိုၵ်း 1111 ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ သိုၵ်းယၢင်းလႅင် KNDF- PDF သေ ဝဵင်းလွႆၶေႃ ဝဵင်းလူင်ၸႄႈမိူင်းယၢင်းလႅင် လႆႈလူႉၵွႆလႅဝ်ၽႅဝ်ႉ။ ၵူၼ်းမိူင်းၼႂ်းဝဵင်း ပႃးၸဵမ်တၢင်းဝၢၼ်ႈ လႆႈဢွၼ်ၵၼ်ပၢႆႈၽေးသိုၵ်း လႆႈပီပၢႆယဝ်ႉ။
ၵူၼ်းပၢႆႈၽေးသိုၵ်း ဢၼ်မႃးယူႇဝႆႉၸွမ်း ၸႄႈဝဵင်းယွင်ႁူၺ်ႈ၊ ဢေးသႃႇယႃႇ၊ တူၼ်ႈတီး ဢၼ်မႃးသွၼ်ႈ ယူႇသဝ်းဝႆႉတီႈ ပၢင်သဝ်းၵူၼ်းပၢႆႈၽေးသိုၵ်းလႄႈသင်၊ ဝတ်ႉဝႃးၽႃသိူဝ်ႇလႄႈသင် မီးၼပ်ႉႁူဝ်ႁဵင် ဢမ်ႇမီးၵၢၼ်ႁႃၵိၼ်လဵင်ႉတွင်ႉ။ ဢမ်ႇမီးၸဝ်ႈတႃႇၼ မႃးၵမ်ႉၸွႆႈ ဝႃႈၼႆ။
ႁၢင်လိူၼ် ၼူဝ်ႊဝႅမ်ႊပိူဝ်ႊၼႆႉ ၾၢႆႇလုမ်းၽွင်းငမ်းၵူႈလွင်ႈလွင်ႈ ၸႄႈဝဵင်းယွင်ႁူၺ်ႈ ႁွင်ႉဢဝ်ၵၢင်ႉၵႄႇ သေမႃးႁူပ်ႉထူပ်းဢုပ်ႇၵုမ်၊ ၸီႉသင်ႇႁႂ်ႈလၢတ်ႈၵူၼ်းပၢႆႈၽေးသိုၵ်း ၸိူဝ်းမႃးသွၼ်ႈယူႇသဝ်းဝႆႉတီႈပၢင်သဝ်း ပႃးၸဵမ်ႁိူၼ်းယေးပီႈၼွင်ႉလႄႈ ဝတ်ႉဝႃးၽႃသိူဝ်ႇ ပွၵ်ႈယူႇၶိုၼ်းတင်းမူတ်း ႁႂ်ႈၶၢႆႉယဝ်ႉတူဝ်ႈ ၼႂ်းလိူၼ်မၢတ်ႊၶျ် 2025 ဝႃႈၼႆ။
ၽႅၼ်ယၼ်ႇသိုၵ်း 1111 ၼႆႉ ဝဵင်းလွႆၶေႃ ထိုင်တီႈလူႉလႅဝ်ႁၢမ်းၵႂႃႇသေတႃႉ ယၢမ်းလဵဝ် သိုၵ်းမၢၼ်ႈ ၶဝ်ႈဢဝ်တီႈယူႇဝႆႉၼႂ်းဝဵင်း။ ႁိမ်းၶႅပ်ႇၶၢင်ႈဝဵင်း ၸွမ်းဝၢၼ်ႈၸွမ်းသူၼ်ၵေႃႈ သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈမႃး ဢဝ်တီႈယူႇဝႆႉလႄႈ ႁဵတ်းႁႂ်ႈၵူၼ်းပိုၼ်ႉတီႈ ၸိူဝ်းပၢႆႈၽေးသိုၵ်းဝႆႉ ဢမ်ႇႁတ်းပွၵ်ႈယူႇၶိုၼ်း ႁိူၼ်းယေး။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ