သိုၵ်းမၢၼ်ႈ ယိုတ်းမိူင်း ႁႄႉႁၢမ်ႈတေႃႉသူင်ႇၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) လႄႈ ႁဵတ်းႁႂ်ႈၵူၼ်းမိူင်းတႆးပွတ်း ၸၢၼ်း လၢႆၸႄႈဝဵင်း ထူပ်းတၢင်းယၢပ်ႇၽိုတ်ႇႁႅင်း ယွၼ်ႉပဵၼ်ၶၢဝ်းလူဝ်ႇႁဵတ်းႁႆႈၼႃးသူၼ် ဝႃႈၼႆ။

ယၢမ်းလဵဝ် တီႈမိူင်းၼွင်၊ ၵေးသီး၊ မိူင်းသူႈ၊ မိူင်းၵိုင်လႄႈ မိူင်းယႆ ၸိူဝ်းၼႆႉ ၼမ်ႉမၼ်းၸိူဝ်ႉၾႆးၶၢတ်ႇဝႆႉ ယွၼ်ႉသိုၵ်းမၢၼ်ႈ ႁႄႉႁၢမ်ႈ ဢမ်ႇပၼ်တေႃႉသူင်ႇမႃး ႁဵတ်းႁႂ်ႈၵူၼ်းမိူင်း – ၸဝ်ႈသူၼ်ႁႆႈၼႃး ဢွၼ်ၵၼ် ထူပ်းတၢင်းယၢပ်ႇၽိုတ်ႇႁႅင်း ၼႆယဝ်ႉ။

ၵူၼ်းမိူင်းသူႈ ၽူႈယိင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ပၢမ်ႉၼမ်ႉမၼ်းယႂ်ႇ တီႈၼႂ်းမိူင်းသူႈၼႆႉ လႆႈပိၵ်ႉဢိုတ်းမႃးႁိုင်ယဝ်ႉ။ ယွၼ်ႉၵႃးတၢင်ႇၼမ်ႉမၼ်းၸၢၵ်ႈ ဢမ်ႇမႃးမီးမွၵ်ႈ 1 ဝူင်ႈယဝ်ႉ။ ႁၢၼ်ႉဢွၼ်ႇ ဢၼ်ၶၢႆၸွမ်းတၢင်းတႄႉ မီးယူႇၵမ်ႈၽွင်ႈ မၢင်ပွၵ်ႈမၢင်လႂ်ၵူၺ်း။ လွင်ႈၼမ်ႉမၼ်းၶၢတ်ႇၼႆႉ တေႃႇထိုင်မိူင်းၼွင် ပုၼ်ႉဢေႃႈ။ ပီၼႆႉ ဢမ်ႇၸၢင်ႈႁဵတ်းႁႆႈၼႃးသူၼ်သင်ယဝ်ႉ။ ၶဝ်ႈၵၢပ်ႇၵေႃႈ ဢမ်ႇလႆႈၶၢႆ”- ဝႃႈၼႆ။

ယၢမ်းလဵဝ် တီႈဝဵင်းမိူင်းသူႈၼႆႉ သင်ဝႃႈၸၢင်ႈၸၢၵ်ႈထႆႁႆႈ/ ၼႃးၸိုင် 1 ၸူဝ်ႈမူင်းလၢႆ လႆႈပၼ်သႅၼ်ပၢႆ ၵွပ်ႈၼႆလႄႈ ၸဝ်ႈႁႆႈသူၼ်ၼႃးၶဝ် လႆႈၵိုတ်းၵၢၼ်ဝႆႉမူတ်း ဝႃႈၼႆ။  

တႄႇဢဝ် မိူဝ်ႈႁၢင်လိူၼ်ၼူဝ်ႊဝႅမ်ႊပိူဝ်ႊၼၼ်ႉမႃး ၵႃးတၢင်ႇၼမ်ႉမၼ်းၸိူဝ်ႉၾႆး ဢၼ်လုၵ်ႉတၢင်း ၵဵင်းတုင် ၸိုင်ႈတႆးပွတ်းဢွၵ်ႇမႃးလႄႈသင် တၢင်းတူၼ်ႈတီး ၸိုင်ႈတႆးပွတ်းၸၢၼ်းမႃးလႄႈသင် ၸိူဝ်းၼႆႉ တေလႆႈမီးဝႂ်ႁပ်ႉႁွင်း တီႈသိုၵ်းမၢၼ်ႈမႃးၵွၼ်ႇ ၸင်ႇတေတေႃႉတၢင်ႇၵႂႃႇမႃးလႆႈ ၵွပ်ႈၼႆလႄႈ ႁဵတ်းႁႂ်ႈၼမ်ႉမၼ်း ၸိူဝ်ႉၾႆးၶၢတ်ႇ ဝႃႈၼႆ။

ၵူၼ်းတူၼ်ႈတီး ၽူႈၸၢႆး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၵႃးတၢင်ႇၼမ်ႉမၼ်း ဢၼ်တေလုၵ်ႉတူၼ်ႈတီးၵႂႃႇ တၢင်းမိူင်းၼွင်၊ မိူင်းသူႈ၊ ၵေးသီး၊ မိူင်းၵိုင်၊ မိူင်းယႆၼၼ်ႉ လႆႈၶဝ်ႈထႅဝ် ဢဝ်ဝႂ်ႁပ်ႉႁွင်း တီႈသိုၵ်းမၢၼ်ႈ တၢင်းဢွၵ်ႇဝဵင်းတူၼ်ႈတီးၼႆႉ ပေႃးၶပ်ႉယႆၵၼ်လူင်ဝႆႉဢေႃႈ။ ပၢမ်ႇၼမ်ႉမၼ်းတႄႉ လုၵ်ႉတူၼ်ႈတီး ထိုင်လၢႆးၶႃႈတႄႉ ပိုတ်ႇယူႇ။ တႄႇလၢႆးၶႃႈ ၵႂႃႇတၢင်းပုၼ်ႉတႄႉ ဢမ်ႇႁူႉၶႃႈ ၸွင်ႇပိုတ်ႇဢမ်ႇပိုတ်ႇတႄႉ”- ဝႃႈၼႆ။

ၵွပ်ႈၼႆလႄႈ ၵႃးတၢင်ႇၼမ်ႉမၼ်းၸိူဝ်ႉၾႆးၼႆႉ တေလႆႈမီးဝႂ်ႁပ်ႉႁွင်း သိုၵ်းမၢၼ်ႈဝႆႉ သင်မီးၸိုင် လတ်းၽၢၼ်ႇၵႂႃႇမႃးလႆႈ တီႈၵဵတ်ႉၵူတ်ႇထတ်း 4 လၵ်း တၢင်းဢွၵ်ႇဝဵင်းတူၼ်ႈတီး၊ တီႈၵဵတ်ႉၵူတ်ႇထတ်း ၵဵင်းတုင်လႄႈ တီႈၶူဝ်တႃႈၵေႃႉ ၸိူဝ်းၼႆႉ။ ထႅင်ႈၾၢႆႇၼိုင်ႈၵေႃႈ သိုၵ်းမၢၼ်ႈ မႆႈၸႂ် ၵူဝ်ၶူဝ်းၵုၼ်ႇ ၶွင်ၵိၼ်ယႅမ်ႉ ၼမ်ႉမၼ်းၸိူဝ်ႉၾႆး ၸိူဝ်းၼႆႉ တေႃႉသူင်ႇ ၸူး တၢင်းၸိုင်ႈတႆးပွတ်းႁွင်ႇ ၵွပ်ႈၼႆလႄႈ ႁဵတ်းႁႂ်ႈၵူၼ်းမိူင်းတုၵ်ႉၶ ယၢပ်ႇၽိုတ်ႇႁႅင်း။

မိူၼ်ၼင်ႇ တၢင်းမိူင်းၼွင်၊ ၵေးသီး၊ မိူင်းသူႈ၊ မိူင်းၵိုင်လႄႈ မိူင်းယႆ ၸိူဝ်းၼႆႉသမ်ႉ ပဵၼ်ပိုၼ်ႉတီႈ သိုၵ်းတႆး SSPP/ SSA တူင်ႉၼိုင်ယူႇဝႆႉ ဝႃႈၼႆ။