မိူဝ်ႈၼႆႉ ဝၼ်းတီႈ 09/12/2024 ယၢမ်းၵၢင်ၼႂ်မွၵ်ႈ 3 မူင်းၶိုင်ႈၼၼ်ႉ ႁွင်ႈၵၢၼ်ၾၢႆႇၸတ်းၵၢၼ် ၾိင်ႈၾႃႉရႃႇသီႇ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉ ဢိင်ႇသၼ်ႇ (ၽႅၼ်ႇလိၼ်ဝႆ) ၸဵင်ႇႁွင်ႇဝၼ်းဢွၵ်ႇ ဝဵင်းသႅၼ်ဝီ ယၢၼ်ၵႆဝဵင်းမွၵ်ႈ 7 လၵ်းလႄႈ ၸဵင်ႇႁွင်ႇဝၼ်းဢွၵ်ႇ ဝဵင်းသီႇပေႃႉ ယၢၼ်ၵႆဝဵင်းမွၵ်ႈ 69 လၵ်း တၢင်းႁႅင်းမီး 4.5 ရိတ်ႊတိူဝ်ႊ ၼႂ်းၸိုင်ႈတႆးပွတ်း ႁွင်ႇ။
လွင်ႈဢိင်ႇသၼ်ႇပွၵ်ႈၼႆႉ တုမ်ႉယွၼ်ႈထိုင် ၼႂ်းမိူင်းတႆးပွတ်းႁွင်ႇ လၢႆၸႄႈဝဵင်း မိူၼ်ၼင်ႇ – ၼႂ်းၸႄႈဝဵင်းၵူတ်ႉၶၢႆ ၊ မူႇ ၸေႊ ၊ ၼမ်ႉၶမ်း ၊ သႅၼ်ဝီလႄႈ လႃႈသဵဝ်ႈ ၸိူဝ်းၼႆႉ။
ၵူၼ်းမူႇၸေႊ ၽူႈၸၢႆး ဢႃယု 40 ပၢႆ လၢတ်ႈၽူႈတွႆႇႁွၵ်ႈဝႃႈ – “တီႈမူႇၸေႊၼႆႉ ဢိင်ႇသၼ်ႇ 5 ပွၵ်ႈဢေႃႈ။ ယၢမ်းၵၢင် ၼႂ် 3:29 မူင်း ပွၵ်ႈၼိုင်ႈ၊ ယၢမ်းၵၢင်ၼႂ် 3:49 မူင်း ပွၵ်ႈၼိုင်ႈ၊ ယၢမ်းၵၢင်ၼႂ် 3:54 မူင်း ပွၵ်ႈၼိုင်ႈ၊ ယၢမ်းၵၢင်ၼႂ် 3:57 မူင်း ပွၵ်ႈၼိုင်ႈလႄႈ ယၢမ်းၵၢင်ၼႂ် 7:49 မူင်း ပွၵ်ႈၼိုင်ႈ။ လွင်ႈလူႉသုမ်းၶူဝ်းႁိူၼ်းယေး တုမ်ႉတိူဝ်ႉၵူၼ်း မၢတ်ႇၸဵပ်းလူႉတၢႆတႄႉ ဢမ်ႇမီးၶႃႈ”- ဝႃႈၼႆ။
လိူဝ်ၼၼ်ႉ တီႈဝဵင်းၵူတ်ႉၶၢႆၵေႃႈ မိူၼ်ၵၼ် ယၢမ်းၵၢင်ၼႂ် 3:29 မူင်း ပွၵ်ႈၼိုင်ႈ၊ ယၢမ်းၵၢင်ၼႂ် 3:42 မူင်း ပွၵ်ႈၼိုင်ႈ၊ ယၢမ်းၵၢင်ၼႂ် 3:49 မူင်း ပွၵ်ႈၼိုင်ႈ၊ ယၢမ်းၵၢင်ၼႂ် 3:57 မူင်း ပွၵ်ႈၼိုင်ႈ၊ ယၢမ်းၵၢင်ၼႂ် 4:00 မူင်း ပွၵ်ႈၼိုင်ႈလႄႈ ယၢမ်းၵၢင်ၼႂ် 7:49 မူင်း ပွၵ်ႈၼိုင်ႈ။ ဢိင်ၼိူဝ် လွင်ႈဢိင်ႇသၼ်ႇၼႆႉသေ တုမ်ႉတိူဝ်ႉႁဵတ်းႁႂ်ႈႁိူၼ်းယေး ၵူၼ်းမိူင်းတႅၵ်ႇၸတ်ႉလူႉၵွႆ ၵမ်ႈၽွင်ႈ ဝႃႈၼႆ။
ၵူၼ်းၼမ်ႉၶမ်း ၽူႈၸၢႆး ဢႃယု 40 ပၢႆ လၢတ်ႈၽူႈတွႆႇႁွၵ်ႈဝႃႈ – “ႁႅင်းၽႅၼ်ႇလိၼ်ဝႆ ထိုင်တၢင်းၼမ်ႉၶမ်း ႁဝ်းၼႆႉ ဢေႃႈ။ ယွၼ်ႉသုၼ်ၵၢင်မၼ်းမီးႁိမ်းဝဵင်းၵူတ်ႉၶၢႆ – သႅၼ်ဝီ။ တီႈၵူတ်ႉၶၢႆၼၼ်ႉ လႆႈငိၼ်းဝႃႈ သဵင်ႁႅင်းသၼ်ႇမၼ်းပေႃးမေႃး (ဢိုဝ်ႈ – ဢိုဝ်ႈ – ဢိုဝ်ႈ) မိူၼ်သဵင်ၶိူင်ႈမိၼ် ၸိူင်ႉၼၼ်ၶႃႈဝႃႇ”- ဝႃႈၼႆ။
လိူဝ်ၼၼ်ႉ မိူၼ်ၼင်ႇတၢင်းသႅၼ်ဝီ – လႃႈသဵဝ်ႈၵေႃႈ မိူၼ်ၵၼ် ယွၼ်ႉသုၼ်ၵၢင်မၼ်း မီးႁိမ်းၸမ်ၵူတ်ႇၶၢႆ – သႅၼ်ဝီ ဝႃႈၼႆ။
ၵူၼ်းလႃႈသဵဝ်ႈ ၽူႈယိင်း ဢႃယုမွၵ်ႈ 40 ပီ လၢတ်ႈၽူႈတွႆႇႁွၵ်ႈဝႃႈ – “တီႈလႃႈသဵဝ်ႈၵေႃႈ ဢိင်ႇသၼ်ႇဢေႃႈ ၵူၺ်းၵႃႈ ဢမ်ႇပေႃးႁႅင်း မိူၼ်တၢင်ႇတီႈ လႆႈႁူႉသၼ်ႇဝႆ (ၶွပ်ႉၶွပ်ႉၶႅပ်ႉၶႅပ်ႉ) ၸိူင်ႉၼၼ်ၵူၺ်းၶႃႈ။ ဢၼ် သၼ်ႇဝႆႁႅင်းတႄႉ တၢင်းၼမ်ႉၽၵ်းၵႃ – ၵူတ်ႉၶၢႆ ပုၼ်ႉၶႃႈဢေႃႈ”- ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 06/04/2023 ယၢမ်းၵၢင်ၼႂ် 7:13 မူင်း ဢိင်ႇသၼ်ႇ ႁႅင်း 4.6 ရိတ်ႊတိူဝ်ႊ တုမ်ႉယွၼ်ႈထိုင်ၵျွင်းၽြႃးလူင် မႁႃႇမဵတ်ႉမုၼိ ဝၢၼ်ႈမၢၵ်ႇၵႅင်းမူၼ်း ၼႂ်းဢိူင်ႇဝၢၼ်ႈႁၢတ်ႇ ၸႄႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း တိုမ်း/ ၽႃႉ ဝိႁၢရ်ၵျွင်းၽြႃးလူင် လႆႈယၢတ်ႇပင်းတူၵ်း 2 ပုၼ်ႈ 1 ပုၼ်ႈ လူႉသုမ်းမွၵ်ႈငိုၼ်း 50 သႅၼ်ပျႃး ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ