ဝၼ်းတီႈ 05/12/2024 ယၢမ်းၵၢင်ၶမ်ႈ 7 မူင်းပၢႆ ၾႆးမႆႈႁိူၼ်းယေး ၵူၼ်းဝၢၼ်ႈလင်ၼိုင်ႈ တီႈဝၢၼ်ႈၵုင်းသႃႇ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၶူဝ်းႁိူၼ်းယေးဢမ်ႇတၼ်းလႆႈ လူႉသုမ်းၼပ်ႉ ႁူဝ်ပၢၵ်ႇသႅၼ်ပျႃး။

ၵူၼ်းၼမ်ႉၶမ်း ၽူႈၸၢႆး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ တေပဵၼ်မွၵ်ႈ 7 မူင်းပၢႆပၢႆၼႆႉ။ မိူဝ်ႈၽွင်းၾႆးမႆႈၼၼ်ႉ ၸဝ်ႈႁိူၼ်းဢမ်ႇယူႇ ၵႂႃႇတၢင်းၼွၵ်ႈဢေႃႈ။ ယဝ်ႉၵေႃႈ ၵူၼ်းႁိူၼ်းၶဝ် ၵေႃႉၼိုင်ႈ ငိၼ်းဝႃႈ ၵိၼ်ယႃႈသေ ယွင်ႇယႃႈ ၼႆၶႃႈဝႃႇ။ ယွၼ်ႉသင်လႄႈမႆႈတႄႉ ၽႂ်ၵေႃႈပႆႇႁူႉငဝ်ႈႁၢၵ်ႈမၼ်းလီလီ။ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး”- ဝႃႈၼႆ။

ႁိူၼ်းယေး ဢၼ်ၾႆးမႆႈၵႂႃႇၼႆႉ ပဵၼ်ႁိူၼ်းမႆႉပႅၼ်ႈသွင်ၸၼ်ႉ။ ယွၼ်ႉၼၼ် ႁဵတ်းႁႂ်ႈၾႆးလုၵ်ႉမႆႈ ပဵၼ်ၽဝ်ႇ ၵႂႃႇမူတ်းလႄႈ မီးလွင်ႈလူႉသုမ်းတင်းၼမ်၊ ၶူဝ်းၶွင်ၼႂ်းႁိူၼ်းယေး ၸိူဝ်းၼႆႉၵေႃႈ ဢမ်ႇတၼ်းလႆႈ ဢဝ်သင် ဝႃႈၼႆ။

“မၼ်းပဵၼ် ႁိူၼ်းမႆႉပႅၼ်ႈ 2 ထပ်ႈ။ ႁိူၼ်းတႄႉ မႆႈၵႂႃႇမူတ်းဢေႃႈ။ လွင်ႈလူႉသုမ်းတႄႉ ၼပ်ႉႁူဝ်ပၢၵ်ႇသႅၼ် ပျႃးၶႃႈယဝ်ႉ”- ၵူၼ်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၶဝ်ႈၶၢဝ်းၵတ်းမႃးယဝ်ႉသေတႃႉ လွင်ႈၾႆးမႆႈႁိူၼ်းယေးၼႆႉ တိုၵ်ႉလႆႈငိၼ်းယူႇ။ ယွၼ်ႉဝႃႈ ၼႂ်းမိူင်းတႆးလၢႆတီႈလၢႆဝဵင်း ယၢမ်းလဵဝ် ၾႆးၾႃႉမႃးဢမ်ႇမီးၶိင်ႇမီးၶၢဝ်း။ ဢၼ်ၾႆးမႆႈႁိူၼ်းယေးၼႆႉ ၵႆႉၸၢင်ႈ ပဵၼ်ယွၼ်ႉၾႆးၾႃႉသျွတ်ႉ။

ယွၼ်ႉၼၼ် သင်တေဢွၵ်ႇႁိူၼ်း ၵႂႃႇတၢင်းၼွၵ်ႈၼႆၸိုင် ထုၵ်ႇလီ ၵူတ်ႇထတ်းတူၺ်း မုၵ်ႉၽိုၼ်းမုၵ်ႉၾႆး ၾႆးတဵၼ်းၼိူဝ်ၶဵင်ႇၽြႃးၸိူဝ်းၼႆႉ လီလီ။ ပေႃးပဵၼ်ၾႆးၾႃႉၵေႃႈ ထုၵ်ႇလီပိၵ်ႉဢိုတ်းဝႆႉ မဵင်းၾႆးၸိူဝ်းၼႆႉသေ ၸင်ႇဢွၵ်ႇတၢင်းၼွၵ်ႈ ၸိုင် တေၸၢင်ႈလွတ်ႈၽေး လွင်ႈၾႆးမႆႈႁိူၼ်းမႆႈယေး ၼႆယဝ်ႉ။