ပီၼႆႉ ၶၼ်ၶဝ်ႈၵၢပ်ႇလီၶိုၼ်ႈမႃးယဝ်ႉသေတႃႉ ၸဝ်ႈသူၼ်ၶဝ် တိုၵ်ႉထူပ်းတၢင်းယၢပ်ႇၽိုတ်ႇယူႇ ယွၼ်ႉလႆႈလူင်းတိုၼ်းလၢင်းၼမ်လႄႈ ဢမ်ႇပေႃးလႆႈၼမ်ႉမႅတ်ႈ/ ၼမ်ႉတွၼ်းၼမ် ဝႃႈၼႆ။

ယၢမ်းလဵဝ် ၼႂ်းမိူင်းတႆး လၢႆၸႄႈဝဵင်း ပဵၼ်ၶၢဝ်းၸဝ်ႈသူၼ်ၶဝ် ဢဝ်ၶဝ်ႈၵၢပ်ႇၼႂ်းသူၼ်ၼႂ်းႁႆႈ တေႃႉသူင်ႇၶၢႆလႄႈ ပီၼႆႉ ၶၼ်ၶဝ်ႈၵၢပ်ႇ လႆႈၶၢႆၵႃႈလိူဝ်ပီၵၢႆသေတႃႉ ယွၼ်ႉလႆႈလူင်းတိုၼ်းလၢင်းၼမ်လႄႈ ပုၼ်ႈတႃႇၸဝ်ႈသူၼ်ၶဝ်တႄႉ ပႆႇလႆႈ ၼမ်ႉမႅတ်ႈ/ ၼမ်ႉတွၼ်းသင် ၼႆယဝ်ႉ။

ၸၢႆးသၢင်ႇသၢမ် ၸဝ်ႈသူၼ်ၶဝ်ႈၵၢပ်ႇ ၸႄႈဝဵင်းလွႆလႅမ် လၢတ်ႈၽူႈတွႆႇႁွၵ်ႈဝႃႈ – “မိူဝ်ႈလဵဝ်ၼႆႉ ပိူၼ်ႈမႃး သိုဝ်ႉဢဝ်ၶဝ်ႈ ၵၢပ်ႇ ထိုင်တီႈသူၼ်ဢေႃႈ။ သိုဝ်ႉဢၼ်ပဵၼ်မဵတ်ႉ ဢၼ်လူၺ်ႇယဝ်ႉမၼ်းၼၼ်ႉၶႃႈၼေႈ။ ပေႃးဢဝ် ၵႃႈၶၼ်မၼ်းဝႃႈ ၸိုင် ပီၼႆႉတႄႉ လႆႈဝႃႈၶႅၼ်းယူႇဢိတ်ႉၼိုင်ႈ။ ၵူၺ်းၵႃႈ ပီၼႆႉသမ်ႉ လႆႈလူင်းတိုၼ်းလၢင်းၼမ်လိူဝ်ပီၵၢႆလႄႈ ပေႃးၼပ်ႉ တူၺ်းဢၼ်ၶၢႆမၼ်းၼႆ ငိုၼ်းၼႆႉ လႆႈႁၼ်ၼမ်လိူဝ်ယူႇ ယွၼ်ႉၶၼ်ငိုၼ်းမၢၼ်ႈတူၵ်း”- ဝႃႈၼႆ။

ယၢမ်းလဵဝ် ၶၼ်ၶဝ်ႈၵၢပ်ႇ တီႈဝဵင်းလွႆလႅမ်ၼႆႉ 1 ၸွႆႉလၢႆ 1,200 ထိုင် 1,400 ပျႃး။ ပီၵၢႆသမ်ႉ 1 ၸွႆႉလၢႆ 900 ပျႃး ယဝ်ႉ ၵေႃႈ ၵူၼ်းၵႃႉၶဝ် မႃးသိုဝ်ႉထိုင်ၼႂ်းဝၢၼ်ႈၼႂ်းသူၼ် ဝႃႈၼႆ။

ၼၢင်းၸၢမ်မႂ်ႇ ၸဝ်ႈသူၼ်ၶဝ်ႈၵၢပ်ႇ ၸႄႈဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ – “ၶၼ်ၶဝ်ႈၵၢပ်ႇ ပီၼႆႉတႄႉ လႆႈဝႃႈ ၶၼ်မၼ်းၶိုၼ်ႈလႄႈၶႅမ်ႉလိူဝ် ပီၵၢႆဢိတ်းၼိုင်ႈ။ ၵူၺ်းၵႃႈ ၵႃႈၸိူဝ်ႉ၊ ၵႃႈၾုၼ်ႇမၼ်းၵေႃႈ ၶိုၼ်ႈႁႅင်း၊ ၵႃႈၼမ်ႉမၼ်း တႃႇႁဵတ်းသူၼ်ၵေႃႈ ၵႃႈႁႅင်း တိုၼ်းလၢင်းမၼ်းတိူဝ်းၼမ် လိူဝ်ၵူႈပီ။ မိူဝ်ႈ လဵဝ် ၶၼ်ၶဝ်ႈၵၢပ်ႇ ၼိုင်ႈၸွႆႉ 1,400 ပျႃး ဢေႃႈ။ ၼိုင်ႈဝၼ်းၼိုင်ႈဝၼ်းၼႆႉ ၶၼ်မၼ်းဢမ်ႇမိူၼ်ၵၼ် မီး ဢၼ်ၶိုၼ်ႈဢၼ်လူင်းသေဢေႃႈ။ ဢၼ်ၶၢႆလႆႈငိုၼ်း ၵေႃႈ ပဵၼ်တူဝ်ၼပ်ႉမၼ်းၵူၺ်း ၵႃႈၶၼ်တႄႉ ဢမ်ႇပေႃးမီး။ ဢၼ်လႂ်ၵေႃႈ ၵႃႈၵူႈမဵဝ်း ၵႃႈၶၼ်ၼမ်ႉမႅတ်ႈတႄႉ ဢမ်ႇပိူင်ႈပီၵၢႆလေႃႇ”- ဝႃႈၼႆ။

ၼွၵ်ႈလိူဝ် ၸဝ်ႈသူၼ်ၶဝ်ႈၵၢပ်ႇၶဝ် ဢမ်ႇပေႃးလႆႈၼမ်ႉတွၼ်းယဝ်ႉ တႃႇၵူၼ်းသိုဝ်ႉၶၢႆၶဝ်ႈၵၢပ်ႇၵေႃႈ ယွၼ်ႉသိုၵ်းမၢၼ်ႈ ပိၵ်ႉဢိုတ်း ၵူတ်ႇထတ်းၸွမ်းသဵၼ်ႈတၢင်းႁၢဝ်ႈႁႅင်းလႄႈ ယင်းထူပ်းလွင်ႈယၢပ်ႇ တႃႇတေႃႉသူင်ႇၵႂႃႇမႃးယူႇ ဝႃႈၼႆ။

ၵူၼ်းသိုဝ်ႉၶၢႆၶဝ်ႈၵၢပ်ႇ ၼႂ်းၸႄႈဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ – “ဢၼ်သိုဝ်ႉၶဝ်ႈၵၢပ်ႇၼႆႉ မၼ်းဢမ်ႇသိုဝ်ႉယၢပ်ႇ။ ဢၼ်လူဝ်ႇတေႃႉသူင်ႇ မၼ်းၼၼ်ႉတႄႉ ၸွမ်းတႃႈၸွမ်းတၢင်းၼၼ်ႉဢေႃႈ။ ပေႃးၽႅဝ် ၼိုင်ႈၵဵတ်ႉၼိုင်ႈလၢၼ်ႇ ၼႆ လႆႈပွင်ႇလၢတ်ႈတီႈၵူၼ်းလူင်ၶဝ်သေ ၸင်ႇၵႂႃႇလႆႈ။ ႁဝ်းလႆႈပွင်ႇ လႅင်းၶဝ်ဝႃႈ ႁဝ်းၶၢႆပၼ် ၵူၼ်းႁဵတ်းႁႆႈႁဵတ်းၼႃး ၼႆသေ ၶဝ်ၸင်ႇပၼ်ၵႂႃႇဢိူဝ်ႈ။ လႆႈဝႃႈသိုၵ်းမၢၼ်ႈ ပိၵ်ႉသဵၼ်ႈတၢင်းၶႃႈဢေႃႈ။ ပေႃးၶဝ်ပွႆႇၵႂႃႇ ၸင်ႇၵွႆႈလႆႈၵႂႃႇ ႁဵတ်းၼႆ ဢေႃႈ”- ဝႃႈၼႆ။

ၶဝ်ႈၵၢပ်ႇ ဢၼ်ၽုၵ်ႇၼႂ်းမိူင်းတႆးပွတ်းၸၢၼ်း လၢႆတီႈလၢႆဝဵင်းၼႆႉ လႆႈသူင်ႇၶၢႆၸူး ပွတ်းဝဵင်းတူၼ်ႈတီးယဝ်ႉ။ ယင်းလႆႈ သူင်ႇၶၢႆပႃးၸွမ်းလိၼ်မိူင်းထႆး မိူၼ်ၼင်ႇ – ပွတ်းဝဵင်းတႃႈၶီႈလဵၵ်း၊ မျႃႉဝတီႇ ၸိူဝ်းၼႆႉ။ လိူဝ်ၼၼ်ႉ ဢၼ်သူင်ႇၶၢႆၸူး ပွတ်းလႅၼ်လိၼ်မိူင်းၶႄႇ တၢင်းဝဵင်းမိူင်းလႃး ၵေႃႈမီး။ ၵၢၼ်ၽုၵ်ႇၶဝ်ႈ ၵၢပ်ႇၼႆႉ ၵူႈပီ ယင်းပဵၼ်ၵၢၼ်ႁႃငိုၼ်း ၶဝ်ႈၼႂ်း ၼႃႈႁိူၼ်း တႃႇၸဝ်ႈသူၼ်ၶဝ်ယူႇ ဝႃႈၼႆ။