လိၵ်ႈယိုၼ်ႈထိုင် – ၸုမ်းၶၢဝ်ႇၽူႈတွႆႇႁွၵ်ႈ

ၶႃႈႁဝ်းပဵၼ် ၸဝ်ႈႁႆႈၸဝ်ႈၼႃး ၵူၼ်းမိူင်းယႆၵေႃႉၼိုင်ႈ ၶႃႈဢေႃႈ ။ ဢမ်ႇၸၢင်ႈတၢင်ႇၸၢင်ႈလၢတ်ႈတီႈလႂ်လႄႈ ၶႂ်ႈယွၼ်းသူင်ႇတီႈၽူႈတွႆႇႁွၵ်ႈႁဵတ်းၶူဝ်ႁဵတ်းႁၢဝ်းပၼ်သေ ပိုၼ်ၽၢဝ်ႇပၼ်ၽွင်ႈၶႃႈ။

ယၢမ်းလဵဝ်တီႈမိူင်းယႆၼႆႉ  ၼႂ်းပွၵ်ႉ 1 လႄႈ ပွၵ်ႉ 3 – မီးၵၢင်ႉၵႄႇပူႇထဝ်ႈဝၢၼ်ႈ ႁွင်ႉဢဝ်ၵူၼ်းဝၢၼ်ႈၵူၼ်းသူၼ်သေ သင်ႇႁႂ်ႈသူင်ႇၵူၼ်းသိုၵ်းမႂ်ႇပၼ် သိုၵ်းတႆး SSPP ဝႃႈၼႆၶႃႈဢေႃႈ။

ဢၼ်ႁွင်ႉၵႂႃႇႁဵတ်းသိုၵ်းၼႆႉ ယွၼ်ႉပဵၼ်သိုၵ်းတႆးႁဝ်းၵူၺ်းလႄႈ ပေႃးႁွင်ႉမႃးပဵၼ်တၢင်းၵၢၼ် တၢင်းလိၵ်ႈလၢႆး ၸုမ်ႈသႅင်းသေ ႁွင်ႉၽဵင်ႇၽဵင်ႇၵၼ်တႄႉ ႁဝ်းၶႃႈဢမ်ႇတွပ်ႇဢမ်ႇထဵင် တိုၼ်းမီးပုၼ်ႈၽွၼ်းသူင်ႇပၼ်ယူႇ။

ယၢမ်းလဵဝ်ဢၼ်တႄႇႁွင်ႉမႃးၼႂ်းလိူၼ်ၼူဝ်ႊဝႅမ်ႊပိူဝ်ႊၼႆႉ  ၸုမ်ႈသႅင်းလိၵ်ႈလၢႆးတၢင်းငဝ်ႈငုၼ်းၵေႃႈ ဢမ်ႇပႃး လိၵ်ႈၵေႃႈဢမ်ႇမီး။ ၶႂ်ႈႁွင်ႉၽႂ်ၵေႃႈၸူၵ်းႁွင်မၵ်းၶၢၼ်းဢဝ်။ မီလုၵ်ႈၸၢႆး 2 တေလႆႈသူင်ႇပၼ်ၵေႃႉၼိုင်ႈ ။ ပေႃးတူၵ်းၸိုဝ်ႈမႃးယဝ်ႉႁႂ်ႈၵႂႃႇလၢႆးငၢၼ်းတူဝ်တီႈ  ၵႅမ်ၸဝ်ႈၸႄႈတွၼ်ႈ ၸဝ်ႈလႃႉ ၼႆဝႃႇ။

ပေႃးၵႂႃႇလၢႆးငၢၼ်းတူဝ်ယဝ်ႉ ၵမ်ႈၽွင်ႈၵေႃႈ ၵႂႃႇတွင်းပၢၼ်ႇသေ လွတ်ႈၵၢင်းမႃးၵေႃႈမီး။ ၵမ်ႈၽွင်ႈတႄႉ တွင်းပၢၼ်ႇၸိူင်ႉႁိုဝ်ၵေႃႈဢမ်ႇလႆႈ။ ႁႂ်ႈမိူဝ်းယူႇႁိူၼ်းဝႆႉ။ ပေႃးလူဝ်ႇတေႁွင်ႉမႃး -ဝႃႈၼႆ။ ၵမ်ႈၽွင်ႈသမ်ႉ ထုၵ်ႇသူင်ႇတူဝ်ၵႂႃႇၵမ်းလဵဝ်။ ၵၢၼ်သိုၵ်းတႄႉဢမ်ႇပႆႇလႆႈၾိုၵ်း ၵူၺ်းၵႃႈလႆႈၼုင်ႈၶူဝ်းသိုၵ်းသေ ၵႂႃႇပႂ်ႉ ၸွမ်းၵဵတ်ႉ ၸွမ်းလၢၼ်ႇ ပႂ်ႉၵဵပ်းၶွၼ်ႇ ၵေႃႈမီး။ ဢၼ်ၼႆႉပဵၼ်ၵူၼ်းႁူႉၸၵ်းလႄႈ ႁပ်ႉပၢၵ်ႇဝႃႈ ပဵၼ်လွင်ႈတႄႉမၼ်းဢေႃႈ။

ၵူၼ်းပွၵ်ႉ 1 တႄႉလႆႈၵႂႃႇ 5-6 ၵေႃႉယဝ်ႉ။ ၵမ်ႈၽွင်ႈၵေႃႈဢႃယု 18။ ၵမ်ႈၽွင်ႈၵေႃႈ 20 ။ ၵမ်ႈၽွင်ႈ ပေႃး မီးၼႃႈႁိူၼ်း မီးလုၵ်ႈလၢင်းယဝ်ႉ။ ပဵၼ်ဢၼ်ယၢပ်ႇၽိုတ်ႇ ၵိၼ်းၸႂ်တႃႇလုၵ်ႈလၢင်း မေးၼၢင်းၸိူဝ်း ၵိုတ်း တၢင်းလင်ၶႃႈဢေႃႈ။  

ၵူႈပွၵ်ႈတႄႉ ပေႃးမီးၼႃႈႁိူၼ်းယဝ်ႉၼႆ တၢင်းငဝ်ႈငုၼ်းလွတ်ႈၵၢင်းပွႆႇဝၢင်းပၼ်။ ၵမ်းၼႆႉတႄႉ ဢမ်ႇဝူၼ်ႉ သွၼ်ႇသေဢိတ်းယဝ်ႉ ။ သႅၼ်းပၢၼ်လႂ်ၵေႃႈဢဝ် ၼႆဢေႃႈ။

ၼႂ်းမိူင်းယႆၼႆႉ မီးလင်ႁိူၼ်းၼပ်ႉႁူဝ်ႁဵင် ၵူၺ်းၵႃႈ မႃးၸူၵ်းဢဝ်ၼႂ်းပွၵ်ႉႁဝ်းၶႃႈ 2-3 ပွၵ်ႉၵူၺ်းၼႆႉ မၼ်း ပဵၼ်လွင်ႈၸိူင်ႉႁိုဝ်တႄႉတႄႉၼႆ ၶႂ်ႈႁႂ်ႈတၢင်းငဝ်ႈငုၼ်း ၸႅင်ႈလႅင်းပၼ်သေၵမ်း။

ယွၼ်ႉဝႃႈယၢမ်းလဵဝ် ၵၢၼ်မိူင်းၵေႃႈသုၵ်ႉ ၵၢၼ်ႁႃၵိၼ်လဵင်ႉတွင်ႉၵေႃႈယၢပ်ႇၽိုတ်ႇ။ သမ်ႉလႆႈပၢႆႈၽေး သိုၵ်းၵႂႃႇၵႂႃႇမႃးမႃးယူႇတိၵ်းတိၵ်း၊ သမ်ႉမႃးတူၵ်းၸိုဝ်ႈ ၸူၵ်းႁွင်ႉၼႂ်းပွၵ်ႉႁဝ်း ယွမ်ႇႁဝ်းၵူၺ်းၼႆႉ ႁၼ် ထိုင်ဝႃႈ  မၼ်းဢမ်ႇၸွမ်းပၵ်းပိူင် ၊  ႁဝ်းၶႃႈ မႆႈၸႂ်  ၊  ဢမ်ႇၶႂ်ႈႁႂ်ႈလုၵ်ႈၸၢႆးႁဝ်း ၵႂႃႇႁဵတ်းသိုၵ်း  ဢၼ်ဢမ်ႇ လႆႈတိုၵ်းၽူႈၶဵၼ်ၽုင်ႇ ။

မိူဝ်ႈသိုၵ်းၶဝ်မႃးၼႂ်းဝၢၼ်ႈၼႂ်းဝဵင်း ဝႃႈဢဝ်ႁူမ်ႇလူမ်ႈပၼ်ၼႆၼၼ်ႉတႄႉ ၵူၼ်းမိူင်းၸူမ်းသိူဝ်းတႄႉ။ ၵမ်းၼႆႉ ပေႃးမႃးလႃႈလီႈၵဵပ်းၵူၼ်းမႂ်ႇ ၸိူင်ႉၼႆတႄႉ ဢမ်ႇၸႂ်ႈလွင်ႈမၼ်းယဝ်ႉၶႃႈ။

ၵူၼ်းၸိူဝ်းလုၵ်ႉတီႈဝၢၼ်ႈသေ ပၢႆႈၶဝ်ႈမႃးၼႂ်းဝဵင်းၼၼ်ႉၵေႃႈ ၵူၼ်းၸိူဝ်းၺႃးသဵၼ်ႈမၢႆၼၼ်ႉ ၶိုၼ်းပွၵ်ႈမိူဝ်းၶဝ်ႈႁၢပ်ႇၵၢၼ်ယူႇ။

ဢၼ်ၵူၼ်းမိူင်းဢမ်ႇထုၵ်ႇၸႂ် လွင်ႈၵဵပ်းသိုၵ်းၵမ်းၼႆႉတႄႉပဵၼ်ယွၼ်ႉၵူၼ်းမိူင်းႁၼ်ထိုင်ဝႃႈ –  ဢမ်ႇမီး လိၵ်ႈမီးလၢႆးမႃးၸိူင်ႉမိူဝ်ႈၵွၼ်ႇ၊ ပဵၼ်ၽႂ်သၢင်ႉသင်ႇလူင်းမႃးတႄႉတႄႉ၊ ယူဝ်ၶေး တၢင်းငဝ်ႈငုၼ်း ႁွင်ႉ ဢမ်ႇၸႂ်ႈသေ ပဵၼ်သုၼ်ႇတူဝ်ႁွင်ႉႁႃႉ – ၼႆၸိူဝ်းၼႆႉဢေႃႈ။ လွင်ႈၼႆႉ ၶႂ်ႈပိုင်ႈတၢင်းငဝ်ႈငုၼ်း ၵူတ်ႇထတ်း ပၼ် တူၺ်းလီလီသေ ႁႂ်ႈလႆႈၶိုင်ပွင်ပၼ် ႁႂ်ႈမီးလွင်ႈၽဵင်ႇပဵင်းသေၵမ်း။  

လုင်းလွႆ ၸဝ်ႈႁႆႈၸဝ်ႈၼႃး ဝဵင်းမိူင်းယႆ

29-11-2024