မိူဝ်ႈၼႆႉ 03/12/2024 ၵၢင်ၼႂ်ၸဝ်ႉ 3 မူင်းပၢႆ သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇတီႈဝၢၼ်ႈသၢႆးၶွၼ် ၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း။

သိုၵ်းမၢၼ်ႈ ဢဝ်ၶိူင်ႈမိၼ် Y 12 မႃးပွႆႇထတ်းၵၼ် ၽွင်းၵူၼ်းဝၢၼ်ႈၵူၼ်းမိူင်းၼွၼ်းလပ်းယဵၼ် ဢမ်ႇယွမ်း 30 လုၵ်ႈ ဝႃႈၼႆ။

ၼၢင်းယိင်း ၵူၼ်းပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ -“ၸႂ်ႈဢေႃႈ ၵၢင်ၼႂ်ၸဝ်ႉ သိုၵ်းမၢၼ်ႈ မႃးပွႆႇမၢၵ်ႇ တီႈဝၢၼ်ႈသၢႆး ၶွၼ်။ တင်းဝၢၼ်ႈ ၵပ်းသိုပ်ႇၾူၼ်းၸူးၵေႃႈ ဢမ်ႇလႆႈလႄႈ ဢမ်ႇလႆႈႁူႉႁူဝ်ၼပ်ႉၵူၼ်းမၢတ်ႇၸဵပ်းလူႉတၢႆ တႅတ်ႈတေႃးလီ ဢၼ်လႆႈငိၼ်းမႃးတႄႉ လူႉတၢႆ 4 ၵေႃႉၼၼ်ႉ ပဵၼ်ၵူၼ်းၸၢႆးၼႆၶႃႈဝႃႇ။ ၵူၼ်းဝၢၼ်ႈပီႇၵိၼ်း(ပီကင်း)၊ လွႆယႅၼ်း (လွယ်ရင်း) ၸိူဝ်းၼၼ်ႉၵေႃႈ ဢွၼ်ၵၼ်လႆႈပၢႆႈထႅင်ႈ ယူႇဢမ်ႇလႆႈယဝ်ႉ။ တၢင်းၾၢႆၶုၼ် – မိူင်းပၢႆးတႄႉ ပဵၼ်သိုၵ်းၵၼ်ဝႆႉၶိုၼ်းၶႃႈဢေႃႈ”- ဝႃႈၼႆ။

ယၢမ်းလဵဝ် ၵူၼ်းတၢင်း ဝၢၼ်ႈပီႇၵိၼ်း (ပီကင်း)၊ လွႆယႅၼ်း ဢွၼ်ၵၼ် ပၢႆႈၽေးသိုၵ်းယူႇဝႆႉ တီႈႁိမ်းႁွမ်းဝၢၼ်ႈ ၼႂ်းသူၼ်ၼႂ်းႁႆႈ ပေႃးငဝ်းလၢႆးယဵၼ်ၸင်ႇ မိူဝ်းယူႇၶိုၼ်း ႁိူၼ်းၽႂ်မၼ်း။ သွင်ဝၼ်းပူၼ်ႉမႃးၼႆႉ ၵူၼ်းတၢင်းဝၢၼ်ႈ ဢွၼ် ၵၼ်လႆႈပၢႆႈၽေးသိုၵ်းၶိုၼ်း ယွၼ်ႉပဵၼ်ပၢင်တိုၵ်းၵၼ် ဝႃႈၼႆ။

တၢင်းတူၼ်ႈတီး ပွတ်းၸၢၼ်း ၼႂ်းၶၢဝ်းတၢင်း ဝူင်ႈပၢႆၼႆႉ ၽွင်းၵၢင်ၶမ်ႈ လႆႈႁၼ်သိုၵ်းမၢၼ်ႈၶဝ် လၢႆႈၵူၼ်းၵၼ်၊ ၵႃးတၢင်ႇၵုၼ်ႇၶဝ်ၵေႃႈ ထႅမ်ႁႅင်းသိုၵ်း ၵႂႃႇတၢင်းၾၢႆၶုၼ်ထႅင်ႈ – ၵူၼ်းပိုၼ်ႉတီႈလၢတ်ႈ။

ဢၼ်သိုၵ်းမၢၼ်ႈ ပွႆႇမၢၵ်ႇတီႈဝၢၼ်ႈ ၵူၼ်းၸၢႆး ဢႃယု 14 ပီ လူႉတၢႆ 1 ၵေႃႉ၊ မၢတ်ႇၸဵပ်း 1 ၵေႃႉ သိုဝ်ႇၶၢဝ်ႇ  Kantarawaddy Times တႄႉ ဢွၵ်ႇဝႆႉၼင်ႇၼႆ။

တီႈပၢင်သဝ်း ၵူၼ်းပၢႆႈၽေးသိုၵ်းၼၼ်ႉ မီးလင်ႁိူၼ်း 60 ပၢႆ ႁူဝ်ၵူၼ်း 340 ပၢႆ ၊ ၵမ်ႈၼမ် ပဵၼ်ၵူၼ်းမိူင်း ၸိူဝ်းယူႇသဝ်း တီႈၼႂ်းၸႄႈဝဵင်းၾၢႆၶုၼ်၊ မိူင်းပၢႆး ပၢႆႈၵႂႃႇသွၼ်ႈယူႇဝႆႉ ၼႆယဝ်ႉ။

တီႈတၢင်းဝဵင်းမိူင်းပၢႆးလႄႈ ၾၢႆၶုၼ် ၸိုင်ႈတႆးပွတ်းၸၢၼ်းၼႆႉ တိတ်းၸပ်းၵၼ် တၢင်းမိူင်းယၢင်းလႅင်၊ သိုၵ်းမၢၼ်ႈလႄႈ ၸုမ်းၵႅတ်ႇၶႄၵူၼ်းမိူင်းႁူမ်ႈလူၺ်ႈ သိုၵ်းၽွမ်ႉႁူမ်ႈယၢင်းလႅင် ပဵၼ်ပၢင်တိုၵ်းၵၼ်ဢမ်ႇထၢတ်ႇ။ ၵူၼ်းမိူင်းဢမ်ႇလႆႈၶဝ်ႈယူႇ ၼႂ်းဝၢၼ်ႈၼႂ်းဝဵင်း၊ လႆႈပၢႆႈၽေးသိုၵ်းဝႆႉ မီးမႃးၶၢဝ်းတၢင်း 3 ပီပၢႆယဝ်ႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)