ဝၼ်းတီႈ 30/11/2024 ယၢမ်းၵၢင်ဝၼ်း ရူတ်ႉၵႃးလမ်းၼိုင်ႈ ဢၼ်တၢင်ႇမႃးသင်ၶၸဝ်ႈ လုၵ်ႉတၢင်းဝဵင်းလွႆၶေႃ ၶိုၼ်ႈမႃးတၢင်းဝဵင်းသီႇသႅင်ႇ ၺႃးယိုဝ်းၵၢင်တၢင်း သင်ၶၸဝ်ႈ လူႉလွၼ်ႇၵႂႃႇတူၼ်ၼိုင်ႈ လႄႈ မၢတ်ႇၸဵပ်း 2 တူၼ်။
ရူတ်ႉၵႃးလမ်းၼၼ်ႉ ၺႃးယိုဝ်းတီႈႁိမ်းဝၢၼ်ႈ ဢွင်ႇၵလၢပ်ႉ တီႈဢၼ်မီးတပ်ႉပၢင်သဝ်းသိုၵ်းမၢၼ်ႈပၵ်းသဝ်းဝႆႉ။
ၸဝ်ႈတူၼ်ၶူးၼင်ႈၵျွင်း တိုဝ်ႉၸၢႆးၶႃးတႄႉ မၢတ်ႇၸဵပ်းႁၢဝ်ႈႁႅင်းသေ လူႉလွၼ်ႇထင်တီႈ။ ၸဝ်ႈတူၼ်ၶူးထႅင်ႈ 2 တူၼ် ဢၼ်ၶီႇမႃးၸွမ်းၼၼ်ႉတႄႉမၢတ်ႇၸဵပ်းႁၢဝ်ႈႁႅင်း ။
ၸၢႆးၼုမ်ႇၵူၼ်းမိူင်းဝဵင်းသီႇသႅင်ႇလၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်သိုၵ်းမၢၼ်ႈ ဢၼ်ပၵ်းပၢင်သဝ်းဝႆႉတီႈဝၢၼ်ႈဢွင်ႇၵလၢပ်ႉၼၼ်ႉ ယိုဝ်းဢေႃႈ။ ၸဝ်ႈတူၼ်ၶူး တိုဝ်ႉၸၢႆးၶႃး လူႉလွၼ်ႇထင်တီႈ။ ယွၼ်ႉသင်လႄႈယိုဝ်းတႄႉဢမ်ႇႁူႉ။ ”- ဝႃႈၼႆ။
ၵူၼ်းမိူင်းသီႇသႅင်ႇၵေႃႉၼိုင်ႈၵေႃႈလၢတ်ႈဝႃႈ – ၽွင်းသိုၵ်းမၢၼ်ႈပိုတ်းယိုဝ်း တီႈတိုဝ်ႉၸၢႆးၶႃး ပီၵၢႆ ပီဢွၼ်ၼၼ်ႉ ၸဝ်ႈတူၼ်ၶူး ယၢမ်ႈၵႂႃႇလၢတ်ႈတီႈသိုၵ်းမၢၼ်ႈဝႃႈ ယႃႇယိုဝ်းသႂ်ႇဝတ်ႉဝႃးၽႃသိူဝ်ႇ ၼႆပွၵ်ႈၼိုင်ႈ– ဝႃႈၼႆ။
လွင်ႈၼႆႉ ၵူၼ်းၵမ်ႉထႅမ်ႁၼ်လီသိုၵ်းမၢၼ်ႈတႄႉတႅမ်ႈတၢင်ႇလၢတ်ႈဝႃႈ – ပဵၼ်သိုၵ်းယၢင်းလႅင် KNDF- PDF ယိုဝ်းရူတ်ႉၵႃးၸဝ်ႈတူၼ်ၶူး ဝႃႈၼႆသေတႃႉ – ၵူၼ်းမိူင်းဝဵင်းသီႇသႅင်ႇတႄႉလၢတ်ႈဝႃႈ တီႈဢၼ် ရူတ်ႉၺႃးယိုဝ်းၼၼ်ႉ ဢမ်ႇမီးသိုၵ်းၸၢဝ်းၶိူဝ်း။ ပဵၼ်တီႈပၢင်သဝ်းသိုၵ်းမၢၼ်ႈယူႇလႄႈ တိုၼ်းပဵၼ်ၼမ်ႉမိုဝ်းသိုၵ်းမၢၼ်ႈၵူၺ်း – ဝႃႈၼႆ။
မိူဝ်ႈဝႃး ယၢမ်းၵၢင်ၼႂ်ၸဝ်ႉ 4 မူင်းၼၼ်ႉၵေႃႈ သိုၵ်းမၢၼ်ႈဢဝ်ၶိူင်ႈမိၼ် သႅၼ်းၵျႅတ်ႉၾၢႆႇတိူဝ်ႊ 2 လမ်းၵႂႃႇယိုဝ်းတီႈဝၢၼ်ႈ ႁူဝ်ၼမ်ႉ ၼႂ်းၸႄႈဝဵင်းမွၵ်ႇမႆႇ ၼႆ ၶုၼ်ႇရဵင်းယၢၼ်ႇ ၽူႈမီးပုၼ်ႈၽွၼ်းႁွင်ႈၵၢၼ်ၾၢႆႇပွင်ႇၶၢဝ်ႇ PNLA လၢတ်ႈတီႈၽူႈတွႆႇႁွၵ်ႈၼင်ႇၼႆ။
“သိုၵ်းမၢၼ်ႈ ဢဝ်ၶိူင်ႈမိၼ်မႃးယိုဝ်းတီႈဝၢၼ်ႈႁူဝ်ၼမ်ႉ 2 လမ်း ။ ၼိုင်ႈလမ်းၼႆႉ ပွႆႇမၢၵ်ႇတူၵ်းမွၵ်ႈ 7 လုၵ်ႈ။ တိူဝ်ႉသႂ်ႇႁိူၼ်းယေး ၵူၼ်းဝၢၼ်ႈ လူႉၵွႆ 10 လင်ပွႆ။ ၵတ်ႉၵႃႈ ၵူၼ်းဝၢၼ်ႈတႄႉ ဢမ်ႇမၢတ်ႇၸဵပ်းလူႉတၢႆသေၵေႃႉ တၼ်းပၢႆႈလွတ်ႈၽေးယူႇ”– ဝႃႈၼႆ။
ယၢမ်းလဵဝ်ၵေႃႈ ၼႂ်းၸႄႈဝဵင်းသီႇသႅင်ႇၼၼ်ႉ ၶွင်ႇသီႇသိုၵ်းမၢၼ်ႈဢၼ်ႁူမ်ႈၵၼ်တင်းပျီႇတူႉၸိတ်ႉပဢူဝ်း PNO ၼၼ်ႉ ပိုတ်းယိုဝ်းၵၼ်တင်းသိုၵ်း PNLA ႁၢဝ်ႈႁႅင်း။ သိုၵ်းမၢၼ်ႈ ဢဝ်ၶိူင်ႈမိၼ်သိုၵ်းလႄႈၻရူၼ်ႊ ပိုတ်းယိုဝ်းၸွႆႈ။ တိူဝ်ႉသႂ်ႇဝၢၼ်ႈသူၼ်ႁိူၼ်းယေး။ ၵူၼ်းမိူင်းလႆႈလူႉတၢႆမၢတ်ႇၸဵပ်းၸွမ်း။
ၵဵဝ်ႇၵပ်းပၢင်တိုၵ်းၼႆႉသေ ပျီႇတူႉၸိတ်ႉ PNO တႄႉလၢတ်ႈဝႃႈ – PNLA ၼႆႉပူၼ်ႉပႅၼ်ၶဝ်ႈမႃးၼႂ်းမွၵ်ႇမႆႇ တီႈဢၼ် ပျီႇတူႉၸိတ်ႉပဢူဝ်းတူင်ႉၼိုင်ၵုမ်းၵမ်။ လိူဝ်ၼၼ်ႉ PNLA ၼႆႉ ပူၼ်ႉပႅၼ်ၶေႃႈတူၵ်းလူင်း NCA သေ ၸင်ႇလႆႈသင်ႇသွၼ် – ၼႆ ၽူႈမီးပုၼ်ႈၽွၼ်း PNO လၢတ်ႈတီႈ ၽူႈတွႆႇႁွၵ်ႈ မိူဝ်ႈဝၼ်းတီႈ 28/11/2024 ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ