ၽူႈၵွၼ်းဝၢၼ်ႈဢိူင်ႇ တႂ်ႈသိုၵ်းမၢၼ်ႈထုၵ်ႇၶႃႈႁႅမ် တီႈဝဵင်းယႂႃႇငၢၼ်ႇ ၊ ၵူၼ်းမိူင်းၵေႃႈၺႃးၸၢၵ်ႈၵႄႈၵၢင် တၢႆၸွမ်းၵေႃႉၼိုင်ႈ ။
ဝၼ်းတီႈ 26/11/2024 ယၢမ်းၵၢင်ၶမ်ႈ 6 မူင်း ၽွင်းၵၢင်ႉၵႄႇဝၢၼ်ႈ ၽယႃးၵျီးၵူင်း ဝဵင်းယႂႃႇငၢၼ်ႇ ၸိုဝ်ႈ ဢူးၸေႃႇမဵဝ်းၼၢႆႇ တိုၵ်ႉဢုၵ်ႇၵၼ်တင်းၵူၼ်းဝၢၼ်ႈၵေႃႉၼိုင်ႈယူႇၼၼ်ႉ မီးၽူႈၸၢႆးဢမ်ႇႁူႉၾၢႆႇ 2 ၵေႃႉ ၶဝ်ႈႁိူၼ်းမႃးယိုဝ်းတၢႆထင်တီႈ တင်း 2 ၵေႃႉ။
ၵူၼ်းဝၢၼ်ႈ ဢၼ်မီးၼႂ်းပိူင်ပဵၼ် ၽွင်းၼၼ်ႉလၢတ်ႈၽူႈတွႆႇႁွၵ်ႈဝႃႈ -“ၽွင်း ၽူႈၵွၼ်းဝၢၼ်ႈလႄႈ ၵူၼ်းဝၢၼ်ႈ ဢုပ်ႇၵၼ်ယူႇၼၼ့် မီးၵူၼ်း 2 ၵေႃႉ ဢဝ်ၵွင်ႈမႃးယိုဝ်း ၊ တၢႆထင်တီႈ တင်းသွင် ။ ၵူၼ်းဝၢၼ်ႈတႄႉ ဢွၼ်ၵၼ်ဝႃႈ ၵူၼ်းယိပ်းၵွင်ႈၼၼ်ႉ ပဵၼ်ၸုမ်း PDF ၼႆဝႃႇ”- ဝႃႈၼႆ ။
ဝၢႆး ၽူႈၵွၼ်းဝၢၼ်ႈဢိူင်ႇလႄႈ ၵူၼ်းဝၢၼ်ႈ ထုၵ်ႇယိုဝ်းၶႃႈႁႅမ်တၢႆယဝ်ႉ ၾၢႆႇတင်းသိုၵ်းမၢၼ်ႈ မႃးၵူတ်ႇထတ်းသေ ယၢမ်းလဵဝ် ထႅမ်ႁႅင်းသိုၵ်း ဢဝ်ႁူမ်ႇလူမ်ႈဝႆ့တီႈဝၢၼ်ႈၼၼ်ႉ ပဵၼ်သိုၵ်းမၢၼ်ႈၵႂႃႇမူတ်း ဝႃႈၼႆ ။
ၼၢင်းယိင်းၵူၼ်းပိုၼ့်တီႈဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈဝႃႈ-“ၸူဝ်ႈဝူင်ႈဝၢင်ႈၼႆ့ တီႈဝဵင်းယႂႃႇငၢၼ်ၼႆ့ ၵႆႉမီးလွင်ႈၶႃႈႁႅမ်ၵၼ်တၢႆ။ ယူႇဢမ်ႇမီးလွင်ႈႁူမ်ႇလူမ်ႈသေဢိတ်းယဝ်ႉ။ ငဝ်းလၢႆးယၢမ်းလဵဝ် ပေႃးဢမ်ႇမီးလွင်ႈထုၵ်ႇၸႂ်ၵၼ်သင်ဢိတ်းဢွတ်းၵေႃႈ ႁႅမ်ၵၼ်တၢႆတိၵ်းတိၵ်း။ ”- ဝႃႈၼႆ ။
ပူၼ်ႉမႃး မိူဝ်ႈဝၼ်းတီႈ 13/10/2024 ၵေႃႈတေႃႈၼင်ႇၼၼ်။သွင်ၽူဝ်မေး ၽူႈၵွၼ်းဝၢၼ်ႈတဵင်ႇၵူင်း ၸႄႈဝဵင်းယႂႃႇငၢၼ်ႇ ၼၼ်ႉၵေႃႈ ၺႃးၸုမ်းဢမ်ႇႁူႉၾၢႆႇ ၶဝ်ႈယိုဝ်းတၢႆၵိုၵ်းႁိူၼ်းၼင်ႇၵဝ်ႇ။ ၽိူဝ်ႇ သိုၵ်းမၢၼ်ႈ ၶဝ်ႈၵူတ်ႇထတ်းပိူင်ပဵၼ်ယဝ်ႉၼၼ်ႉ တီႉၺွပ်းဢဝ်ၵူၼ်းထဝ်ႈၼႂ်းဝၢၼ်ႈၵႂႃႇ 2 ၵေႃႉၽူႈၸၢႆးၵေႃႉၼိုင်ႈလႄႈ ၽူႈယိင်းၵေႃႉၼိုင်ႈ ၸိူဝ်းၶဝ်မီးဢႃယု မွၵ်ႈ 60 ပီယဝ်ႉ။ ဢဝ်ၵႂႃႇၵုမ်းၶင်ဝႆႉ 2 ဝၼ်းသေ ၸင်ႇပွႆႇပၼ်တူဝ်ၶိုၼ်း ဝႃႈၼႆ ။
ယၢမ်းလဵဝ် တီႈဝဵင်းယႂႃႇငၢၼ် ပၢင်တိုၵ်းယဵၼ်ဝႆ့သေတႃႇ တီႈၵဵတ့်လၢၼ်ႇ တင်းၶဝ်ႈတင်းဢွၵ်ႇလႄႈ ၼႂ်းဝၢၼ်ႈ သိုၵ်းမၢၼ်ႈၵူတ်ႇထတ်းႁၢဝ်ႈႁႅင်းၼႆ ၵူၼ်းပိုၼ့်တီႈလၢတ်ႈၼင်ၼႆ ။
တႅမ်ႈ -ယိင်းသဵဝ်ႈၶၢဝ် ( ၽူႈတွႆႇႁွၵ်ႈ )
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ