သိုၵ်းမၢၼ်ႈ ယိုတ်ႈမိူင်း ၵူတ်ႇထတ်း ၵၢၼ်တေႃႉသူင်ႇၶူဝ်ၵုၼ်ႇ – ၼမ်ႉမၼ်းၸိူဝ်ႉၾႆး ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းယႆ ထူပ်းတၢင်းယၢပ်ႇၽိုတ်ႇ တႃႇႁႃၵိၼ်လဵင်ႉတွင်ႉ။

ယၢမ်းလဵဝ် သိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်း ၼႂ်းၸိုင်ႈတႆးပွတ်းႁွင်ႇလၢႆတီႈသေ တႃႇတေႃႉသူင်ႇၶူဝ်းၵုၼ်ႇလႄႈ ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) ၸိူဝ်းၼႆႉယၢပ်ႇသေ တုမ်ႉတိူဝ်ႉၵူၼ်းမိူင်း ၼႂ်းၸႄႈ ဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ထူပ်းတၢင်းယၢပ်ႇၽိုတ်ႇ ယွၼ်ႉဢမ်ႇၸၢင်ႈၵႂႃႇ မႃးတေႃႉသူင်ႇငၢႆႈ မိူၼ်ၵူႈပွၵ်ႈယဝ်ႉ ဝႃႈၼႆ။  

ၵူၼ်းပိုၼ်ႉတီႈ မိူင်းယႆ လၢတ်ႈၽူႈတွႆႇႁွၵ်ႈဝႃႈ – “သဵၼ်ႈတႃႈသၢႆတၢင်း ၼႂ်းမိူင်းတႆးပွတ်းႁွင်ႇၼႆႉ သိုၵ်းမၢၼ်ႈၶဝ် ပိၵ်ႉဝႆႉ။ တႃႇတေတေႃႉၶူဝ်းၵုၼ်ႇ ၼိုင်ႈပွၵ်ႈ၊ တၢင်ႇၼမ်ႉမၼ်း ၼိုင်ႈပွၵ်ႈၼႆႉ လႆႈၵႂႃႇဢုပ်ႇၶဝ်သေ သင်ၶဝ်ပွႆႇပၼ် ၸင်ႇတေၵႂႃႇမႃးလႆႈ။ ၼမ်ႉမၼ်းၸိူဝ်းၾႆးၼႆႉ မိူဝ်ႈသိုဝ်ႉတႄႉ ဢမ်ႇယၢပ်ႇ မၼ်းမႃးယၢပ်ႇၸွမ်းသဵၼ်ႈတၢင်း ၸိူဝ်းၼႆႉ။ ၵဵတ်ႉလၢၼ်ႇ ၼိုင်ႈတီႈၼိုင်ႈတီႈၼႆႉ တေလႆႈလၢတ်ႈပွင်ႇ ၶၢဝ်ႇၸူးၵူၼ်းလူင်ၶဝ်ယဝ်ႉ ၸင်ႇတေတေႃႉတၢင်ႇၵႂႃႇမႃးလႆႈ။ မၼ်းယၢပ်ႇၸိူင်ႉၼႆဢေႃႈ။ ပေႃးႁဝ်း ဢမ်ႇပွင်ႇၶၢဝ်ႇၼႆ ၶဝ်ဢမ်ႇပၼ်ၵႂႃႇမႃးၶႃႈ”- ဝႃႈၼႆ။

ယွၼ်ႉၵၢၼ်တေႃႉသူင်ႇၵႂႃႇမႃးယၢပ်ႇ လူၺ်ႈသိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်း ၸိူဝ်းၼႆႉသေ ႁဵတ်းႁႂ်ႈၶၼ်ၶူဝ်းၵုၼ်ႇ ပုင်ႈၶိုၼ်ႈ ၵူႈဢၼ် တႃႇတေသိုဝ်ႉၼမ်ႉမၼ်း ၸိူဝ်ႉၾႆးၵေႃႈယၢပ်ႇလႄႈ ၵူၼ်းမိူင်းပႃး ၸဵမ်ၸဝ်ႈသူၼ်ၸဝ်ႈၼႃးၶဝ် ထူပ်းတၢင်းယၢပ်ႇ တႃႇၵႂႃႇမႃးႁႃၵိၼ်လဵင်ႉတွင်ႉ။

“ႁဝ်းၵူၼ်းမိူင်းတႄႉ လႆႈၸႂ်ယႂ်ႇ ၵၢၼ်ၵႃႉၶၢႆ၊ ၵၢၼ်သူၼ်ႁႆႈၼႃး ၸိူဝ်းၼႆႉၵူၺ်း။ ဢၼ်ႁဵတ်းသူၼ်ႁႆႈၼႃးၼႆႉၵေႃႈ သမ်ႉလူဝ်ႇသိုဝ်ႉၾုၼ်ႇထၢတ်ႈ။ ယွၼ်ႉပိူဝ်ႈ ၵၢၼ်တေႃႉသူင်ႇယၢပ်ႇလႄႈ ႁဵတ်းႁႂ်ႈၶၼ်ၼမ်ႉမၼ်း၊ ၾုၼ်ႇထၢတ်ႈ ၵႃႈယႂ်ႇႁႅင်း။ သူၼ်ႁႆႈၼႃး တီႈမိူင်းယႆၼႆႉ ၵမ်ႈၼမ် တေၸတ်းၸၢၵ်ႈထႆ။ ယၢမ်းလဵဝ် တႃႇတေသိုဝ်ႉၸႂ်ႉၼမ်ႉမၼ်းၸိူဝ်ႉၾႆး မၼ်း ဢမ်ႇငၢႆႈ ပႃးၸဵမ်ၵူၼ်းၵႃႉ ၵူၼ်းသိုဝ်ႉ ယၢပ်ႇ ၽိုတ်ႇၵူႈသႅၼ်းယဝ်ႉ”- ၵူၼ်းမိူင်းယႆ သိုပ်ႇလၢတ်ႈၼႄၼင်ႇၼႆ။

ၵူၼ်းႁေႃႈရူတ်ႉၵႃးၶဝ်တႄႉ လၢတ်ႈဝႃႈ – ယၢမ်းလဵဝ် တႃႇတေတေႃႉတၢင်ႇၶူဝ်းၵုၼ်ႇၸိူဝ်းၼႆႉ လႆႈယွၼ်းဝႂ်ႁပ်ႉႁွင်း တီႈသိုၵ်းမၢၼ်ႈယဝ်ႉ ၸင်ႇတေလႆႈတေႃႉသူင်ႇလႄႈ တႃႇၵၢၼ်တေႃႉသူင်ႇၵေႃႈ ဢမ်ႇမီးလွင်ႈႁူမ်ႇလူမ်ႈ။

လိူဝ်ၼၼ်ႉ ၸွမ်းသဵၼ်ႈတႃႈသၢႆတၢင်းၵေႃႈ မီးလွင်ႈၵူတ်ႇထတ်း ႁၢဝ်ႈႁႅင်းထႅင်ႈလၢႆတီႈလႄႈ သင်ပဵၼ် ၼႆၵႂႃႇထႅင်ႈ ၶၢဝ်းယၢဝ်းၸိုင် ၵူၼ်းမိူင်းတေၸၢင်ႈယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ် ၸိူဝ်းၼႆႉ တင်းၼမ်။