ဝၼ်းတီႈ 14/11/2024 ၼႆႉ ႁွင်ႈၵၢၼ် ၽွင်းလူင်ၾၢႆႇၵူၼ်းႁဵတ်းၵၢၼ် တႂ်ႈသိုၵ်းမၢၼ်ႈ သူင်ႇလိၵ်ႈထိုင်တီႈ ၸုမ်း Agency ႁႃၵၢၼ်ၼွၵ်ႈမိူင်းသေ ႁႄႉႁၢမ်ႈ ယႃႇႁႂ်ႈပၼ်ၶႂၢင်ႉလိၵ်ႈႁွင်ႉၵၢၼ် (Demand Letter) ဢၼ်လုၵ်ႉတီႈၵုၼ်သႃႊပႃႊ မိူင်းမလေးသျႃးသေ ႁွင်ႉမႃး တွၼ်ႈတႃႇ ၵၢၼ်ၽုၵ်ႇသွမ်ႈၼၼ်ႉ ဝႃႈၼႆ။
လွင်ႈၼႆႉ ပွင်ႇၶၢဝ်ႇပႃးတီႈ လုမ်းၽွင်းတၢင်မၢၼ်ႈ ဢၼ်မီးတီႈ ဝဵင်းၵႂႃႊလႃႊလမ်ႊပူႊ မိူင်းမလေးသျႃး။ ယွၼ်ႉသင်လႄႈ သူင်ႇလိၵ်ႈႁႄႉႁၢမ်ႈ ဢၼ်ဝႃႈၼၼ်ႉတႄႉ ဢမ်ႇလၢတ်ႈဝႆႉပႃး။
ၽူႈမီးပုၼ်ႈၽွၼ်း တီႈၸုမ်းႁပ်ႉႁႃၵၢၼ်ၼွၵ်ႈမိူင်း မိူင်းမၢၼ်ႈ (MOEAA) ၵေႃႉၼိုင်ႈ ထတ်းသၢင်လၢတ်ႈဝႃႈ တီႈၵုၼ်သႃႊပႃႊၼႆႉ ႁႅင်းၵၢၼ်မိူင်းမၢၼ်ႈမီးဢေႇ၊ သင်မီးပၼ်ႁႃ ၼႂ်းၵႄႈၵၢင်ၸဝ်ႈ ၵၢၼ်လႄႈ ႁႅင်းၵၢၼ်ၸိုင် ၵူဝ်ႁႅင်းၵၢၼ် မီးလွင်ႈတုမ်ႉတိူဝ်ႉလူႉသုမ်းလႄႈ ၸင်ႇလႆႈႁႄႉႁၢမ်ႈ ဝႃႈၼႆ။
ၵုၼ်သႃႊပႃႊၼႆႉ ပေႃးလုၵ်ႉတီႈ ဝဵင်းၵႂႃႊလႃႊလမ်ႊပူႊၵႂႃႇၸိုင် လႆႈၶီႇၶိူင်ႈမိၼ်ၵႂႃႇ ႁိုင်မွၵ်ႈ 2 ၸူဝ်ႈမူင်းပၢႆ။ ပဵၼ်ၵုၼ် ဢၼ်မီးဝႆႉႁင်းၵူၺ်း တီႈၼိုင်ႈ။
တႄႇဢဝ် ဝၼ်းတီႈ 01/06/2024 မႃးၼႆႉ လူင်ပွင်ၸိုင်ႈမိူင်းမလေးသျႃး လႆႈၵိုတ်းလိုဝ်ႈ လွင်ႈႁွင်ႉႁႅင်းၵၢၼ်ၼွၵ်ႈမိူင်း ပႃးၸဵမ်မိူင်းမၢၼ်ႈ။ ၵူၺ်းၵႃႈ တွၼ်ႈတႃႇၵုၼ်သႃႊပႃႊ ဢၼ်မီးဝႆႉ ပွတ်းဢွၵ်ႇ မိူင်းမလေးသျႃးၼၼ်ႉတႄႉ ပၼ်ၶႂၢင်ႉႁွင်ႉႁႅင်းၵၢၼ်ၼွၵ်ႈမိူင်းဝႆႉယူႇ ဝႃႈၼႆ။
ၼႂ်းမိူင်းမလေးသျႃးၼႆႉ ယွၼ်ႉမီးလွင်ႈတီႉၺွပ်း ပၼ်တၢမ်ႇ ႁႅင်းၵၢၼ်မိူင်းမၢၼ်ႈ ယူႇၵူႈဝၼ်းလႄႈ ယႃႇဢွၼ်ၵၼ်ၶဝ်ႈမိူင်းမလေးသျႃး လူၺ်ႈဢမ်ႇမႅၼ်ႈတၢင်းၵၢၼ်ၼႆ ၸုမ်း Myanmar Labor Affairs and Refugee Organization လၢတ်ႈဝႆႉတီႈသိုဝ်ႇၶၢဝ်ႇ RFA ၼႂ်းဝၼ်းတီႈ 18 ၼႆႉၼင်ႇၼႆ။
ဢၢင်ႈဢိင် – RFA
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ