ပေႃးၸမ်ၶၢဝ်းႁပ်ႉၸဵင်ၼႆ ပီႈၼွင်ႉတႆးထုင်ႉလႂ်ထုင်ႉၼၼ်ႉ ၶိုင်သၢင်ႈတႃႇၸတ်းပွႆးလၢမ်း ၸွမ်းၼင်ႇ ၾိင်ႈထုင်းႁိတ်ႈ ႁွႆးမီးမႃးတႃႇသေႇ။ ၵူၺ်းၵႃႈ တႄႇဢဝ် တၢင်းပဵၼ်ၶူဝ်ႊဝိတ်ႉလၢမ်းၶဝ်ႈမႃး ဝၢႆးၼၼ်ႉ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ႁဵတ်းႁႂ်ႈၵၢၼ်ႁႃၵိၼ်လဵင်ႉတွင်ႉယၢပ်ႇ၊ ငဝ်းလၢႆး ၵၢၼ်သိုၵ်း ၵၢၼ်မိူင်း ဢမ်ႇၼိမ်လႄႈ ၵၢၼ်ၵိၼ်လူႇလူႉတၢႆ ဢမ်ႇၸၢင်ႈၸတ်းၸွမ်းၶိင်ႇၸွမ်းၶၢဝ်း ၸွမ်းၾိင်ႈငႄႈၾိင်ႈထုင်း။  

မၢင်ပိုၼ်ႉတီႈတႄႉ ဢိင်ၼိူဝ် ငဝ်းလၢႆးသေ ၸတ်းႁဵတ်းၵႂႃႇလူၺ်ႈလၢႆးၽႂ်မၼ်း၊ မၢင်တီႈ ဢမ်ႇၸတ်း ႁဵတ်းပဵၼ်ပွႆးယႂ်ႇလၢမ်းလူင်သေတႃႉ ၶိုင်ၶပ်းၸတ်းပဵၼ်ပၢင်ၾိင်ႈငႄႈၾိင်ႈထုင်း ႁႂ်ႈပဵၼ်မၢႆတွင်းႁပ်ႉပီမႂ်ႇ။ မိူၼ်ၼင်ႇ တီႈဝၢၼ်ႈႁူဝ်ပၢင်ႇ ဝဵင်းၵႃလီႉ ၸိုင်ႈတႆးပွတ်းၸၢၼ်း ၼႆႉၵေႃႈ ဢိင်ၼိူဝ်ငဝ်းလၢႆးသေ တေၸတ်းပၢင်ၶႄႉၶႅင်ႇလဵၼ်ႈႁႅင်းၶၢဝ်းတၢင်း 3 ဝၼ်း တႃႇပဵၼ်တီႈမၢႆတွင်းႁပ်ႉပီမႂ်ႇတႆး 2119 ၼီႈ ဝႃႈၼႆ။

တႄႇဢဝ်ဝၼ်းတီႈ 28-30/11/2024 ၶၢဝ်းတၢင်း 3 ဝၼ်းၼႆႉ တႃႇပဵၼ်တီႈမၢႆတွင်းႁပ်ႉၸဵင် ပီမႂ်ႇၵေႃႈ ပိူင်ၼိုင်ႈ တႃႇ ၵူၼ်းၼုမ်ႇၼႂ်းပိုၼ်ႉတီႈ တေၵၢင်းယၢၼ်ယႃႈမဝ်းၵမ်ၼၼ်ႉၵေႃႈ ပိူင်ၼိုင်ႈ ၼႆသေ ၵူၼ်း ၼုမ်ႇ ၼႂ်းၸႄႈဝဵင်းၵႃလီႉ ၸိုင်ႈတႆးပွတ်းၸၢၼ်း တေႁူမ်ႈၵၼ်ၸတ်းပၢင်ၶႄႉၶႅင်ႇလဵၼ်ႈႁႅင်း တႃႇမၢႆ တွင်းႁပ်ႉပီမႂ်ႇတႆး 2119 ၼီႈ ဝႃႈၼႆ။

ပၢင်လဵၼ်ႈႁႅင်းၼႆႉ တေၸတ်းၼႂ်းဝၢၼ်ႈႁူဝ်ပၢင်ႇ ၸႄႈဝဵင်းၵႃလီႉ။ ၼႂ်းပၢင်ၶႄႉၶႅင်ႇ လဵၼ်ႈႁႅင်းၼႆႉ တေမီးလွင်ႈလဵၼ်ႈ ႁႅင်းလၢႆသႅၼ်း မိူၼ်ၼင်ႇ ၶေႉႁႅင်းၵၼ် တိုတ်ႉၸိူၵ်ႈ၊ လဵၼ်ႈတႃၸီး၊ လႅၼ်ႈၵႆ marathon ၊ လဵၼ်ႈမၢၵ်ႇၼင်ႇ မၢၵ်ႇသွင်းဝၢႆ ၸဵမ်ၸိူဝ်းၼႆႉ။ တႄႇဢဝ် မိူဝ်ႈၽူႈဢွၼ်ၸတ်းပၢင် ပိုၼ် ၽၢဝ်ႇၼၼ်ႉမႃးသေ မီးၵူၼ်းၼုမ်ႇၼႂ်းထုင်ႉၵုၼ်ႁဵင်၊ ၵႃလီႉ၊ ႁူဝ်ပၢင်ႇ၊ ဝၢၼ်ႈသၢၵ်ႇ၊ သၢႆးၶၢဝ်၊ ပၢင်လူင် လွႆတႆးလီ ၸိူဝ်းၼႆႉ မႃးပၼ်သဵၼ်ႈၸိုဝ်ႈ တႃႇၶဝ်ႈၶႄႉၶႅင်ႇ။ ၼႂ်းၼၼ်ႉ ၸိူဝ်းမႃးပၼ်သဵၼ်ႈမၢႆ တႃႇၶဝ်ႈ ၶႄႉၶႅင်ႇ ပိတ်ႉမၢၵ်ႇၼင်မီး 12 ၸုမ်း ၼႂ်းၼၼ်ႉ ပႃးၸုမ်းၼၢင်းယိင်း 2 ၸုမ်း။

ၽူႈႁူမ်ႈၸတ်း ပၢင်လဵၼ်ႈႁႅင်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ – “လၢႆတီႈလၢႆတၢင်းၵေႃႈ ပီၼႆႉ ဢမ်ႇထၢင်ႇႁၢင်ႈလႆႈ ၸတ်းၵၼ် ယွၼ်ႉငဝ်းလၢႆးလၢႆလွင်ႈ။ ၵူၺ်းၵႃႈ တၢင်းႁဝ်းၼႆႉသမ်ႉဝႃႈ ပေႃးဢမ်ႇႁဵတ်း လႃးလႃးၵေႃႈ ၵူဝ်ၾိင်ႈ ႁၢႆၼႆလႄႈ ၸင်ႇလႆႈၸႂ်ၵၼ်သေ တေၸတ်း။ ပိူင်လူင်မၼ်းတႄႉၵေႃႈ ပီမႂ်ႇၼႆႉ ဢမ်ႇၸႂ်ႈတႃႇမူၼ်ႈတႃႇၵျေႃႇၵူၺ်း တႃႇပၢႆးယူႇလီၵေႃႈ ပိူင်ၼိုင်ႈ၊ တႃႇႁႂ်ႈၵူၼ်းၼုမ်ႇႁဝ်းတေ ၵၢင်း ယၢၼ်ယႃႈမဝ်းၵမ်ၵေႃႈ ပိူင်ၼိုင်ႈ၊ ယဝ်ႉၵေႃႈ ႁႂ်ႈမေႃၽွမ်ႉႁႅင်းၵၼ် ပဵၼ်တုမ်ပဵၼ်ၵွၼ်ၼႆလႄႈ ၸင်ႇၸတ်းပၢင်လဵၼ်ႈႁႅင်းႁပ်ႉပီမႂ်ႇ”- ဝႃႈၼႆ။  

မိူဝ်ႈၼႂ်း ပီဢွၼ် 2022 ၼၼ်ႉတႄႉ ၵူၼ်းမႃးလႅၼ်ႈ မႃႊရတွၼ်ႊ မီးမွၵ်ႈ 200 ပၢႆၼႆႉ ပီၼႆႉတႄႉ ပႆႇႁူႉႁူဝ်ယွႆႈတႅတ်ႈတေႃး ၸိူဝ်းမႃးပၼ်သဵၼ်ႈၸိုဝ်ႈတႄႉ ဢမ်ႇယွမ်း 100 ၵေႃႉ၊ တေဢၢၼ်းလႅၼ် တႄႇ ဢဝ်တီႈဝၢၼ်ႈသၢႆးၶၢဝ်ထိုင် ဝၢၼ်ႈႁူဝ်ပၢင်ႇ တႄႇယၢမ်းၵၢင်ၼႂ်ၸဝ်ႉ 6 မူင်း ဝႃႈၼႆ။

ၽူႈႁူမ်ႈၸတ်း ပၢင်လဵၼ်ႈႁႅင်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ -“ဢၼ်တေလႅၼ်မႃႊရႊတွၼ်ႊၼႆႉ တေပဵၼ်ဝၼ်းတီႈ 30 ဢေႃႈ။ ဢၼ်လဵၼ်ႈမၢၵ်ႇၼင်တႄႉ တေတႄႇလဵၼ်ႈၵႂႃႇ မိူဝ်ႈၽုၵ်ႈ ယဝ်ႉၶႃႈ။ မၢၵ်ႇၼင်ႇ မၢၵ်ႇသွင်းဝၢႆ ၸိူဝ်း ၼႆႉ။ တႃႇတွၼ်ႈသူးတႄႉ တေပဵၼ်ၶမ်ႈႁပ်ႉၸဵင်ၼၼ်ႉ။ တီႈဝၢၼ်ႈႁူဝ် ပၢင်ႇႁဝ်းၼႆႉ မိူဝ်ႈၶူဝ်ႊဝိတ်ႉပႆႇၵဝ်း ဝၢၼ်ႈမိူင်းပႆႇယုင်ႈၼၼ်ႉတႄႉ ၸတ်းမႃးယူႇၵူႈပီပီ။ ၵူၺ်းၵႃႈ ဢမ်ႇၸတ်းယႂ်ႇၵႃႈႁိုဝ်ၼင်ႇၵဝ်ႇ။ ဢမ်ႇၵႂၢင်ႈၶႂၢင် ဢၼ်တေၸတ်းပဵင်းပီၼႆႉ”- ဝႃႈၼႆ။

ၽူႈလႂ်ၶႂ်ႈသႂ်ႇသဵၼ်ႈၸိုဝ်ႈ ၶဝ်ႈၶႅင်ႇၼႂ်းပၢင်လဵၼ်ႈႁႅင်း ၸိူဝ်းၼႆႉၵေႃႈ ၵပ်းသိုပ်ႇပၼ်သဵၼ်ႈၸိုဝ်ႈလႆႈ တီႈၵေႃပွင်ၵၢၼ် ပၢင်လဵၼ်ႈႁႅင်း မၢႆၾူၼ်း 09404158581 ၼႆႉလႆႈယူႇ ဝႃႈၼႆ။

တႃႇပဵၼ်တီႈမၢႆတွင်း ႁူမ်ၸူမ်းႁပ်ႉတွၼ်ႈ ပီမႂ်ႇတႆး 2119 ၼီႈၼႆသေ တႄႇဝၼ်းတီႈ 27-29/11/2024 ၼႆႉ ၵေႃလိၵ်ႈလၢႆး၊ ၸုမ်းၸဝ်ႈၸရေးလႄႈ ၵူၼ်းၼုမ်ႇ ၸႄႈဝဵင်းမိူင်းၼၢႆး ၸိုင်ႈတႆး ပွတ်းၸၢၼ်း ႁူမ်ႈၵၼ် ၸတ်းပၢင်ၾိုၵ်းၽွၼ်ႉလၢႆးတႅမ်ႈလင်ႇၵႃႇ၊ လိၵ်ႈလူင် ၶၢဝ်းတၢင်း 3 ဝၼ်း။ ၼႆႉၵေႃႈ ယိူင်းဢၢၼ်း တႃႇၾိင်ႈႁိတ်ႈႁွႆးတႆး ဢမ်ႇၶၢတ်ႇၼႆသေ ၸင်ႇဢွၼ်ၵၼ် ၸတ်းႁဵတ်းၶပ်ႉၶပ်ႉတၢမ်းတၢမ်း ၼႆယဝ်ႉ။

ၼႂ်းပီ 2024 ၼႆႉ ယွၼ်ႉငဝ်းလၢႆးဝၢၼ်ႈမိူင်းဢမ်ႇၼိမ် ၵူၼ်းမိူင်းၵုမ်ႇလႆႈပၢႆႈၽေးသိုၵ်း ၼမ်ႁႅင်းလႄႈ ပိုၼ်ႉတီႈၼႂ်းမိူင်းတႆး ၵမ်ႈၼမ် ဢမ်ႇပဵၼ်ၸတ်းပၢင်ႁပ်ႉၸဵင် ပီမႂ်ႇတႆး 2119 ၼီႈ။ မၢင်ဢွင်ႈတီႈၵေႃႈ ၸွမ်းၼင်ႇပွင်ပဵၼ်လႆႈၼၼ်ႉ ၸတ်းတီႈၵႅပ်ႈမၼ်းသေ ပႅင်းမႅပ်ႇၾိင်ႈထုင်းႁိတ်ႈႁွႆး။

တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇတႄႉ တေၸတ်းပၢင်ပွႆးႁပ်ႉၸဵင် ပီမႂ်ႇတႆး 2119 ၼီႈၶိုၵ်ႉယႂ်ႇသေ ဢဵၼ်းဢၢၼ်းလႆႈပႃးငိုၼ်းၵွင်ၵၢင် တႃႇၵမ်ႉၸွႆႈၵူၼ်းပၢႆႈၽေးသိုၵ်း ၼႂ်းမိူင်းတႆးလၢႆတီႈ။ ပၢင်ပွႆး တႄႇၸတ်းႁဵတ်း ၼႂ်းဝၼ်းတီႈ 26-30/11/2024 ၼႆယဝ်ႉ။

ပၢင်ပွႆးပီမႂ်ႇတႆးၼႆႉ ပူႇမွၼ်ႇၼၢႆးယႃႈတႆး ဢွၼ်ၸတ်းမႃး ပၢၼ်သိုပ်ႇပၢၼ်သေ ဝၢင်းၾိင်ႈမၼ်းဝႆႉပၼ် ပဵၼ်ၶၵ်ႉပဵၼ်တွၼ်ႈ မိူၼ်ၼင်ႇ ၵေႃႇၸဵင်၊ ပႂ်ႉၸဵင်၊ လဵၼ်ႈၸဵင်၊ ပၢႆႈၸဵင်၊ ၵိၼ်ၸဵင်။ လိူဝ်ၼၼ်ႉ ၵၢပ်ႈယၢမ်းလဵဝ် သႂ်ႇပႃးလွင်ႈလဝ်ႇမူၼ်ႈ မိူၼ်ၼင်ႇ လွင်ႈၵႃႈလွင်ႈဝႅၼ်လႄႈ ပၢင်ႁွင်ႉၵႂၢမ်း ၸဵမ်ၸိူဝ်းၼႆႉ။