မိူဝ်ႈၼႆႉ ဝၼ်းတီႈ 27/11/2024 ယၢမ်းၵၢင်ၼႂ် သိုၵ်းမၢၼ်ႈ ယိုတ်းမိူင်း ၵူတ်ႇထတ်းႁႄႉႁၢမ်ႈ ၵူၼ်းမိူင်း ၸိူဝ်းတေႃႉၶူဝ်းၵုၼ်ႇၵႂႃႇမႃး ၼႂ်းၵႄႈဝဵင်းမူႇၸေႊ – ဝဵင်းၼမ်ႉၶမ်း ႁၢဝ်ႈႁႅင်း မၢင်ၸိူဝ်း ၺႃးႁႄႉႁၢမ်ႈဢမ်ႇ ပၼ်တေႃႉတၢင်ႇၶၢမ်ႈၶူဝ်ပၢင်ႇၶမ်း ၵမ်ႈၽွင်ႈ ၺႃးယိုတ်းၶူဝ်းၵုၼ်ႇ ၽၵ်းၶဵဝ် ၸိူဝ်းၼႆႉဝႆႉ ၵေႃႈမီး။

ၵူၼ်းမူႇၸေႊ ၽူႈယိင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “တီႈၶူဝ်ပၢင်ႇၶမ်းၼၼ်ႉ ပေႃးလုၵ်ႉတၢင်းမူႇၸေႊ တေ ၵႂႃႇၼမ်ႉၶမ်း တၢင်းၵိၼ်ယႅမ်ႉ သူမ်ႈထၢင်ႈၽၵ်းသူမ်ႈ ၸိူဝ်းၼႆႉ ၵူၼ်းမိူင်း တေသိုဝ်ႉမႃးတီႈဝၢၼ်ႈ ၸိူဝ်းပွတ်းပၢင်ႇၶမ်း၊ တိုင်းလူင်တူၼ်ႈႁူင်းၶဵဝ် ၸိူဝ်းၼႆႉ ၶဝ်ယင်းဢမ်ႇပၼ်ၶၢမ်ႈၶူဝ်သေဢိတ်း။ ပေႃးမၼ်းပဵၼ်ၸွၵ်းပဵၼ်ၸႅၵ်းဝႆႉၸိူင်ႉၼႆ ၶဝ်ဢမ်ႇပၼ်ၶၢမ်ႈၶႃႈ”- ဝႃႈၼႆ။

ဢၼ်ၵူၼ်းမိူင်း ၺႃးၵူတ်ႇထတ်း ၶူဝ်းၵုၼ်ႇႁၢဝ်ႈႁႅင်းၼႆႉ လိူဝ်သေ ၼႂ်းၵႄႈဝဵင်းၼမ်ႉၶမ်း – ဝဵင်းမူႇၸေႊယဝ်ႉ ၸွမ်းလႅၼ်လိၼ်တႆး – ၶႄႇ တီႈၽၵ်းတူၸၢင်ႉၽိူၵ်ႇ ၸိူဝ်းၼႆႉၵေႃႈ ၺႃးၵူတ်ႇထတ်း ဢဝ်ဝႆႉၶူဝ်းၶွင် ၸိူဝ်းၼႆႉမိူၼ်ၵၼ် ဝႃႈ ၼႆ။

“မိူဝ်ႈၼႆႉ ဢၼ်လၢၵ်ႇလၢႆးမၼ်း ပဵၼ်ထႅင်ႈတီႈၽၵ်းတူၸၢင်ႉၽိူၵ်ႇ လုၵ်ႉမိူင်းၶႄႇ ၶဝ်ႈမႃးမိူင်းမၢၼ်ႈ ၸိူဝ်း ၵူၼ်းတၢင်ႇ ၵုၼ်ႇမႃး ၸွမ်းရူတ်ႉၶိူင်ႈၼၼ်ႉ ၾၢႆႇမၢၼ်ႈၶဝ် ၸႂ်ႉၶျႃႉလူင်းရူတ်ႉသေ ၺွပ်းဢဝ်ပႅတ်ႈ။ ၶႄႇပၼ်ၶႂၢင်ႉဢွၵ်ႇမႃးယူႇ။ ၵူၺ်းၵႃႈ တၢင်းၾၢႆႇမၢၼ်ႈသမ်ႉ ၺွပ်းဢဝ် ၸိူင်ႉၼၼ်ဢေႃႈ”- ၵူၼ်းမူႇၸေႊ သိုပ်ႇလၢတ်ႈၼႄၼင်ႇၼႆ။

ဢၼ်သိုၵ်းမၢၼ်ႈတင်ႈၵဵတ်ႉလၢၼ်ႇ ၵူတ်ႇထတ်းႁႄႉႁၢမ်ႈ တေႃႉတၢင်ႇၶူဝ်းၵုၼ်ႇ ၸွမ်းလႅၼ်လိၼ် တီႈဝဵင်းမူႇၸေႊ၊ ၼမ်ႉၶမ်း၊ ပၢင်ႇၶမ်း ၸိူဝ်းၼႆႉ တင်ႈတႄႇမႃး မိူဝ်ႈဝၼ်းတီႈ 20/11/2024 ၼၼ်ႉ။ ယဝ်ႉၵေႃႈ မိူၼ်ၼင်ႇ ၸွမ်းသဵၼ်ႈတၢင်းၼႂ်းမိူင်းတႆးပွတ်းႁွင်ႇ လၢႆသဵၼ်ႈၵေႃႈ ၺႃးၵူတ်ႇထတ်းႁႄႉႁၢမ်ႈ ၵၢၼ်တၢင်ႇၶူဝ်းၵုၼ်ႇ မိူၼ်ၵၼ်။

ၵဵဝ်ႇလူၺ်ႈလွင်ႈၼႆႉ ယူႇတီႈ ၽူႈလဵပ်ႈႁဵၼ်းၵၢၼ်မိူင်း ၵေႃႉၼိုင်ႈတႄႉ လၢတ်ႈဝႃႈ ဢၼ်သိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်း၊ ႁႄႉႁၢမ်ႈၵၢၼ်တေႃႉတၢင်ႇ ၶူဝ်းၵုၼ်ႇၼႆႉ ႁဵတ်းႁႂ်ႈၵၢၼ်ၽွင်းငမ်း ဢၼ်ၸုမ်းဢူၺ်း လီ 3 ၸုမ်းၶဝ် တေဢမ်ႇသိုပ်ႇယၢင်ႈၵႂႃႇ ၶၢဝ်းမိူဝ်းၼႃႈလႆႈ။ ၵူၺ်းၵႃႈ ဢၼ်ထူပ်းတၢင်းယၢပ်ႇၽိုတ်ႇသမ်ႉ ပဵၼ်ၵူၼ်းမိူင်း၊ သင်တေပဵၼ်ၼႆၵႂႃႇထႅင်ႈၶၢဝ်းယၢဝ်းတႄႉ ၵူၼ်းမိူင်း တေၸၢင်ႈယၢပ်ႇၽိုတ်ႇ လွင်ႈၶဝ်ႈ ၼမ်ႉတၢင်းၵိၼ်ဢမ်ႇႁၢၼ်ႉ ဝႃႈၼႆ။