တႄႇဝၼ်းတီႈ 22/11/2024 မႃးတေႃႇထိုင် ဝၼ်းမိူဝ်ႈၼႆႉ ရူတ်ႉၵႃးလူင် 10  လေႃႉ – 12 လေႃႉ ဢၼ်ပဝ်ႇလႄႈ ဢၼ်တၢင်ႇၶူဝ်းၵုၼ်ႇ ၸိူဝ်းလုၵ်ႉတၢင်းတူၼ်ႈတီးမႃးလႄႈ ဢၼ်တေၶိုၼ်ႈၵႂႃႇ တၢင်းတူၼ်ႈတီး ၸိူဝ်းၼႆႉ ပလိၵ်ႈမၢၼ်ႈသိုၵ်းမၢၼ်ႈ ႁၢမ်ႈဝႆႉဢမ်ႇပၼ် ၵႂႃႇမႃးလွတ်ႈလွတ်ႈလႅဝ်းလႅဝ်း ၵိုတ်းၶမ်ဝႆႉတီႈတူဝ်းလ်ၵဵတ်ႉ ဝဵင်းလွႆလႅမ်။

ပလိၵ်ႈလႄႈ သိုၵ်းမၢၼ်ႈ တီႈၵဵတ်ႉလၢၼ်ႇၼၼ်ႉလၢတ်ႈဝႃႈ ယွၼ်ႉပိူဝ်ႈ ရူတ်ႉၵႃးလူင်ပလၢတ်ႈ ၶႂၢင်တၢင်းလႄႈ ဢမ်ႇ ၸၢင်ႈပၼ်ၵႃးလူင် ၶိုၼ်ႈလူင်း မိူဝ်ႈမိူဝ်ႈၵၼ်၊ ၸင်ႇလႆႈၸတ်းပၼ်ႁႂ်ႈၶိုၼ်ႈလူင်း ၸွမ်းၶၢဝ်း ၸွမ်းယၢမ်း၊ ၸင်ႇဝႃႈ ရူတ်ႉၵႃးတိတ်းၶမ်ဝႆႉတၢင်းၶိုၼ်ႈလႄႈ တၢင်းလူင်း ၼိုင်ႈဝၼ်းမွၵ်ႈ 200 လမ်း ဝႃႈၼႆ။ 

ၸဝ်ႈၵႃးလူင် ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ယၢမ်းလဵဝ် တီႈတူဝ်းလ်ၵဵတ်ႉ ဢၼ်လုၵ်ႉလွႆလႅမ် တေ ဢွၵ်ႇၵႂႃႇမိူင်းပွၼ်ၼၼ်ႉ ပလိၵ်ႈမၢၼ်ႈ ႁၢမ်ႈတၢပ်ႈၵႃးလူင် တၢင်ႇၵုၼ်ႇ ၸိူဝ်းတေၶိုၼ်ႈ လူင်းၵႂႃႇမႃး၊ ၼိုင်ႈဝၼ်း ၼႆႉ ပၼ်ၶိုၼ်ႈလူင်း ၼိုင်ႈပွၵ်ႈၵူၺ်း။ ယွၼ်ႉၼၼ်လႄႈ ရူတ်ႉၵႃးလူင် ၵိုတ်းၶမ် ဝႆႉၸွမ်း ၶၢင်ႈတၢင်းၼပ်ႉႁူဝ်ပၢၵ်ႇလမ်း။ ပေႃးထၢမ်တူၺ်း ယွၼ်ႉသင်ၼႆ ပလိၵ်ႈၶဝ်ဢမ်ႇမီးၶေႃႈတွပ်ႇ ပၼ်လႆႈ တႅတ်ႈတေႃး။ ၶဝ်ဝႃႈ ရူတ်ႉၵႃးလူမ်ႉၶႂၢင်တၢင်းလႄႈ ရူတ်ႉယႂ်ႇဢမ်ႇၸၢင်ႈၶိုၼ်ႈလူင်းမိူဝ်ႈၵၼ် ဝႃႈၼႆသေတႃႉ ၵႃးဢွၼ်ႇတႄႉ ၶဝ်ပၼ်ၵႂႃႇမႃးယူႇ။ ၸဝ်ႈၵႃးဢွၼ်ႇၶဝ်ၵေႃႈဝႃႈ – ဢမ်ႇမီးရူတ်ႉလူမ်ႉၶႂၢင်တၢင်း သေတီႈ သမ်ႉဝႃႈၼႆ”- ။

ၵႃးဢၼ်ၶမ်ဝႆႉယူႇ ၸိူဝ်းၼၼ်ႉ ၵမ်ႈၼမ် တေပဵၼ်ၵႃးတၢင်ႇမၢၵ်ႇမႆႉမၢၵ်ႇတွၵ်ႇ ဢၼ်ဢွၵ်ႇမိူင်းတႆး မိူင်းမၢၼ်ႈလႄႈ မၢၵ်ႇၶဝ်ႈတဝ်ႈၼမ်ႉ ၶဝ်ႈၵၢပ်ႇတႅင် မၢၵ်ႇပၵ်ႉ ဢၼ်တေဢဝ်ၵႂႃႇၶၢႆ တၢင်းမိူင်းလႃးလႄႈ လၢၼ်ႇလႅၼ်လိၼ်မိူင်းၶႄႇ။

မၢင်ၸိူဝ်း ပဵၼ်ရူတ်ႉၵႃးပဝ်ႇ ဢၼ်တေၵႂႃႇတၢင်ႇထၢၼ်ႇႁိၼ် ၼႂ်းမိူင်းတႆးပွတ်းၸၢၼ်း ပွတ်းႁွင်ႇ။ မၢင်ၸိူဝ်းသမ်ႉ ပဵၼ်ဢၼ်တၢင်ႇထၢၼ်ႇႁိၼ်မိူင်းတႆးၶိုၼ်ႈမႃး ဢၢၼ်းတေၵႂႃႇသူင်ႇတၢင်းမိူင်းမၢၼ်ႈ တူင်ႈပဵင်း။ မၢင်ၸိူဝ်း ပဵၼ်ရူတ်ႉၵႃးတၢင်ႇၶူဝ်းၵုၼ်ႇ ဢၼ်လုၵ်ႉတၢင်းမိူင်းလႃး – ၵဵင်းတုင် – တႃႈၶီႈလဵၵ်းမႃး ဢၢၼ်းတေၵႂႃႇတၢင်းမိူင်းမၢၼ်ႈ ၸိူဝ်းၼၼ်ႉ ဝႃႈၼႆ။

ၸဝ်ႈၵႃးလူင် လၢတ်ႈၽူႈတွႆႇႁွၵ်ႈဝႃႈ -“ဢၼ်ဢဝ်ၶူဝ်းၵုၼ်ႇႁႅင်ႈ ၶူဝ်းၸႂ်ႉၶူဝ်းသွႆ ၶူဝ်းၶွင်ၵၢၼ်ၵေႃႇသၢင်ႈ တေဢဝ်မႃးမိူင်းတႆး – မိူင်းမၢၼ်ႈၼႆႉတႄႉ ပဵၼ်ဢၼ်ဢမ်ႇမေႃၼဝ်ႈသေတႃႉ၊ မၢၵ်ႇၶဝ်ႈတဝ်ႈၼမ်ႉ ဢၼ်ဢွၵ်ႇၼႂ်းသူၼ်ၼႂ်းႁႆႈ မိူင်းတႆး ဢၢၼ်းတေတေႃႉၵႂႃႇတၢင်းမိူင်းလႃး – မိူင်းၶႄႇ ၸိူဝ်းၼႆႉဢေႃႈ ၵိၼ်းၸႂ်ၼႃႇ၊ ဢဝ်ၼဝ်ႈပႅတ်ႈၸွမ်းတၢင်းသေ ၼမ်ႉပေႃးယွႆႈယူတ်ႉယူတ်ႉဢေႃႈ”- ဝႃႈၼႆ။

ယွၼ်ႉပလိၵ်ႈသိုၵ်းမၢၼ်ႈ ႁၢမ်ႈဢမ်ႇပၼ်ၵႂႃႇမႃး ၸိူင်ႉၼႆလႄႈ ၵႃးလူင်လႆႈၶမ် တီႈတူဝ်းလ်ၵဵတ်ႉ တင်းသွင်ႇၾၢႆႇ ၸဝ်ႈၵႃး မၢင်ၸိူဝ်း လႆႈၼွၼ်းၶိုၼ်းၶၢင်ႈတၢင်း၊ မၢင်ၸိူဝ်းၵေႃႈ လႆႈၼွၼ်းမွၵ်ႈ 2 ၶိုၼ်းၸိူဝ်းၼႆႉယူႇ။ ၵူဝ်ၶူဝ်းၵုၼ်ႇလိပ်း ၼဝ်ႈ လူႉသုမ်းၼမ်လႄႈ လႆႈမႆႈၸႂ်ဝႆႉၼႆ ၸဝ်ႈၵႃး လၢတ်ႈၽူႈတွႆႇႁွၵ်ႈၼင်ႇၼႆ။   

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)