မိူဝ်ႈဝၼ်းတီႈ 20/05/2025 ယၢမ်းၵၢင်ၼႂ်မွၵ်ႈ 9 မူင်းၶိုင်ႈၼၼ်ႉ ၸုမ်းပလိၵ်ႈၾၢႆႇၽဵဝ်ႈမူၺ်ႉ ယႃႈမဝ်းၵမ် ၵူတ်ႇထတ်းၵႃးၼိူဝ်သဵၼ်ႈတၢင်း လွႆလႅမ် – တူၼ်ႈတီးသေ တီႉၺွပ်းလႆႈ ၵႃးဢၼ်တေႃႉယႃႈမဝ်းၵမ် တီႈပွၵ်ႉ 2 ဝဵင်းလွႆလႅမ် ၸိုင်ႈတႆးပွတ်းၸၢၼ်း။
ၸဝ်ႈၼႃႈတီႈ ပလိၵ်ႈၶဝ် တီႉၺွပ်းလႆႈ ၸၢႆးၵျေႃႇလုၼ်ႇဢူး ဢႃယု 27 ပီ၊ ၼၢင်းယုမ်ႉၶမ်း ဢႃယု 19 ပီ သွင်ၵေႃႉၽူဝ်မေးလႄႈ ၾူၼ်း 2 လုၵ်ႈ ဢၼ်ႁေႃႈၵႃး TOYOTA CROWN ၼၼ်ႉမႃးတၢင်း ဝဵင်းလွႆလႅမ် ၵူၺ်းဢမ်ႇၵႃး တီႉၺွပ်းပႃးလႆႈ မွင်ႇသွၼ်းထႅၵ်ႉ ဢႃယု 26 ပီ ၵေႃႉဢၼ်ယူႇဝဵင်းတူၼ်ႈတီးသေ တေပႂ်ႉ ႁပ်ႉဢဝ်ယႃႈမဝ်းၵမ်ၼၼ်ႉထႅင်ႈ ၼႆယဝ်ႉ။
ယႃႈမဝ်းၵမ် ဢၼ်ၾၢႆႇပလိၵ်ႈၶဝ် တီႉၺွပ်းလႆႈၼၼ်ႉ ပဵၼ် Happy Water တႃႇ 1.1 ၵီႊလူဝ်ႊ ၵိုင်ႇငိုၼ်း 1,210 သႅၼ်ပျႃး၊ ၵႅတ်ႊတမိၼ်ႊ 10 ၵရမ်ႊ ၵိုင်ႇငိုၼ်း 1 သႅၼ်ပျႃးသေ ယၢမ်းလဵဝ် ပလိၵ်ႈ ၾၢႆႇၽဵဝ်ႈမူၺ်ႉ ယႃႈမဝ်းၵမ်ၶဝ် ဢဝ်ၶူဝ်းၵွင်ၵၢင်လႄႈ ၵူၼ်းၸိူဝ်းထုၵ်ႇတီႉၺွပ်းၼၼ်ႉ ဝႆႉတီႈႁူင်းပလိၵ်ႈ ဝဵင်းလွႆလႅမ်ယဝ်ႉ ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 17 လိူၼ်မေႊၼၼ်ႉၵေႃႈ ၸုမ်းပလိၵ်ႈၶဝ် တီႉၺွပ်းလႆႈ ၵူၼ်းၶၢႆယႃႈမဝ်းၵမ် ဢႃယု 42 ပီ တီႈဝဵင်းတႃႈၶီႈလဵၵ်း။ တီႉၺွပ်းလႆႈပႃးယႃႈမႃႉ တႃႇ 18,000 မဵတ်ႉ ၵိုင်ႇငိုၼ်းမၢၼ်ႈတႃႇ 126 သႅၼ်ပျႃး ဢိၵ်ႇတင်း ၾူၼ်း 1 လုၵ်ႈသေ လႆႈပိုတ်ႇလိူင်ႈ ဢဝ်တၢင်းၽိတ်းဝႆႉတီႈႁူင်းပလိၵ်ႈ ႁွင်ႈလိုၵ်ႉ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇဝႆႉ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ