ပူၼ်ႉမႃး ဝၼ်းတီႈ 25/11/2024 ၼႆႉ ႁူဝ်ၼႃႈ သိုၵ်းမၢၼ်ႈ ယိုတ်းမိူင်း ၸွမ်ၸိၵ်းသိုၵ်း မိၼ်းဢွင်ႇလၢႆႇ လၢတ်ႈဝႃႈ ပဵၼ် ၶၢဝ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၵေႃႇသၢင်ႈလွင်ႈငမ်းယဵၼ်ယဝ်ႉ ဝႃႈၼႆ။

ယၢမ်းလဵဝ်ၼႆႉ ၼႂ်းၵႄႈပီႈၼွင်ႉၸၢဝ်းၶိူဝ်းၼင်ႇၵၼ် ဢမ်ႇထုၵ်ႇလီမီး လွင်ႈႁၼ်ၽိတ်းၼိူဝ်ၵၼ်သေ ဢဝ်လွင်ႈယုမ်ႇယမ် ႁူပ်ႉထူပ်းဢုပ်ႇဢူဝ်းၵၼ်သေ ၵႄႈလိတ်ႈပၼ်ႁႃ ပတိၵ်ႈၶၢတ်ႈၵႂႃႇၼႆ မိၼ်းဢွင်ႇလၢႆႇ လၢတ်ႈၵႂႃႇၼင်ႇၼႆ။

ပၼ်ႁႃၵၢၼ်မိူင်းၼႆႉ သင်ဢမ်ႇဢဝ်ၵၢၼ်မိူင်းၵႄႈလိတ်ႈၸိုင် လွတ်ႈလႅဝ်းယူႇသေတႃႉ တေဢမ်ႇၵတ်းယဵၼ်လႆႈၼႆ ဢိင်ၼိူဝ် လွင်ႈဢဝ်ၶိူင်ႈမိၼ် ပွႆႇမၢၵ်ႇယူႇၶိူဝ်းယႂ်းၼႆႉ ပၼ်ၾၢင်ႉလၢတ်ႈပႃးၵႂႃႇၼင်ႇၼႆ။

ႁၼ်ထိုင်ၵူၼ်းမိူင်း ၸိူဝ်းလႆႈၶၢမ်ႇတၢမ်ႇသိုၵ်းသိူဝ် ယွၼ်ႉပၢင်တိုၵ်း ယွၼ်ႉသိုၵ်းမၢၼ်ႈ ပွႆႇမၢၵ်ႇလႂ်၊ ၼပ်ႉယမ်ၼိူဝ် လူင်ပွင်ၸိုင်ႈၶႄႇ ဢၼ်ၶတ်းၸႂ် ၶဝ်ႈၵႄႈၵၢင်သေ ဢုပ်ႇဢူဝ်း တႃႇလႅၼ်လိၼ် တေၼိမ်တဵင်ႈလႄႈ တႃႇၵိုတ်းတိုၵ်းၼႆႉသေ တူဝ်ႈတၼ်း တႃႇတေႁူပ်ႉထူပ်းလွင်ႈငမ်းယဵၼ် ယူႇၼႆ ၸုမ်းသိုၵ်း တဢၢင်း TNLA ၵေႃႈ တုမ်ႉတွပ်ႇ ပိုၼ်ၽၢဝ်ႇဢွၵ်ႇ ၶိုၼ်း ၼႂ်းဝၼ်းတီႈ 25 ၼႆႉၼင်ႇၼႆ။

ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉထႅင်ႈဝႃႈ တေသိုပ်ႇၶတ်းၸႂ် ၼင်ႇႁိုဝ် ၵူၼ်းၸၢဝ်းတဢၢင်း တေပူၼ်ႉလွတ်ႈလႆႈ တႂ်ႈ ၶီႇၼဵၵ်းတဵၵ်းတဵင်၊ တႃႇတေလႆႈ ၸႄႈမိူင်းတဢၢင်းလႂ်၊ တေသိုပ်ႇႁူမ်ႈမိုဝ်းၵႂႃႇၸွမ်း ၵူၼ်းမိူင်း ၸၢဝ်းၶိူဝ်းႁူမ်ႈတုမ် ဢၼ်တေၵမ်ႉယၼ်ပၼ်လႆႈ သုၼ်ႇၽွင်းငမ်းႁင်းၶေႃ ၸဵမ်ၸိူဝ်းၼႆႉ ဝႃႈၼႆ။

ၸုမ်းသိုၵ်းတဢၢင်း TNLA ဢၼ်ၶဝ်ႈပႃးၼႂ်း ၸုမ်းဢူၺ်းလီပွတ်းႁွင်ႇ 3 ၸုမ်းသေ ယိုဝ်းတိုၵ်းသိုၵ်းမၢၼ်ႈ ၸွမ်းၼင်ႇ ၽႅၼ်ယၼ်ႇသိုၵ်း 1027 ၼၼ်ႉ ၶၢဝ်းတၢင်းပီပၢႆ ယိုတ်းၵုမ်းလႆႈဝႆႉ ဝဵင်းၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉၶမ်း၊ ၵူတ်ႉၶၢႆ၊ ၼမ်ႉတူႈ၊ မိူင်းငေႃႉ၊ မိူင်းလူင်၊ သီႇပေႃႉ၊ ၵျွၵ်ႉမႄး၊ ၼွင်ၶဵဝ်၊ မိူင်းၵုတ်ႈလႄႈ မိူင်းမိတ်ႈ ၸိူဝ်းၼႆႉ။

ၶၢဝ်းတၢင်းသိုၵ်းမၢၼ်ႈ ယိုတ်းမိူင်း ၸမ် 4 ပီၼႆႉ ၼႂ်းမိူင်းမၢၼ်ႈ ပတ်းပိုၼ်ႉ ၸုမ်းလုၵ်ႉၽိုၼ်ႉ ယိုတ်းၵုမ်းလႆႈဝႆႉ ၸမ် 90 ဝဵင်း ၊ လိူဝ်ၼၼ်ႉ လၢႆလၢႆတီႈၵေႃႈ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ ႁၢဝ်ႈႁႅင်း၊ ၽွင်းၼင်ႇၼႆ သိုၵ်းမၢၼ်ႈ လၢတ်ႈမႃးထႅင်ႈ တႃႇဢုပ်ႇဢူဝ်းလွင်းငမ်းယဵၼ်။