သိုၵ်းမၼ်ႈ ယိုတ်းမိူင်း လိုပ်ႈလမ်းတီႉၺွပ်း ၵူၼ်းမိူင်း ၽွင်းဢွၵ်ႇၵၢင်ၶမ်ႈၵၢင်ၶိုၼ်း တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။
တႄႇလိူၼ်ဢွၵ်ႊထူဝ်ႊပိူဝ်ႊမႃး သိုၵ်းမၢၼ်ႈ တီႉၺွပ်း ၵူၼ်းမိူင်း ယၢမ်းၵၢင်ၶမ်ႈၵၢင်ၶိုၼ်း တေႃႇထိုင်ဝၼ်း မိူဝ်ႈၼႆႉ ၵူၼ်းမိူင်းထုၵ်ႇတီႉၺွပ်းၵႂႃႇမီး 140 ပၢႆယဝ်ႉၼႆ Taunggyi Support Revolution တႅမ်ႈတၢင်ႇဝႆႉ ၼင်ႇၼႆ။
ၼၢင်းယိင်းၼုမ်ႇ ဢႃယု 22 ပီ ၵူၼ်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ -“ၸႂ်ႈဢေႃႈ လႆႈငိၼ်းဝႃႈ ၵူၼ်းပႃး ၵႂႃႇမီးတင်းၼမ်၊ မိူဝ်ႈဝႃးၵေႃႈ လုင်းၶႃႈၵပ်းသိုပ်ႇမႃးပၼ်ၾၢင်ႉ၊ တၢင်းပွၵ်ႉၼမ်ႉၵတ်း (ရေအေးကွင်း) သိုၵ်းမၢၼ်ႈ တီႉၺွပ်း ၵူၼ်းဢွၵ်ႇ ၵၢင်ၶမ်ႈၵၢင်ၶိုၼ်း ၼႆၶႃႈဢေႃႈ။ ၺွပ်းတႃႇႁၢပ်ႇၵၢၼ်သိုၵ်းႁႃႉ ဢမ်ႇႁူႉ။ တီႈတူၼ်ႈတီးၼႆႉ မီးၵူၼ်းမီးငိုၼ်းတင်းၼမ်လႄႈ ၺွပ်းမၢပ်ႇၵိၼ် ငိုၼ်းၵူၼ်းမိူင်းႁႃႉ ဢမ်ႇႁူႉ ႁဵတ်းသင်လႄႈ တီႉၺွပ်းၵေႃႈ ဢမ်ႇႁူႉလီလီ ၶဝ်ၶႂ်ႈႁဵတ်း ၸိူင်ႉႁိုဝ်ၵေႃႈ ၶဝ်ႁဵတ်းၵႂႃႇ”- ဝႃႈၼႆ။
ၵူၼ်းဢၼ်ၺႃးတီႉၺွပ်းၵႂႃႇၼၼ်ႉ ၵမ်ႈၼမ် တေပဵၼ်ၵူၼ်းတၢင်းပွၵ်ႉ ၸဝ်ႈၸၢမ်ႇထုၼ်း 10 ၵေႃႉ၊ ၺွင်ႇၽိဝ်ႇသၶၼ်း 12 ၵေႃႉ ၊ ရတၼႃႇသီႇရိ 15 ၵေႃႉ၊ ၶျၢၼ်းမျႃႉတႃႇသီႇ 10 ၵေႃႉ၊ ၸိင်ႇပၢၼ်း 16 ၵေႃႉ ၊ သူၺ်ႇ တွင်ႇ 20 ၵေႃႉ ၊ ၵၢၼ်ႇတႃႇ 14 ၵေႃႉ ၊ ၵျွင်းၵျီးၸူႉ 23 ၵေႃႉ ၊ မိင်ႇၵလႃႇဢူး 10 ၵေႃႉ ၊ ၽြႃးၶၢဝ် 16 ၵေႃႉ ဝႃႈ ၼႆ။
ၼႂ်းၼၼ်ႉ ပႃးလုၵ်ႈၸၢႆး ၽူႈမီးၸၼ်ႉယႂ်ႇ ၼႂ်းၶႃႈႁၢပ်ႇၵၢၼ်ၶုၼ် Non CDM ၊ လုၵ်ႈၸၢႆး ၽူႈမၢၵ်ႈမီး၊ လိူဝ်ၼၼ်ႉ ပဵၼ် ၵူၼ်းမိူင်း ႁႃၸဝ်ႉၵိၼ်ၶမ်ႈ ၵမ်ႈၼမ် ဝႃႈၼႆ။
တီႈဝဵင်းတူၼ်ႈတီႈၼႆႉ ၸဵမ်မိူဝ်ႈပွႆးပွႆႇႁူင်းၾႆးမိၼ်ၼၼ်ႉ မီးၶၢဝ်ႇၽႄႈမႃးၼႂ်းၵႄႈၵူၼ်းမိူင်း၊ ပၼ်ၾၢင်ႉၵၼ် ယႃႇဢွၵ်ႇ ၼွၵ်ႈႁိူၼ်း ယၢမ်းၵၢင်ၶမ်ႈၵၢင်ၶိုၼ်း၊ ၵူဝ်ၺႃးမၢၵ်ႇ၊ ၵူဝ်ၺႃးတီႉၺွပ်းၵႂႃႇၼႆလႄႈ ၵူၼ်းၼုမ်ႇ ဢၼ်ႁဵတ်းၵၢၼ် ႁႃၵိၼ်လဵင်ႉတွင်ႉ ၶၢႆႁၢၼ်ႉတၢင်းၵိၼ် ၵၢင်ၶမ်ႈ ၸိူဝ်းၼၼ်ႉၵေႃႈ လႆႈဢိုတ်းႁၢၼ်ႉဝႆႉ ပဵၼ်ဢၼ်ယၢပ်ႇၸႂ် တႃႇႁႃၵိၼ်လဵင်ႉတွင်ႉ ဝႃႈၼႆ။
ဝၢႆးပွႆး ႁူင်းၾႆးမိၼ်ယဝ်ႉ တေႃႇထိုင်ဝၼ်းမိူဝ်ႈၼႆႉ ပေႃးၸမ် 7-8 မူင်း ၽႂ်ဢမ်ႇႁတ်းၵႂႃႇမႃး ၸွမ်းတၢင်း၊ ဢွၼ်ၵၼ်ၵူဝ်၊ တေမီးၵူၼ်းၶၢႆတၢင်းၵိၼ် တီႈၵၢတ်ႇၵၢင်ၶမ်ႈဢိတ်းဢွတ်းၵူၺ်း၊ ၼႂ်းပွၵ်ႉၼႂ်းယွမ်ႇတႄႉ သမ်ႉပေႃးယဵၼ်သီႇ၊ ႁၢၼ်ႉၶၢႆ တၢင်းၶၢႆၵေႃႈ ဢိုတ်းမူတ်းၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။
“ၵူၼ်းၸၢႆးၵေႃႈ ၶဝ်ယင်းလိုပ်ႈလမ်းတီႉၺွပ်း၊ ပေႃးပဵၼ်ၼၢင်းယိင်း ယိင်ႈၶႅၼ်း တေလီမႆႈၸႂ်ၵႃႈႁိုဝ်ၼႆ ဢမ်ႇၶႂ်ႈႁတ်းဝူၼ်ႉ။ ယွၼ်ႉဢမ်ႇမီးလွင်ႈႁူမ်ႇလူမ်ႈလႄႈ ပေႃးၵၢင်ၶမ်ႈမႃးၵူဝ်ၼႃႇ မီးတၢင်းၵႂႃႇ ပေႃးဢမ်ႇႁတ်းၵႂႃႇၶႃႈ၊ ဢမ်ႇႁတ်းၵႂႃႇတၢင်းလႂ်၊ ယၢမ်းလဵဝ် ၶဝ်ၺွပ်းၵူၼ်းၸွမ်းတႃႈ ၸွမ်းတၢင်းၵူၺ်းသေတႃႉ၊ ဝၢႆးၼႆႉ ပေႃးၶဝ် ၶဝ်ႈတီႉၺွပ်းထိုင်ၼႂ်းႁိူၼ်း တေႁဵတ်းႁိုဝ်ယဝ်ႉၶႃႈလႃႇ လႆႈမႆႈၸႂ်ၶႃႈဢေႃႈ”- ဝႃႈၼႆ။
လိူဝ်ၼၼ်ႉ တီႈဝဵင်းတူၼ်ႈတီး ၽူႈလၵ်ႉၸၵ်ႉၶုတ်ႈၵေႃႈ ၼမ်လိူင်ႇ၊ ရူတ်ႉၵႃးၵႆႉႁၢႆ၊ ၽွင်းပွႆး ဝၼ်းပိုတ်ႇပၢင် ပွႆးၼၼ်ႉၵူၺ်း ရူတ်ႉၶိူင်ႈႁၢႆ 20 လမ်းပၢႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ