ၶိူင်ႈမိၼ် သိုၵ်းမၢၼ်ႈ မႃးပွႆႇမၢၵ်ႇထႅင်ႈ ၼႂ်းၸႄႈဝဵင်းလႃႈသဵဝ်ႈ တီႈသိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ ဝႆႉၼၼ်ႉ ၸၢၵ်ႇမၢၵ်ႇတိူဝ်ႉၺႃး ၵူၼ်းႁိူၼ်းလဵဝ် သၢမ်ၵေႃႉပေႃႈမႄႈလုၵ်ႈ လႆႈမၢတ်ႇၸဵပ်းႁၢဝ်ႈႁႅင်း။

ဝၼ်းတီႈ 24/11/2024 ယၢမ်းၵၢင်ၶမ်ႈ 7 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝၢၼ်ႈၼမ်ႉပွင်ႈတင်း ဝၢၼ်ႈတၢၼ်ႇလုၼ်ႇ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ႁိူၼ်းယေး လင်ၼိုင်ႈလႄႈ ႁူင်းႁဵၼ်း 2 လင် လူႉၵွႆၸွမ်း ၼႆယဝ်ႉ။

ၵူၼ်းလႃႈသဵဝ်ႈ ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မၢၵ်ႇၶိူင်ႈမိၼ် သိုၵ်းမၢၼ်ႈ မႃး ပွႆႇ တႅၵ်ႇသႂ်ႇတီႈႁူင်းႁဵၼ်းၶႄႇ ဝၢၼ်ႈတၢၼ်ႇလုၼ်ႇ လူႉၵွႆလင်ၼိုင်ႈ၊ တီႈႁူင်းႁဵၼ်းမၢၼ်ႈ ဝၢၼ်ႈၼမ်ႉပွင်ႈ လူႉၵွႆလင်ၼိုင်ႈ။ ယဝ်ႉၵေႃႈ တူၵ်းသႂ်ႇႁိူၼ်းယေး ၵူၼ်းဝၢၼ်ႈတၢၼ်ႇလုၼ်ႇ လူႉၵွႆလင်ၼိုင်ႈ ၸၢၵ်ႇမၢၵ်ႇတိူဝ်ႉၺႃးၵူၼ်းႁိူၼ်းၼၼ်ႉ မၢတ်ႇ ၸဵပ်း 3 ၵေႃႉ။ ၼႂ်းၼၼ်ႉ ပႃးလုၵ်ႈဢွၼ်ႇ 1 ၵေႃႉ”- ဝႃႈၼႆ။

ၼႂ်းဝၼ်းတီႈ 24 ၼႆႉ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တင်းမူတ်း 4 လုၵ်ႈ ၸၢၵ်ႇမၢၵ်ႇ တိူဝ်ႉၺႃး ၵူၼ်းမိူင်း 3 ၵေႃႉၼၼ်ႉ။ ၼႂ်းၼၼ်ႉ ပႃးလုၵ်ႈဢွၼ်ႇ ဢႃယု 6 ၶူပ်ႇ ၵေႃႉၼိုင်ႈ၊ ၵေႃႉပဵၼ်ပေႃႈ ဢႃယု 40 ၵေႃႉ ၼိုင်ႈလႄႈ ၵေႃႉပဵၼ်မႄႈ ဢႃယု 38 ပီ ၵေႃႉၼိုင်ႈ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ ၸွမ်းႁွင်ႈယႃ ၼႂ်း ပိုၼ်ႉတီႈဝႆႉယဝ်ႉ – သိုဝ်ႇၶၢဝ်ႇ ၼႂ်းပိုၼ်ႉတီႈ (လားရှိုးမြို့ ပြန်လည်ထူထောင်ရေး) ဢွၵ်ႇဝႆႉ ၼင်ႇၼႆ။

ၼႂ်းလိူၼ်ၼူဝ်ႊဝႅမ်ႊပိူဝ်ႊၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းလႃႈသဵဝ်ႈၼႆႉ ဢမ်ႇယွမ်း 2 ပွၵ်ႈယဝ်ႉ။ မိူဝ်ႈဝၼ်းတီႈ 5 ၼၼ်ႉ ၵမ်းၼိုင်ႈလႄႈ ဝၼ်းတီႈ 24 ၼႆႉ ၵမ်းၼိုင်ႈ။

မိူဝ်ႈဝၼ်းတီႈ 5 ယၢမ်းၵၢင်ၼႂ်ၸဝ်ႉ 1 မူင်း ၶိူင်ႈမိၼ် သိုၵ်းမၢၼ်ႈ ပွႆႇမၢၵ်ႇတီႈဝၢၼ်ႈမႄႈႁၢၼ်ႇ 2 လုၵ်ႈ တိူဝ်ႉၺႃး လုမ်း ၽူႈၵွၼ်းပွၵ်ႉလႄႈ ႁိူၼ်းယေး။ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး ဝႃႈၼႆ။

တႄႇဢဝ်လိူၼ်ၵျူႊလၢႆႊၼၼ်ႉမႃး တေႃႇထိုင် လိူၼ်ဢွၵ်ႊထူဝ်ႊပိူဝ်ႊ ၼႂ်းၶၢဝ်းတၢင်း 4 လိူၼ်ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းလႃႈသဵဝ်ႈၼႆႉ တိူဝ်ႉၺႃး ၵူၼ်းမိူင်း လူႉတၢႆ 38 ၵေႃႉ မၢတ်ႇၸဵပ်း 128 ၵေႃႉ ယူႇတီႈ တပ်ႉသိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 01/11/2024 ၼႆႉၼင်ႇၼႆ။