သိုၵ်းမၢၼ်ႈ သုမ်းသိုၵ်းတီႈမိူင်းၶၢင် ပၢႆႈၸူးမိူင်းၶႄႇ ထုၵ်ႇၶႄႇသူင်ႇတူဝ်ပွၵ်ႈၶိုၼ်း တီႈဝဵင်းမူႇၸေႊ ႁႅင်းသိုၵ်း 300 ပၢႆ – ၵူၼ်းမူႇၸေႊလၢတ်ႈ။

ဝၼ်းတီႈ 23/11/2024 ယၢမ်းၵၢင်ၶမ်ႈ သိုၵ်းမၢၼ်ႈ ယိုတ်းမိူင်း လုၵ်ႉတၢင်းမိူင်းမၢဝ်း ၼႂ်းဢိူင်ႇတႂ်ႈၶူင်း ၼႃႈလိၼ်ၽွင်းငမ်းတူဝ်ၵဝ်ႇ ၸိုင်ႈမိူင်းၶႄႇ ထုၵ်ႇသိုၵ်းၶႄႇ သူင်ႇတူဝ်ဢွၵ်ႇမႃး တီႈၽၵ်းတူမၢၼ်ႈဝဵင်း ၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ယွၼ်ႉသုမ်းသိုၵ်း တီႈဝဵင်းၵၢၼ်ႇပၢႆႉတီႇ (ကန်ပိုက်တီမြီု့) ၸႄႈမိူင်းၶၢင် ဝႃႈၼႆ။

ၵူၼ်းမူႇၸေႊ ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢၼ်ဢွၵ်ႇမႃး တီႈမိူင်းၶႄႇ ၼၼ်ႉ ၶဝ်သုမ်းသိုၵ်း တီႈဝဵင်းၵၢၼ်ႇပၢႆႉတီႇ ၸႄႈမိူင်းၶၢင်ၼၼ်ႉသေ ပၢႆႈၵႂႃႇၸူးမိူင်းၶႄႇ။ ယူႇတီႈၼၼ်ႈသေ ၶႄႇၶဝ် ဢဝ်ပုၼ်ႈၽွၼ်း မႃးသူင်ႇပွၵ်ႈၶဝ်ႈၶိုၼ်း တီႈၽၵ်းတူမၢၼ်ႈဝဵင်း ၼႆႉၶႃႈဢေႃႈ”- ဝႃႈၼႆ။

ယၢမ်းလဵဝ် သိုၵ်းမၢၼ်ႈ ဢၼ်သုမ်းသိုၵ်း ၼႂ်းၸိုင်ႈတႆးပွတ်းႁွင်ႇ လၢႆတီႈသေ ပၢႆႈမႃးယူႇဝႆႉ တီႈဝဵင်းမူႇၸေႊၼႆႉသမ်ႉ မိူၼ်ၼင်ႇ – ဝဵင်းပၢင်ႇသၢႆး၊ မိူင်းၵူဝ်း၊ သၢမ်ၸဵင်ႇၶမ်း (ၵျိၼ်ႊသၢၼ်ႊၵျေႃႉ)၊ 105 လၵ်း၊ ၵူတ်းၶၢႆ၊ ၼမ်ႉၽၵ်းၵႃ၊ ၼမ်ႉၶမ်း၊ ၵဵတ်ႉလွႆၸေႊ မိူင်းၶၢင်၊ မၢၼ်ႈဝဵင်းလူင် ထုင်ႉလွႆႁူဝ်သိူဝ်လႄႈ ၵဵတ်းၼွင်မူၼ်း ၸိူဝ်းၼႆႉ။

“တီႈၵဵတ်ႉလွႆၸေႊၼၼ်ႉ ၶဝ်သုမ်းသိုၵ်းသေ ပၢႆႈၶဝ်ႈၸူး မိူင်းဝၼ်းၼၼ်ႉၵေႃႈ ၶႄႇၶဝ်မႃးသူင်ႇပၼ် တီႈမူႇၸေႊၼႆႉ။ တီႈၵဵတ်ႉၼွင်မူၼ်း ၼၼ်ႉၵေႃႈ သုမ်းသိုၵ်းၶဝ် ပၢႆႈၶဝ်ႈၼွင်တဝ်း ၺႃးၶႄႇ သူင်ႇၶဝ်ႈ တၢင်းမူႇၸေႊ။ ယၢမ်းလဵဝ် သိုၵ်းမၢၼ်ႈ မႃးၵွင်ဝႆႉ တီႈမူႇၸေႊၼႆႉ ၼပ်ႉႁူဝ်ႁဵင်မၼ်းယဝ်ႉ။ ဢၼ်ထႅမ် မႃးတၢင်းၶိူင်ႈမိၼ်ၶဝ် ၸိူဝ်းၼၼ်ႉၵေႃႈမီး။ ယၢမ်းလဵဝ် သိုၵ်းမၢၼ်ႈ 300 ပၢႆၼၼ်ႉ မႃးယူႇဝႆႉတီႈ ထမ်ႇမရူင်ႇ ၼိူဝ်လွႆတိုင်ႈၶမ်းဝႆႉဢေႃႈ”- ၵူၼ်းမူႇၸေႊ သိုပ်ႇလၢတ်ႈ ၼႄၼင်ႇၼႆ။

ယွၼ်ႉၽႅၼ်ယၼ်ႇသိုၵ်း 1027 ၼႆႉသေ ယူႇတီႈ ၸုမ်းဢူၺ်းလီ ပွတ်းႁွင်ႇၶဝ် ယိုတ်းၵုမ်းလႆႈ ဝဵင်းတင်းၼမ်ယဝ်ႉ ၼႂ်းၸိုင်ႈတႆးပွတ်းႁွင်ႇ ဢၼ်ပႆႇယိုတ်းၵုမ်းလႆႈတႄႉ တေၵိုတ်း ဝဵင်းမူႇၸေႊ၊ တၢင်ႉယၢၼ်းလႄႈ မိူင်းယႆ ၸိူဝ်းၼႆႉ။

ၵွပ်ႈၼႆလႄႈ ထႅင်ႈၾၢႆႇၼိုင်ႈၵေႃႈ ၼႂ်းၸႄႈမိူင်းၶၢင်ၼၼ်ႉ ယူႇတီႈ တပ်ႉသိုၵ်းၶၢင် KIA ၵေႃႈ ႁႅၼ်းသိုၵ်း လေႃႇတိုၵ်း သိုၵ်းမၢၼ်ႈမႃးႁၢဝ်ႈႁႅင်းသေ ယူႇတီႈ သိုၵ်းမၢၼ်ႈ လႆႈထွႆသိုၵ်းႁႅင်း ပၢႆႈၸူးမိူင်းၶႄႇယဝ်ႉ ၸင်ႇၶဝ်ႈမႃးတၢင်းဝဵင်းမူႇ ၸေႊၼႆႉၶိုၼ်း ဝႃႈၼႆ။