ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉ ၸဵမ်မိူဝ်ႈသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးထိုင် ဝၼ်းမိူဝ်ႈၼႆႉ ၽူႈလၵ်ႉၸၵ်ႉၶုတ်ႈလိူင်ႇၼမ်။ မီးၵူၼ်းၶဝ်ႈၸူၼ် ၶဝ်ႈလၵ်ႉ ႁိူၼ်းယေးဢိၵ်ႇပႃးႁၢၼ်ႉ ၶၢႆၵုၼ်ႇၵူႈသႅၼ်း။
ၼႂ်းလိူၼ်ၼႆႉၵေႃႈ ၸူၼ်ၶဝ်ႈႁၢၼ်ႉၾူၼ်း ၼႂ်းပွၵ်ႉပႃႇလႅင် ႁၢၼ်ႉၼိုင်ႈ ယိုဝ်းသႂ်ႇၵူၼ်းၶၢႆၶူဝ်း တၢႆၵေႃႉၼိုင်ႈ။ ဝၢႆး ၼၼ်ႉ ပလိၵ်ႈလႄႈ ၽူႈမီးပုၼ်ႈၽွၼ်း လူင်းပိုၼ်ႉတီႈလမ်းၸွမ်းတႃႇတီႉၺွပ်း။ ၵူၺ်းၵႃႈ ၾၢႆႇတၢင်းၵူၼ်းၸူၼ် ၶိုၼ်းယိုဝ်းသႂ်ႇလႄႈ သွင်ၾၢႆႇလႆႈပိုတ်းယိုဝ်းၵၼ်။ ဝၢႆးမႃး ပလိၵ်ႈပိုၼ်ၽၢဝ်ႇဝႃႈ ၵူၼ်းၸူၼ်ၼၼ်ႉ တၢႆတင်း 4 ၵေႃႉယဝ်ႉ ဝႃႈၼႆ။
ပူၼ်ႉမႃး ဝၼ်းတီႈ 13/11/2024 ၼႆႉ ႁၢၼ်ႉၶၢႆၾူၼ်း First Rate ဢၼ်မီးၼႂ်းပွၵ်ႉပႃႇလႅင် ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ လႅၼ်လိၼ်တႆး – ထႆး ၺႃးၸုမ်းဢမ်ႇႁူႉၾၢႆႇ ၽူႈၸၢႆး 4 ၵေႃႉ ၶဝ်ႈၸူၼ်၊ ၵူၼ်းႁဵတ်းၵၢၼ်ပႂ်ႉႁၢၼ်ႉ ၵေႃႉၼိုင်ႈ ၺႃးယိုဝ်းတၢႆ ထင်တီႈ။
ၵူၼ်းၸူၼ် 4 ၵေႃႉၼၼ်ႉ လႆႈၵႂႃႇ iPhone 15 (5) လုၵ်ႈလႄႈ iPhone 16 (15) လုၵ်ႈ ႁူမ်ႈ 20 လုၵ်ႈ ၼပ်ႉပဵၼ်ၶၼ်ငိုၼ်း တင်းမူတ်း တေပဵၼ် 1,121 သႅၼ်ပျႃး။ ၵူၼ်းၸူၼ် 4 ၵေႃႉၼၼ်ႉ ဝၢႆးၶဝ်ၸူၼ်လႆႈယဝ်ႉ ၼႅတ်ႈႁေႃႈရူတ်ႉၶိူင်ႈ ပၢႆႈလတ်းၵႂႃႇတၢင်းသဵၼ်ႈတၢင်းလူင်။ ၽိူဝ်ႇထိုင်တီႈႁိမ်းၵၢတ်ႇဢႃးၶႃႇၼၼ်ႉ ႁၢႆၵႂႃႇပႅတ်ႈ။
ဝၼ်းတီႈ 14 ၼၼ်ႉ ၵူၼ်းပိုၼ်ႉတီႈ ပၼ်ၶၢဝ်ႇလႄႈ ၽူႈမီးပုၼ်ႈၽွၼ်း လၢႆၸုမ်းႁူမ်ႈၵၼ် ၸွမ်းႁွႆး ၵူတ်ႇထတ်းထိုင် ဢွင်ႈတီႈ ဢၼ်ၸုမ်းၵူၼ်းၸူၼ်ၶဝ်ၶၢတ်ႈႁွင်ႈယူႇသဝ်းဝႆႉ၊ ႁွင်ႈမၢႆ 10 တီႈဝၢၼ်ႈၵႅဝ်ႈ လူင် ဢၼ်မီးႁိမ်းတၢင်းၵႂႃႇ ၵဵင်းတုင်ၼၼ်ႉ။
မိူဝ်ႈၽူႈမီးပုၼ်ႈၽွၼ်းၶဝ် မိူဝ်းဝႅတ်ႉလွမ်ႉ တႃႇတီႉၺွပ်းဢဝ်လိူင်ႈၼၼ်ႉ ၽူႈပူၼ်ႉပႅၼ်ၸိူဝ်းၼၼ်ႉ ယိုဝ်းၵွင်ႈတွပ်ႇလႄႈ ႁဵတ်းႁႂ်ႈတင်းသွင်ၾၢႆႇ မီးလွင်ႈပိုတ်းယိုဝ်းၵၼ် ႁၢဝ်ႈႁႅင်း။ ဢမ်ႇပေႃးႁိုင် ၵူၼ်းၸူၼ် 4 ၵေႃႉၼၼ်ႉ ၺႃးယိုဝ်းတၢႆထင်တီႈ။ ၵူၼ်းၸၢႆး ဢႃယု 26 ပီ ယူႇဝဵင်းတႃႈၶီႈလဵၵ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –
“ၵူၼ်းမိူင်းတႄႉ လႆႈၵူဝ်ယူႇႁဵတ်းၼၼ်ယဝ်ႉ။ၵၢၼ်လၵ်ႉၵၢၼ်ၸူၼ်ၵေႃႈ ယူႇယူႇၵေႃႈ ပဵၼ်မႃးႁဵတ်း ၼၼ်။ ပေႃးလႆႈငိၼ်းၶၢဝ်ႇဝႃႈ လၢၼ်ႉၼၼ်ႉလၢၼ်ႉၼႆႉ ထုၵ်ႇၸူၼ်ထုၵ်ႇလၵ်ႉၼႆ ၵူၼ်းမိူင်းႁဝ်းပေႃး လႆႈၾၢင်ႉယူႇ ၾၢင်ႉၵိၼ်ၶႃႈ ဢေႃႈ”- ဝႃႈၼႆ။
ဝၢႆးသေ ၸူၼ် 4 ၵေႃႉၼႆႉ ၺႃးယိုဝ်းတၢႆယဝ်ႉ ပလိၵ်ႈမၢၼ်ႈ ယိုတ်းလႆႈၵွင်ႈပွတ်း 4 လဝ်း၊ ယဝ်ႉၵေႃႈ ယိုတ်းလႆႈပႃး ၾူၼ်းလၢႆသႅၼ်းလေႃးလႄးၵၼ် 12 လုၵ်ႈ ၼႂ်းၼၼ်ႉ ၾူၼ်းဢၼ်တိုၵ်ႉၸႂ်ႉလႆႈ မီး 9 လုၵ်ႈလႄႈ ၾူၼ်းဢၼ်ၵွႆဝႆႉ မီး 3 လုၵ်ႈ။ လိူဝ်ၼၼ်ႉ ရူတ်ႉၵႃးသႅၼ်း TOYOTA WISH သီၶၢဝ် ဢၼ်မီးပၢႆႉ (မၢႆရူတ်ႉ) SHN-12/ 1k-7890 လႄႈ မၢႆၾၢင် ဢိၵ်ႇသမၢတ်ႉၵၢတ်ႉၶဝ်။
မိူဝ်ႈၽူႈမီးပုၼ်ႈၽွၼ်းၶဝ် ထတ်းတူၺ်းဝႂ်ၵပ်းတူဝ် ၵူၼ်းၸူၼ်ၸိူဝ်းၼၼ်ႉယဝ်ႉ လႆႈႁူႉဝႃႈ ပဵၼ် ၵူၼ်းတၢင်း ပွတ်းလႃႈသဵဝ်ႈ။ ဢႃယုသႅၼ်းပၢၼ်ၶဝ် မီးၼႂ်းၵႄႈ 25 – 30 ပီၼႆ သိုဝ်ႇၶၢဝ်ႇ (ရှမ်းအရှေ့ သ တင်းမဏ္ဍိုင်) တႄႉ တႅမ်ႈတၢင်ႇဝႆႉ ၼင်ႇၼႆ။
ၵူၼ်းမိူင်းတႃႈၶီႈလဵၵ်း ၵေႃႉၼိုင်ႈ လၢတ်ႈဝႃႈ – “ၵူၼ်းမိူင်းႁဝ်းၶႃႈၵေႃႈ လႆႈမႆႈၸႂ် လႆႈၵူဝ်ၼႃႇယဝ်ႉလႄႈ ပေႃးပဵၼ်လႆႈတႄႉ ၶႂ်ႈႁႂ်ႈၽူႈမီးပုၼ်ႈၽွၼ်းၶဝ် ၵႅတ်ႇၶႄပၼ်ၵူၼ်းမိူင်းႁဝ်း ဢဝ်ႁူမ်ႇလူမ်ႈပၼ် ႁႂ်ႈၵတ်း ယဵၼ်ၵႂႃႇၶႃႈဢေႃႈ။ ဢမ်ႇၶႂ်ႈ ႁႂ်ႈမီးၽေးသင်ၶႃႈ။ ၵၢင်ၸႂ်ၵူၼ်းမိူင်းႁဝ်းတႄႉ ၶႂ်ႈယူႇၵတ်းၵတ်းယဵၼ်ယဵၼ်သေ ၶႂ်ႈႁဵတ်းၵိၼ်ၵၢၼ် ႁႃၵိၼ်လဵင်ႉတွင်ႉ ၽႂ်မၼ်း ၵႂႃႇငၢႆႈလူမ်ၸႂ်ၵူၺ်း”- ဝႃႈၼႆ။
ၶၢဝ်းယၢမ်းဝၢၼ်ႈမိူင်းလူႉ ယွၼ်ႉသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းၼႆႉ ၵူၼ်းမိူင်းႁဵတ်းၵၢၼ် ႁႃၵိၼ်လဵင်ႉတွင်ႉယၢပ်ႇ၊ မီးၵူၼ်းၸိူဝ်းၸူးငၢႆႈ ႁႃငိုၼ်းလူၺ်ႈ ဢမ်ႇထုၵ်ႇၸွမ်းမၢႆမီႈၼမ်မႃး။ ယႃႈမဝ်းၵမ် လိူင်ႇၼမ်၊ ၽူႈလၵ်ႉၸၵ်ႉၶုတ်ႈ လိူင်ႇၼမ်၊ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ။ ၶၢဝ်းတၢင်း သိုၵ်းမၢၼ်ႈ ယိုတ်းမိူင်းမႃး 3 ပီပၢႆၼႆႉ ၵူၼ်းမိူင်းၺႃးလၵ်ႉ ၺႃး ၸူၼ်ယူႇၵူႈဝၼ်း။
လွင်ႈၵူၼ်းမိူင်း ၺႃးၸူၼ်ပွၵ်ႈၼႆႉ ၾၢႆႇၸဝ်ႈၶွင်ႁၢၼ်ႉၵေႃႈ လူႉယႂ်ႇသုမ်းလူင်။ လႆႈသုမ်းၵူၼ်း ၵေႃႉၼိုင်ႈ ၸိုဝ်ႈ- မွင်ႇႁဵင်းမျၢတ်ႉတူႇ ဢႃယု 20 ပၢႆ။ ၾၢႆႇၵူၼ်းၸူၼ်ၵေႃႈ ၺႃးယိုဝ်းတၢႆပႃးထႅင်ႈ တင်း 4 ၵေႃႉလႄႈ လႆႈဝႃႈ ဢမူႉၶတီး ပွၵ်ႈၼႆႉ ႁၢႆႉႁႅင်း။ ထိုင်မိူဝ်ႈလဵဝ် ၾၢႆႇၸဝ်ႈၶွင်ႁၢၼ်ႉၾူၼ်း First Rate ၵေႃႈ တိုၵ်ႉၺႃးပိုတ်ႇဢမူႉၶတီးဢဝ်လိူင်ႈဝႆႉ မၢႆမတ်ႉတႃ (ပ) – 168/2024 ၊ 2024 ၊ ရာဇသတ်ကြီး ပုဒ်မ 302/392/34 – လူၺ်ႈၵူၼ်းႁဵတ်းၵၢၼ်လႆႈ လူႉတၢႆ ၼႂ်းၼႃႈၵၢၼ်ၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ