သိုၵ်းမၢၼ်ႈ ယိုတ်းမိူင်း တဵၵ်းၶၢၼ်းၵူၼ်းမိူင်းၼၢႆး ၶဝ်ႈႁၢပ်ႇၵၢၼ်သိုၵ်း ဢမ်ႇႁဵတ်းဢမ်ႇလႆႈ သင်လၵ်ႉပၢႆႈတေဢဝ်လိူင်ႈ(ပၼ်တၢမ်ႇၼၵ်း) ထိုင်တီႈ လွၵ်ႇငိုတ်ႈဝႆႉၼင်ႇၼႆ။

ပူၼ်ႉမႃး ဝၼ်းတီႈ 20/11/2024 ၼႆႉ ယူႇတီႈ ၽူႈၵွၼ်းၸႄႈဝဵင်း ႁွင်ႉၽူႈၵွၼ်းပွၵ်ႉ ၼႂ်းဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ႁဵတ်းပၢင်ၵုမ်သေ လၢတ်ႈဝႃႈ သင်ပဵၼ်ၽူႈၸၢႆး ဢႃယု 18 ပီ ထိုင် 35 ပီ တေၶဝ်ႈႁၢပ်ႇ ၵၢၼ်သိုၵ်း ၵူႈၵေႃႉ၊ ၽူႈယိင်းသမ်ႉ ဢႃယု 18 ပီ ထိုင် 27 ပီ ဝႃႈၼႆ။

ၵူၼ်းမိူင်းၼၢႆး ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၸၢင်ႈၵူၼ်းၵႂႃႇတႅၼ်းၵေႃႈ ဢမ်ႇလႆႈ။ တၢမ်တူဝ် တေလႆႈၵႂႃႇႁဵတ်းၼႆၶႃႈဢေႃႈ။ သဵၼ်ႈမၢႆႁူဝ်ၵူၼ်းၼႆႉ မီးဝႆႉတီႈၽူႈၵွၼ်းၸႄႈဝဵင်း မူတ်းယဝ်ႉ။ ၶဝ်ဝႃႈ သင်လၵ်ႉပၢႆႈၸိုင် တေပၼ်တၢမ်ႇၼၵ်းၼႃ။ သင်ဝႃႈ ဢွၵ်ႇဢႅဝ်ႇၵၢင်ၶမ်ႈၵၢင်ၶိုၼ်းသေ ၺႃးတီႉၺွပ်းလႆႈၸိုင် တေဢမ်ႇဢဝ်ပုၼ်ႈၽွၼ်းသင်ပၼ် ၶဝ်လၢတ်ႈတႅတ်ႇလႅင်းဝႆႉ ၸိူင်ႉၼၼ်ၶႃႈဢေႃႈ ”- ဝႃႈၼႆ။

ဝဵင်းမိူင်းၼၢႆးၼႆႉ တင်းမူတ်းမီး 5 ပွၵ်ႉ ၼႂ်း 5 ပွၵ်ႉၼၼ်ႉ 1 ပွၵ်ႉလႂ် တေလႆႈၶဝ်ႈႁၢပ်ႇၵၢၼ်သိုၵ်း 1 ၵေႃႉ။ သင်ၽတ်ႉၽဵင်ႇၵၼ်ၸိုင် 1 လိူၼ်လႂ် ၶဝ်တေႁွင်ႉၵႂႃႇ 5 ၵေႃႉ။ လိူဝ်ၼၼ်ႉ ၵူၼ်းၶဝ်ႈႁၢပ်ႇၵၢၼ် သိုၵ်းၸိူဝ်းၼႆႉ ယူႇတီႈၵူၼ်းမိူင်းသေ တေလႆႈၵမ်ႉၸွႆႈငိုၼ်းတွင်းပၼ်ထႅင်ႈ ဝႃႈၼႆ။

“လႆႈငိၼ်းဝႃႈ သင်ပွၵ်ႉယႂ်ႇ ႁူဝ်ၵူၼ်းၼမ်ၸိုင် ၶဝ်တေၵဵပ်းၵူၼ်းၼမ်။ မိူၼ်ၼင်ႇ ပွၵ်ႉဢူးယဵၼ်ႇၼႆႉ လင်ႁိူၼ်းမီး 500 ပၢႆ လႆႈငိၼ်းဝႃႈ ၶဝ်တေၵဵပ်း 5 ၵေႃႉ။ သင်ဝႃႈ ပွၵ်ႉယွမ်ႇ လင်ႁိူၼ်းဢေႇၸိုင် ၶဝ်တေၵဵပ်း 1 ၵေႃႉၼႆၶႃႈဢေႃႈ”- ၵူၼ်းမိူင်းၼၢႆး သိုပ်ႇလၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉသေ ယူႇတီႈ ၵူၼ်းမိူင်းၼၢႆးတႄႉ ဢွၼ်ၵၼ် တိုၵ်းယွၼ်းထိုင် ႁႂ်ႈ RCSS ၶဝ်ႈၸွႆႈၵႄႈ လိတ်ႈပၼ် ၼင်ႇႁိုဝ် ၵူၼ်းမိူင်းၼၢႆး ပေႃးတေ ဢမ်ႇလႆႈၵႂႃႇၶဝ်ႈႁၢပ်ႇၵၢၼ်သိုၵ်းမၢၼ်ႈၼၼ်ႉ။ ယွၼ်ႉဝႃႈ ၼႂ်းၸႄႈဝဵင်းမိူင်းၼၢႆးၼႆႉ ပဵၼ်ၼႂ်းၼႃႈတီႈ ၶွင်ႇသီႇဢဝ်ၶိုၼ်းၸိုင်ႈတႆး RCSS တူင်ႉၼိုင်ယူႇဝႆႉ ဝႃႈၼႆ။  

မၢႆမီႈပၵ်းပိူင် တႃႇႁၢပ်ႇၵၢၼ်သိုၵ်းၼႆႉ ယူႇတီႈ သိုၵ်းမၢၼ်ႈ တႄႇၸႂ်ႉတိုဝ်းမႃး မိူဝ်ႈဝၼ်းတီႈ 10/02/2024 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်။ သင်ဝႃႈ ၽူႈၾိုၵ်းၵၢၼ်သိုၵ်းၶဝ် လူင်းပၢင်ၾိုၵ်းၽွၼ်ႉယဝ်ႉၼႆၸိုင် ယူႇတီႈ သိုၵ်းမၢၼ်ႈ သူင်ႇတူဝ်ၶဝ် ၸူးၼႃႈသိုၵ်းၵမ်းသိုဝ်ႈလႄႈ ၵွပ်ႈၼႆ ႁဵတ်းႁႂ်ႈၵူၼ်းမိူင်း ၼႂ်းမိူင်းႁူမ်ႈတုမ် ဢွၼ်ၵၼ်ပၢႆႈဢွၵ်ႇၼွၵ်ႈမိူင်း ၼမ် ဝႃႈၼႆ။