တႃႇၶႅၵ်ႇၼွၵ်ႈမိူင်း ပေႃးတေၶဝ်ႈမႃးဢႅဝ်ႇလႄႇ ၼႂ်းမိူင်းႁူမ်ႈတုမ်ၼမ်ၼႆႉ တႄႇဢဝ် ဝၼ်းတီႈ 21/10/2024 မႃးၼႆႉ သိုၵ်းမၢၼ်ႈပၼ် Arrival visa တီႈၵူၼ်းမိူင်းၵျပၼ်ႊ ၵူဝ်ႊရီႊယိူဝ်ႊၸၢၼ်း ၵူၼ်းမိူင်းၸိူဝ်းယိပ်းဝႂ်ၶၢမ်ႈမိူင်း passport ၼႂ်း ၼႃႈလိၼ်ဢုပ်ႉပိူင်ႇၶိုၵ်ႉတွၼ်း မၵႃႊဢူဝ်ႊ မိူင်းၶႄႇ ၸိူဝ်းၼႆႉ။

ႁွင်ႈၵၢၼ် ၾၢႆႇၵူၼ်းၶဝ်ႈဢွၵ်ႇမိူင်း တႂ်ႈသိုၵ်းမၢၼ်ႈ ပိုၼ်ၽၢဝ်ႇဝႆႉဝႃႈ Arrival visa  ဢၼ်ပၼ်ဝႆႉ ယၢမ်းလဵဝ်ၼႆႉ ပဵၼ်တွၼ်ႈတႃႇ ၶႅၵ်ႇဢႅဝ်ႇယဵမ်ႈတွင်ႈတဵဝ်းၼွၵ်ႈမိူင်း။ ၸွမ်းၼင်ႇ ပၵ်းပိူင် Arrival visa မီးဝႆႉသေ ၶႅၵ်ႇၼွၵ်ႈမိူင်း ၸိူဝ်းၶဝ်ႈမႃးၼႂ်းမိူင်းႁူမ်ႈတုမ်ၼႆႉ တေလႆႈပၼ်ၵႃႈဝီႊသႃႊ 50 တေႃႊလႃႊ ဢမေႊရိၵၼ်ႊ။

ယဝ်ႉၵေႃႈ မီးၶႂၢင်ႉယူႇသဝ်း ၼႂ်းမိူင်း 30 ဝၼ်း။ သင်ပူၼ်ႉ 30 ဝၼ်းၵႂႃႇၸိုင် တေဢမ်ႇပၼ်ၶႂၢင်ႉ သိုပ်ႇတေႃႇဢႃယု ဝီႊသႃႊထႅင်ႈ။ သင်ယူႇပူၼ်ႉဝၼ်း ဢၼ်ပၼ်ၶႂၢင်ႉဝႆႉၼၼ်ႉၸိုင် တေၺႃးတၢမ်ႇမႂ်ငိုၼ်း ဝႃႈၼႆ။

ယိူင်းဢၢၼ်း ၼင်ႇႁိုဝ် ၵၢၼ်ဢႅဝ်ႇယဵမ်ႈတွင်ႈတဵဝ်း တေႁုၼ်ႈမုၼ်းၶိုၼ်ႈယႂ်ႇလႄႈ တေတိူဝ်းၸၼ်ၸႂ် ၶႅၵ်ႇဢႅဝ်ႇလႄႇတွင်ႈတဵဝ်းလႆႈ ၼႆသေ လွင်ႈပၼ်ၶႂၢင်ႉ Arrival visa ၼႆႉ တေၸၢမ်းႁဵတ်းသၢင်ႈၵႂႃႇတူၺ်း ၼႂ်းၶၢဝ်းတၢင်း 1 ပီ ၼႆယဝ်ႉ။ 

ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇမႃးၼႆႉ ယွၼ်ႉငဝ်းလၢႆးၵၢၼ်မိူင်းဢမ်ႇၼိမ်၊ ဢမ်ႇမီးလွင်ႈႁူမ်ႇလူမ်ႈလႄႈ ၶႅၵ်ႇဢႅဝ်ႇလႄႇတွင်ႈတဵဝ်းၼွၵ်ႈမိူင်း လူတ်းယွမ်းၵႂႃႇ၊ ႁဵတ်းႁႂ်ႈတုမ်ႉတိူဝ်ႉ ၼႂ်းၶၵ်ႉတွၼ်ႈၵၢၼ်ငၢၼ်း ၵၢၼ်ဢႅဝ်ႇလႄႇတွင်ႈတဵဝ်း။

ႁွင်ႈၵၢၼ်ၽွင်းလူင် ၾၢႆႇႁူင်းႁႅမ်းလႄႈ ၵၢၼ်ဢႅဝ်ႇလႄႇတွင်ႈတဵဝ်ႈ သိုၵ်းမၢၼ်ႈတႄႉ ပိုၼ်ၽၢဝ်ႇဝႆႉဝႃႈ တႄႇဢဝ်လိူၼ် ၵျႅၼ်ႊၼိဝ်ႊရီႊတေႃႇထိုင် လိူၼ်သႅပ်ႊထႅမ်ႊပိူဝ်ႊပီ 2024 ၼႆႉ ၶႅၵ်ႇၼွၵ်ႈမိူင်းၸိူဝ်းၶဝ်ႈမႃး ၸွမ်းသၢႆၵၢၼ်မိၼ် တင်းမူတ်းမီး 2 သႅၼ်ပၢႆ၊ သင်ႁူမ်ႈၵၼ်တင်း ဢၼ်ၶဝ်ႈမႃးၸွမ်းလႅၼ်လိၼ်ၸိုင် မီး 6 သႅၼ် ပၢႆ ဝႃႈၼႆ။

ၵွၼ်ႇသိုၵ်းမၢၼ်ႈ ပႆႇယိုတ်းဢႃႇၼႃႇ ၼႂ်းပီ 2019 ၼၼ်ႉသမ်ႉ တႄႇဢဝ်လိူၼ်ၵျႅၼ်ႊၼိဝ်ႊရီႊတေႃႇထိုင် လိူၼ်သႅပ်ႊထႅမ်ႊပိူဝ်ႊၼၼ်ႉ ၶႅၵ်ႇၼွၵ်ႈမိူင်း ၸိူဝ်းၶဝ်ႈမႃးၸွမ်းသၢႆၵၢၼ်မိၼ်မီးၼိုင်ႈလၢၼ်ႉပၢႆ၊ သင်ႁူမ်ႈၵၼ်တင်း ဢၼ်ၶဝ်ႈမႃး ၸွမ်းလႅၼ်လိၼ်ၸိုင်မီး 3 လၢၼ်ႉပၢႆ။

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈဝႃႈ ၼႂ်းပီ 2023 ပူၼ်ႉမႃးၼႆႉ ၶႅၵ်ႇၼွၵ်ႈမိူင်း ၸိူဝ်းၶဝ်ႈမႃးၼႂ်း မိူင်းမၢၼ်ႈ တင်းပီမီး 1 လၢၼ်ႉပၢႆ။ ပီ 2024 ၼႆႉသမ်ႉ ၼႂ်းၶၢဝ်းတၢင်း 5 လိူၼ် မီး 5 သႅၼ်ပၢႆယဝ်ႉလႄႈ မုင်ႈမွင်းဝႃႈ တေၼမ်လိူဝ်ပီပူၼ်ႉမႃးယူႇ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။