သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇတူၵ်းသႂ်ႇတီႈ ဝတ်ႉၵုင်းလူင် ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၵူၼ်းပၢႆႈၽေးသိုၵ်း ဢၼ်မီးယူႇဝႆႉ တီႈၼႂ်းၵျွင်းမုၼ်ၸဝ်ႈ လူႉတၢႆမၢတ်ႇၸဵပ်း။
မိူဝ်ႈဝႃး ဝၼ်းတီႈ 20/11/2024 ယၢမ်းၵၢင်ဝၼ်း 11 မူင်း သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇတူၵ်းတီႈဝတ်ႉ ၵုင်းလူင် ၸၢၵ်ႇမၢၵ်ႇတူၵ်းတိူဝ်ႉ ၵူၼ်းပၢႆႈၽေးသိုၵ်း ဢၼ်ယူႇဝႆႉ တီႈဝတ်ႉမုၼ်ၸဝ်ႈ ၼၢင်းယိင်း တၢႆၵေႃႉၼိုင်ႈ မၢတ်ႇၸဵပ်း 2 ၵေႃႉ ပဵၼ်ၽူႈၸၢႆး ဝႃႈၼႆ။
ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝႃး ၵၢင်ဝၼ်း 11 မူင်း သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇတီႈ ၵျွင်းမုၼ်ၸဝ်ႈၵုင်းလူင် ဢၼ်ၵူၼ်းပၢႆႈၽေးသိုၵ်းမႃးယူႇဝႆႉၼၼ်ႉ၊ ၼၢင်းယိင်း ၵူၼ်းပၢႆႈၽေးသိုၵ်း ဢၼ်မီးတီႈၵျွင်းမုၼ်ၸဝ်ႈ ၼၼ်ႉ မၢတ်ႇၸဵပ်းႁၢဝ်ႈႁႅင်းသေ တၢႆၵႂႃႇၽွင်းဢဝ်တူဝ်မၼ်းၼၢင်းၵႂႃႇႁူင်းယႃ။ ၽူႈၸၢႆးမၢတ်ႇၸဵပ်း သွင်ၵေႃႉၼၼ်ႉ တႃႇၵေႃႉၼိုင်ႈ ပဵၼ်ပေႃႈမၼ်းၼၢင်း”- ဝႃႈၼႆ။
ၵူၼ်းပၢႆႈၽေး ဢၼ်မႃးသွၼ်ႈဝႆႉ တီႈဝတ်ႉၵုင်းလူင်ၼႆႉ ပဵၼ်ၵူၼ်းဝၢၼ်ႈပၢင်ၸူင်လႄႈ ဝၢၼ်ႈၵုင်းလူင် ႁူဝ်ၼပ်ႉၵူၼ်း ၸမ်ပၢၵ်ႇ။ ယွၼ်ႉမၢၵ်ႇတူၵ်းသႂ်ႇ တီႈဝတ်ႉၵုင်းလူင်ၼႆႉသေ ႁဵတ်းႁႂ်ႈၵူၼ်းဝၢၼ်ႈ လႆႈသိုပ်ႇပၢႆႈ ၵႂႃႇတၢင်ႇတီႈတၢင်ႇတၢင်း။ ၵမ်ႈၽွင်ႈၵေႃႈ ပၢႆႈၵႂႃႇယူႇႁိူၼ်းပီႈၼွင်ႉ၊ မၢင်ၸိူဝ်းၵေႃႈ ပၢႆႈၵႂႃႇယူႇၸွမ်းထဵင်ႁႆႈထဵင်ၼႃး ဝႃႈၼႆ။
မိူၼ်ၼင်ၼႆ ၶမ်ႈဝႃးယၢမ်းတဵင်ႈၶိုၼ်း 12 မူင်းပၢႆ (ၼႂ်ၸဝ်ႉ ဝၼ်းတီႈ 21/11/2024) သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇထႅင်း 3 လုၵ်ႈၼႆ ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈၼင်ႇၼႆ။
“မိူဝ်ႈဝႃး ၵၢင်ဝၼ်း မႃးပွႆႇတီႈၵျွင်းမုၼ်ၸဝ်ႈၵုင်းလူင်ၶႃႈဢေႃႈ၊ ၵၢင်ၶိုၼ်းၵေႃႈ မႃးပွႆႇထႅင်ႈ 3 လုၵ်ႈဝႃႇ၊ မႃးပွႆႇတူၵ်းသႂ်ႇတီႈလႂ်တႄႉ ပႆႇႁူႉ၊ ဢွၼ်ၵၼ် ၼႅတ်ႈပၢႆႈဢေႃႈ၊ တေႃႈလဵဝ် ၵပ်းသိုပ်ႇႁႃၵူၼ်းၼႂ်းဝဵင်းၵေႃႈ ဢမ်ႇလႆႈၶႃႈ။ လႆႈငိၼ်းဝႃႈ ၵၢင်ၶိုၼ်းၵေႃႈ မႃးပွႆႇထႅင်ႈ 3 လုၵ်ႈၼႆၵူၺ်းဢေႃႈ”- ဝႃႈၼႆ။
ၵၢင်လိူၼ်ဢွၵ်ႊထူဝ်ႊပိူဝ်ႊပူၼ်ႉမႃး မွၵ်ႈဝၼ်းတီႈ 19 သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ႁူမ်ႈ PDF ပဵၼ်ပၢင်တိုၵ်းၵၼ် တၢင်းဝၢၼ်ႈတွင်းၶမ်း၊ ပၢၼ်ႉပူၺ်း၊ ၵမ်ႉၵေႃႇ ၼႂ်းၸႄႈဝဵင်းၼွင်ၶဵဝ် ပၢင်တိုၵ်း ပဵၼ်ႁၢဝ်ႈႁႅင်း တေႃႇထိုင်ဝၼ်းမိူဝ်ႈၼႆႉ။
ၵူၼ်းၸၢႆး ဢႃယု 40 ပၢႆ လၢတ်ႈၽူႈတွႆႇႁွၵ်ႈဝႃႈ -“ပၢင်တိုၵ်း တႄႇပဵၼ်ႁၢဝ်ႈႁႅင်းၶိုၼ်း တႄႇမိူဝ်ႈလိူၼ်ပူၼ်ႉမႃးယဝ်ႉ။ တေႃႈလဵဝ်ၵေႃႈ ပဵၼ်ပၢင်တိုၵ်းၵၼ်တင်း ဝၢၼ်ႈယေႇဝုၼ်ႇ၊ သဵင်မၼ်းငိၼ်း လင်ႁႅင်းၼႃႇ၊ ဢဝ်တင်းၵွင်ႈလူင် ၵွင်ႈ ဢွၼ်ႇ ယိုဝ်းၵၼ် ၶိုၼ်းၶိုၼ်းဝၼ်းဝၼ်း၊ ၵမ်ႈၼမ် ပိူၼ်ႈဢွၼ်ၵၼ်ပၢႆႈမူတ်းယဝ်ႉ၊ ဢၼ်ဢမ်ႇပၢႆႈၵေႃႈ မီးယူႇၽွင်ႈ၊ မၢင်ၸိူဝ်း ဢမ်ႇၸၢင်ႈပၢႆႈၵႂႃႇ တၢင်းလႂ်ၶႃႈလူး”- ဝႃႈၼႆ။
မိူၼ်ၼင်ႇၼႆ ဝၼ်းတီႈ 18/11/2024 ယၢမ်းႁူဝ်ၶမ်ႈ 7 မူင်း သိုၵ်းမၢၼ်ႈ ပွႆႇမၢၵ်ႇတီႈဝဵင်းၼွင်ၶဵဝ်ထႅင်ႈ၊ တူၵ်းသႂ်ႇဝၢၼ်ႈသူၼ် ႁိူၼ်းယေးလႄႈ ႁူင်းၸၢၵ်ႈႁုင်ၵိူဝ်ဝၢၼ် လႅဝ်ၽႅဝ်ႉ၊ ၵူၼ်းမိူင်းႁဵင်ပၢႆ လႆႈပၢႆႈၽေးသိုၵ်း။
တီႈဝဵင်းၼွင်ၶဵဝ်ၼႆႉ သိုၵ်း TNLA – PDF လႄႈ သိုၵ်းမၢၼ်ႈ ပိုတ်းယိုဝ်း တိုၵ်းတေႃးၵၼ် မႃးတင်းႁိုင်။ ထိုင်မႃးဝၼ်းတီႈ 10/07/2024 ၼႆႉ သိုၵ်းတဢၢင်း ပိုၼ်ၽၢဝ်ႇဝႃႈ ယိုတ်းၵုမ်းလႆႈ ဝဵင်းၼွင်ၶဵဝ်ယဝ်ႉ ဝႃႈၼႆသေတႃႉ တီႈဝၢၼ်ႈတွင်းၶမ်း ဢၼ်ယၢၼ်ၵႆၵၼ် တၢင်းဝဵင်းၼွင်ၶဵဝ်မွၵ်ႈ 20 လၵ်းၼၼ်ႉ ပၢင်တိုၵ်းသိုပ်ႇပဵၼ် တေႃႇထိုင်ဝၼ်းမိူဝ်ႈၼႆႉ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ