ၸဝ်ႈသိလ်ထမ်း ၶူးဝႃးဝုၼ်းၸုမ်ႉ လုၵ်ႉမိူင်းပူႊတၢၼ်ႊ ယေႃးၶိင်းႁွတ်ႈထိုင်ၶိုၼ်းမိူင်းၽူင်း ၸႄႈဝဵင်းတႃႈၶီႈလဵၵ်းယဝ်ႉ ဝႃႈၼႆ။

ဝၼ်းတီႈ 20/11/2024 ယၢမ်းဝၢႆးဝၼ်း 2 မူင်း ၸဝ်ႈသိလ်ထမ်းၶူးဝႃးဝုၼ်းၸုမ်ႉ ယေႃးၶိင်းပွၵ်ႈမႃးၶိုၼ်း ဝတ်ႉၽရႃႉထၢတ်ႈ သီႊတွၼ်ႊရိူင်း (သီရိတွၼ်းႁိူင်း) ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းသေ ၶူးဝႃးၸဝ်ႈ ႁေႃးတြႃးပွၼ်ႈထမ်းပၼ်ပႃး တၵ်ႉၵႃႇသတ်ႉထႃးၵူၼ်းမိူင်း ၸိူဝ်းမႃးပႂ်ႉႁပ်ႉၸဝ်ႈတင်းၼမ် ၼႆယဝ်ႉ။

ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင် သင်ႇၶႃႇၸဝ်ႈ ၸိုင်ႈတႆးပွတ်း ဢွၵ်ႇၶူင်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ယၢမ်းဝၢႆးဝၼ်းမွၵ်ႈ 2 မူင်းၼႆႉ လႆႈပႂ်ႉႁပ်ႉၶူးဝႃး ပေႃႈသိလ်ထမ်းဝုၼ်း ၸုမ်ႉ တီႈၶူဝ်မၢႆသွင် တႃႈၶီႈလဵၵ်းၼႆႉသေ ၶူးဝႃးပေႃႈ ၶိုၼ်းဢွၼ်ႁူဝ်ၼမ်းၼႃႈ ၵႂႃႇဝၢင်းတမ်း မၢၵ်ႇဢုတ်ႇငိုၼ်း၊ မၢၵ်ႇ ဢုတ်ႇၶမ်း တီႈၵွင်းမူးလူင် သူၺ်ႇတၵူင်ႇတႃႈၶီႈလဵၵ်း။ ဝၢႆးၼၼ်ႉ ၶိုၼ်းမႃးႁူပ်ႉထူပ်းတၵ်ႉၵႃႇသတ်ႉထႃး တီႈဝတ်ႉသၢႆမိူင်းၼႆႉထႅင်ႈ။ ပေႃးယဝ်ႉ ႁူဝ်ၶမ်ႈ ၶၢဝ်းယၢမ်း 5 မူင်းပၢႆ ၸင်ႇၶိုၼ်းပွၵ်ႇၵႂႃႇတီႈမိူင်းၽူင်းသေ ၵၢင်ၶမ်ႈမႃး ၸင်ႇၶိုၼ်းႁေႃးတြႃး တီႈဝတ်ႉၽြႃးဢိတ်းသၢၼ် တီႈမိူင်းၽူင်းၵႂႃႇ”- ဝႃႈၼႆ။

ယၢမ်းလဵဝ် ၸမ်ထိုင်ၶၢဝ်းပီသဵင်ႈယဝ်ႉလႄႈ ဝၼ်းၵိူတ်ႇၸဝ်ႈၶူးဝႃး ဢၼ်တေမႃးထိုင်ၼႂ်း ႁူဝ်ပီ 2025 ၼႆႉၵေႃႈ မီးလွင်ႈႁၢင်ႈႁႅၼ်းဝႆႉ တႃႇတေတၢင်ႇၸွင်ႈၶမ်းပီသႅင် ၵွင်းမူးမိူင်းပူႇထဝ်ႈ (ပူႇတႃႇဢူဝ်ႇ) ပႃး ဝႃႈၼႆ။

“ဢၼ်ၼႆႉၵေႃႈ လႆႈၵႂႃႇဢဝ် ၵွင်းမူးလူင် မိူင်းပူႇတႃႇဢူဝ်ႇ(ပူႇထဝ်ႈ) ၼၼ်ႉသေ မႃးယိူင်ႈႁၢင်ႈမၼ်းမႃး ၵေႃႇသၢင်ႈထၢတ်ႈၵွင်းမူးဝႆႉ ႁႂ်ႈပဵၼ်တီႈမၢႆတွင်းဝၼ်းၵိူတ်ႇၸဝ်ႈ။ တေမီးမၢႆၶပ်းတၢင်ႇ ၸွင်ႈၶမ်းပီသႅင် ၵွင်းမူးၼၼ်ႉပႃး။ ဢၢၼ်းဝႆႉ တေတၢင်ႇၼႂ်းဝၼ်းတီႈ 4 လိူၼ်ထူၼ်ႈ1 ပီ 2025 ဢၼ်တေမႃးထိုင်ၼႆႉ။ မိူဝ်ႈလဵဝ်တႄႉ သဵၼ်ႈတၢင်းတီႈမိူင်းၽူင်း ဢၼ်လုၵ်းလုၵ်းလၵ်းလၵ်းၸိူဝ်းၼၼ်ႉၵေႃႈ ၵွႆဝႆႉမိူဝ်ႈၶၢဝ်းၾူၼ် ၵေႃႈၼမ်။ ဢၼ်တေသိူဝ်ႇသဵၼ်ႈတၢင်းသွင်သဵၼ်ႈ တီႈဝၢင်းဝတ်ႉၾႃႉထၢတ်ႈတွၼ်းႁိူင်းၼၼ်ႉၵေႃႈ မိူဝ်ႈလဵဝ်သိူဝ်ႇဝႆႉ ပေႃးတေယဝ်ႉတူဝ်ႈလီငၢမ်းယဝ်ႉၼင်ႇၵဝ်ႇ”- ၸဝ်ႈၶူးလူင် ၺႃႇၼသီႇရိ သိုပ်ႇလၢတ်ႈၼႄၼင်ႇၼႆ။

ၽွင်းငဝ်းလၢႆးဝၢၼ်ႈမိူင်း ယၢမ်းလဵဝ် ၵူၼ်းမိူင်းထူပ်းၽေးပၢင်တိုၵ်းသိုၵ်းသိူဝ် ၵူၺ်းဢမ်ႇၵႃး တႃႇၵႂႃႇတႃႈ ပႆတၢင်းၵေႃႈ မီးလွင်ႈယၢပ်ႇလႄႈ ယူႇတီႈ ၶူးဝႃးၸဝ်ႈၵေႃႈ သူင်ႇမဵတ်ႉတႃႇထိုင် ၵူၼ်းမိူင်းဝႆႉယူႇ ဝႃႈၼႆ။

“မိူဝ်ႈလဵဝ် ဝၢၼ်ႈမိူင်းႁဝ်းၼႆႉၵေႃႈ ပဵၼ်ၽွင်းယၢမ်းဢၼ် တေလၢတ်ႈၸိူင်ႉႁိုဝ်ၵေႃႈ ဢမ်ႇလႆႈလႄႈ ပေႃႈမႄႈပီႈၼွင်ႉႁဝ်းၶဝ် ၵူႈတီႈၵူႈတၢင်းၵေႃႈ ယွၼ်းႁႂ်ႈယိူၼ်ႉၵၼ်ႈ ၼႂ်းလေႃးၵထၢမ်ႇသေ ၵႆၽေးၵေႃႈ ႁႂ်ႈဝႄႈၽေး ၸမ်ၽေးၵေႃႈ ၼင်ႇ ႁိုဝ် ၽေးတေဢမ်ႇထိုင်ၼၼ်ႉ ထုၵ်ႇလီငိူင်ႉၸိူင်ႉႁိုဝ်ၵေႃႈ ငိူင်ႉႁႂ်ႈလွတ်ႈၽေး ႁႂ်ႈမေႃယူႇသဝ်းၵႂႃႇသေၵမ်း။ မိူဝ်ႈလဵဝ် ၶူးဝႃးပေႃႈ ပွၵ်ႈမႃးၶိုၼ်းယဝ်ႉၼႆၵေႃႈ ႁဝ်းၶဝ် တေမီးသုၼ်ႇလႆႈဝႆႈ သႃ လႆႈထွမ်ႇတြႃးထႅင်ႈၼၼ်ႉယဝ်ႉ။ တီႈၶူးဝႃးပေႃႈၼႆႉ လႆႈထိုင်ၵေႃႈလီ ဢမ်ႇလႆႈထိုင်ၵေႃႈလီ ယူႇတီႈလႂ် ၵေႃႈ ႁပ်ႉဢဝ်မဵတ်ႉတႃႇၶူးဝႃးပေႃႈလႆႈယူႇ ႁႂ်ႈမီးလွင်ႈသိူဝ်းသႃႇသေၵမ်းၼႆ ဢၼ်ၼႆႉ ၶူးဝႃးပေႃႈၵေႃႈ ၵႆႉမွၵ်ႇလၢတ်ႈတႃႇသေႇယူႇ”- ၸဝ်ႈၶူးလူင် ၺႃႇၼသီႇရိ သိုပ်ႇလၢတ်ႈၼႄ ၼင်ႇၼႆထႅင်ႈ။

ၼွၵ်ႈလိူဝ် လွင်ႈတေၸတ်းဝၼ်းၵိူတ်ႇယဝ်ႉ ၽွင်းၶူးဝႃးၸဝ်ႈ မႃးႁေႃးတြႃး တီႈမိူင်းထႆးၼၼ်ႉ ယင်းမွၵ်ႇလၢတ်ႈပႃး လွင်ႈတႃႇတေဢွၵ်ႇၶၢဝ်းတၢင်း ႁေႃးတြႃးပၼ်ႇလဵပ်ႈၼႂ်းမိူင်းတႆး ထႅင်ႈလၢႆတီႈ ဝႃႈၼႆ။