ဝဵင်း New Delhi ဝဵင်းလူင်ငဝ်ႈၸိုင်ႈ ၶွင်မိူင်းဢိၼ်ႊတီႊယိူဝ်ႊ လႆႈႁူပ်ႉၺႃးၽေးလူမ်းဝူၺ်ႇႁင်ႈ ၸၼ်ႉႁၢဝ်ႈႁႅင်းသုတ်းလႄႈ ထိုင်မႃး ဝၼ်းတီႈ 18 ၼႆႉ လႆႈသင်ႇပိၵ်ႉဢိုတ်း ႁူင်းႁဵၼ်းသွၼ်လိၵ်ႈ ၵိုတ်းလိုဝ်ႈ ၵၢၼ်ၵေႃႇသၢင်ႈ သင်ဢမ်ႇလွင်ႈယႂ်ႇၸိုင် ဢမ်ႇပၼ်ၶႂၢင်ႉၸႂ်ႉတိုဝ်း ရူတ်ႉၵႃးၵႂႃႇမႃး ၼႂ်းဝဵင်း။  

ႁိမ်းႁွမ်းဝဵင်းၼၼ်ႉ မီးမွၵ်ႇၵႂၼ်း သုမ်ႇငမ်းၼႃႁႅင်းဝႆႉလႄႈ မီးၽေးၸၢင်ႈတုမ်ႉတိူဝ်ႉတေႃႇပၢႆးယူႇလီ ၵူၼ်းမိူင်း။ ပိူင်လူင် လုၵ်ႈဢွၼ်ႇ၊ ၵူၼ်းၸိူဝ်းဢႃယုယႂ်ႇ၊ ၵူၼ်းမီးတၢင်းပဵၼ်ၵိုၵ်းတူဝ်လႄႈ ၵူၼ်းမီးတၢင်းပဵၼ် ၵဵဝ်ႇလူၺ်ႈ လွတ်ႇလူမ်းထူၺ်ႈၸႂ် ၸိူဝ်းၼႆႉ ႁႂ်ႈဢွၼ်ၵၼ် ယူႇသဝ်းတီႈၼႂ်းႁိူၼ်းၵူၺ်းၼႆ ၾၢႆႇၸဝ်ႈၼႃႈ တီႈၶဝ်ပၼ်ၾၢင်ႉတိုၵ်းသူၼ်းဝႆႉ ၼင်ႇၼႆ။

လိူဝ်ၼၼ်ႉ ၶၢဝ်းတၢင်းသၢႆၵၢၼ်မိၼ် ၸိူဝ်းၼႆႉၵေႃႈ တေၸၢင်ႈထိူင်းၵႂႃႇ။ ၼႂ်းဝဵင်း New Delhi ၼႆႉ ၵမ်ႈၼမ် လူမ်းဝူၺ်ႇႁင်ႈႁၢႆႉႁႅင်း လိူဝ်သေ ၾၢႆႇပၢႆးယူႇလီၶဝ် မၵ်းမၼ်ႈဝႆႉၼၼ်ႉ 50 ပုၼ်ႈသေ ၼႂ်းဝူင်ႈၼႆႉ ငဝ်းလၢႆးတိုၵ်ႉတေသိုပ်ႇႁၢဝ်ႈႁႅင်းၵႂႃႇထႅင်ႈယူႇ ၼႆယဝ်ႉ။

ပေႃးထိုင်မႃးၼႂ်းၶၢဝ်းၵတ်း၊ ၶၢဝ်းဢဝ်မၢၵ်ႇၶဝ်ႈတဝ်ႈၼမ်ႉၼႆ ၼႂ်းမိူင်းဢိၼ်ႊတီႊယိူဝ်ႊပွတ်းႁွင်ႇ တေၸုတ်ႇၽဝ် တူၼ်ႈမၢၵ်ႇၶဝ်ႈတဝ်ႈၼမ်ႉ ဢၼ်ၵိုတ်းလိူဝ်ဝႆႉ ၼႂ်းတိူၵ်ႇႁႆႈလွၵ်းၼႃး။ တီႈႁူင်းၸၢၵ်ႈ၊ ႁူင်းႁဵတ်းဢွၵ်ႇ ႁႅင်းထၢတ်ႈ ၾႆးၾႃႉ ၸိူဝ်းၼႆႉၵေႃႈ ၸုတ်ႇၽဝ်ထၢၼ်ႇႁိၼ်လႄႈ ၵႆႉလႆႈထူပ်းၽေး လူမ်းဝူၺ်ႇႁင်ႈ ၼႆယဝ်ႉ။