သိုၵ်းမၢၼ်ႈလႄႈ ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ပိုတ်းယိုဝ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA တီႈဢိူင်ႇသၢႆးၶၢဝ် ၶူဝ်ၼမ်ႉပွၼ် လူႉၵွႆ။

ပၢင်တိုၵ်းၼႆႉ ပဵၼ်မိူဝ်ႈၼႆႉ ဝၼ်းတီႈ 20/11/2024 ယၢမ်းၵၢင်ၼႂ် မွၵ်ႈ 10 မူင်း။

သိုၵ်းမၢၼ်ႈ ယိုဝ်းမၢၵ်ႇလူင်တူၵ်းသႂ်ႇ ၶူဝ် 3 လုၵ်ႈ။ ၾၢႆႇတၢင်းလိၼ်ၵေႃႈ ထႅမ်ႁႅင်းသိုၵ်း ၶိုၼ်ႈမႃးတင်းၼမ်။ ပၢင်တိုၵ်းပဵၼ်ႁၢဝ်ႈႁႅင်း – ၶုၼ်ႇရဵၼ်းယၼ်ႇ ၽူႈၶၢၼ်ပၢၵ်ႇ PNLA လၢတ်ႈၼင်ႇၼႆ။

“သိုၵ်းမၢၼ်ႈ ပွႆႇမၢၵ်ႇသႂ်ႇၶူဝ်ပွၼ် တိူဝ်ႉ 3 ၵမ်း။ ႁိမ်းၶူဝ်ပွၼ်ၵေႃႈ ပဵၼ်ပၢင်တိုၵ်းၵၼ် ႁၢဝ်ႈႁႅင်း”- ဝႃႈၼႆ။

သဵၼ်ႈတၢင်းၵၢတ်ႇၵူႇ – သၢႆးၶၢဝ် – မိူင်းၼၢႆး ၊ သၢႆးၶၢဝ် – မွၵ်ႇမႆႇၼႆႉ ပဵၼ်သဵၼ်ႈတၢင်း ဢၼ်ၸဝ်ႈရူတ်ႉၸဝ်ႈၵႃးၶဝ် ၸႂ်ယႂ်ႇ ၽွင်းၶၢဝ်းလူဝ်ႇလႅၼ်ႈဝႆး ၸဵဝ်းထိုင်။ ၽွင်းၼမ်ႉထူမ်ႈ မိူင်းတႆးပွတ်းၸၢၼ်း ၽွင်းလိူၼ်သႅပ်ႊထႅမ်ႊပိူဝ်ႊၼၼ်ႉ ၸဝ်ႈၵႃး ၸႂ်ႉသဵၼ်ႈတၢင်းၼႆႉ ပဵၼ်ပိူင်လူင်။

ၽွင်းႁူဝ်လိူၼ်ၼႆႉၵေႃႈ သိုၵ်းမၢၼ်ႈလႄႈ ပျီႇတူႉၸိတ်ႉ ၶဝ်ႈထိုင်ၼႂ်းၸႄႈဝဵင်းၾၢႆၶုၼ်သေ ပိုတ်းယိုဝ်းၵၼ်တင်း တပ်ႉသိုၵ်းၽွမ်ႉႁူမ်ႈယၢင်းလႅင် ႁၢဝ်ႈႁႅင်း။